ភ្នំពេញ៖ មន្ត្រីជាន់ខ្ពស់នៃ អគ្គនាយកដ្ឋានកសិកម្ម នៃក្រសួងកសិកម្មរុក្ខាប្រមាញ់ និងនេសាទបានបញ្ជាក់ថា កម្ពុជាអាចនាំចេញអង្ករប្រមាណ ៨០ម៉ឺនតោន ក្នុងឆ្នាំ២០២០នេះឬក៏អាចឈានដល់ទៅជិត១លានតោន ខណ:ត្រឹមតែរយ:ពេល៥ខែ នៅឆ្នាំនេះ កម្ពុជានាំចេញអង្ករបានចំនួនជាង៣៥ម៉ឺនតោន។
ថ្លែងក្នុងសន្និសីទសារព័ត៌មានស្តីពី “សក្ដានុពលនាំចេញកសិផលកម្ពុជា ទៅកាន់ទីផ្សារអន្តរជាតិ ដែលមានការទាក់ទងនឹងភូតគាមអនាម័យ”កាលថ្ងៃទី១៧ ខែមិថុនា ឆ្នាំ២០២០ ឯកឧត្តម ងិន ឆាយ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានកសិកម្ម នៃក្រសួងកសិកម្មរុក្ខាប្រមាញ់ និងនេសាទបានបញ្ជាក់ថា គិតត្រឹមរយ:ពេល ៥ខែនៅឆ្នាំ២០២០នេះ កម្ពុជា បាននាំចេញអង្ករទៅកាន់បណ្ដាប្រទេសនានា លើពិភពលោក បានចំនួនជាង៣៥ម៉ឺនតោន កើនឡើង៤២,៣៩ភាគរយ បើធៀបទៅនឹងរយៈដូចគ្នាកាលពីឆ្នាំ២០១៩។
ឯកឧត្តមបានថ្លែងថាតាមរយៈការកើនឡើងនេះ ដែលយើងអាចប៉ាន់ស្មានថា ក្នុងឆ្នាំ២០២០នេះ ការនាំចេញអង្កររបស់កម្ពុជា នឹងមានការកើនឡើងរហូតដល់ទៅជិត១លានតោន ។
បើតាមឯកឧត្តម ងិន ឆាយ៖« ដោយយើងសង្កេតឃើញថា នៅបណ្តាប្រទេសមួយចំនួន គឺគេបានកម្មង់អង្ករ ជាពិសេសអង្ករក្រអូបកម្ពុជាទៅសហគមន៍អឺរ៉ុបមានការកើនឡើង នេះជាសញ្ញាមួយដ៏ល្អសម្រាប់កម្ពុជា ចឹងទំហំនៃការនាំចេញរបស់យើង ខ្ញុំសង្ឃឹមថា អាច បានប្រហែលជិត១លានតោន ប្រសិនបើជាតាមសន្ទុះនៃការកម្ម៉ង់ ឬមួយក៏ការប៉ាន់ស្មានពីសហព័ន្ធស្រូវអង្ករ យ៉ាងហោចណាស់ក៏យើងបានប្រហែលជា៨០ម៉ឺនតោនអីដែរ ខណៈដែលកាលពីឆ្នាំ២០១៩យើងបាននាំចេញប្រហែលជា៦២ម៉ឺនតោន។»
ឯកឧត្តមបានបញ្ជាក់ទៀតថា នៅក្នុងរយៈពេលនេះ ការនាំចេញអង្ករកម្ពុជាទៅកាន់ប្រទេសចិនមានចំនួនជាង១៣,៦ម៉ឺនតោន, សហភាពអឺរ៉ុបមានចំនួនជាង១២ម៉ឺនតោន, ទីផ្សារអាស៊ានវិញ គឺមានប្រមាណ៤,៥ម៉ឺនតោន ខណៈនាំចេញទៅប្រទេសផ្សេងទៀត មានឥណ្ឌាជាដើម គឺបានកើនឡើងប្រមាណ៧៩ភាគរយ។
សូមបញ្ជាក់ថា កាលពីឆ្នាំ២០១៩ ការនាំអង្ករចេញក្នុងឆ្នាំ២០១៩ សម្រេចបានចំនួន ៦២០ ១០៦តោន ទៅកាន់ទិសដៅ៥៩ប្រទេស ក្នុងនោះ ការនាំចេញទៅប្រទេសចិនបានច្រើនជាងគេគឺ ២៤៨ ១០៥តោន ស្មើនឹង៤០,៧៣% ទៅសហគមន៍អឺរ៉ុប (២៥ប្រទេស) បានចំនួន២០២ ៩៩០តោន ស្មើនឹង៣២,០១% ទៅប្រទេសក្នុងតំបន់អាស៊ាន (៦ប្រទេស) បានចំនួន៨៣ ១៦៤តោន ស្មើនឹង១៣,៤១% និងទៅ២៧ប្រទេសផ្សេងៗទៀតបានចំនួន៨៥ ៨៤៧តោន ស្មើនឹង១៣,៨៤% នៃការនាំចេញអង្ករសរុប។
ទោះបីបរិមាណនាំចេញអង្ករក្នុងឆ្នាំ២០១៩ មានការថយចុះបន្តិច (០,៩%) ក៏ដោយ ក៏បរិមាណនាំចេញអង្ករក្រអូបគ្រប់ប្រភេទមានការកើនឡើងគួរឱ្យកត់សម្គាល់ ដែលទំហំនៃការនាំចេញមានចំនួន ៥៣១ ៦៤៨តោន ស្មើនឹង៨៥,៧៤% គឺកើនលើសឆ្នាំមុនចំនួន៣៨ ០៥១តោន ហើយអង្ករសចម្រុះមានចំនួនតែ៨១ ២៩១តោន ស្មើនឹង១៣,១១% និងអង្ករចំហុយចំនួនតែ៧ ១៦៧តោន ស្មើនឹង១,១៦% នៃការនាំចេញអង្ករសរុប។
កំណើននៃបរិមាណនាំចេញអង្ករក្រអូបបានបង្ហាញអំពីការទទួលស្គាល់នូវគុណភាពល្អពិសេសរបស់អង្ករក្រអូបកម្ពុជាដោយទីផ្សារអន្តរជាតិ និងម្យ៉ាងទៀតបានបញ្ជាក់អំពីការរីកចម្រើននៅក្នុងឧស្សាហកម្មស្រូវអង្ករកម្ពុជា ដែលបាននិងកំពុងពិពិធកម្មផ្តោតលើមុខទំនិញមានឧត្តមភាពប្រៀបធៀប ដែលជាបច្ច័យមួយជួយឱ្យកម្ពុជាអាចបង្កើតបាន នូវឧត្តមភាពប្រកួតប្រជែងពិតប្រាកដរបស់ខ្លួនមួយ នៅក្នុងឧស្សាហកម្មកែច្នៃនាំចេញអង្ករ នៅក្នុងទីផ្សារអន្តរជាតិក្នុងពេលខាង។
ការនាំចេញផលិតផលសំខាន់ៗផ្សេងទៀតរួមមាន៖ ចំណិតដំឡូងមីក្រៀមបានចំនួន ១ ៦២៦ ១៦៥តោន ដំឡូងមីស្រស់បានចំនួន ១ ៦០៨ ៤៥០តោន ម្ស៉ៅដំឡូងមីបានចំនួន ៥៦ ៨៧៤តោន គ្រាប់ស្វាយចន្ទីបានចំនួន ២០២ ៣១៨តោន ផ្លែចេកស្រស់បានចំនួន ១៥៧ ៨១២តោន គ្រាប់ពោតបានចំនួន ១១៩ ៩៩៣តោន សណ្តែកបាយបានចំនួន៩ ៣៧០តោន សណ្តែកសៀងបានចំនួន ៥៧ ២៥០តោន ម្ទេសស្រស់បានចំនួន៥៥ ៥១៣តោន ម្រេចបានចំនួន៣ ៦៩៣តោន និងផ្លែស្វាយស្រស់បានចំនួន ៥៨ ១៦២តោន និងដំណាប់ស្វាយបានចំនួន២ ៧១២តោន។ល៕
ដោយ៖CEN
