ភ្នំពេញ៖ បច្ចុប្បន្ន ផលិផលកសិកម្មរបស់កម្ពុជា កំពុងមានសក្តានុពល ដែលជំរុញឱ្យមានការនាំចេញកាន់តែច្រើន។ ចំពោះការនាំចេញនូវផលិតផលកសិកម្មទាំងនេះ មន្ត្រីរាជរដ្ឋាភិបាលកម្ពុជា រំពឹងថា និងនាំចេញទៅកាន់បណ្តាប្រទេសជាច្រើនទៀត បន្ទាប់មានកិច្ចព្រមព្រៀងពាណិជ្ជកម្មសេរីជាមួយ ប្រទេសចិន និងប្រទេសកូរ៉េ ។
លោក ងិន ឆយ ប្រតិភរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានកសិកម្ម បានឲ្យដឹងថា កិច្ចព្រមព្រៀងពាណិជ្ជកម្មសេរីជាមួយបណ្តាប្រទេសនានា ជាពិសេសប្រទេសចិន និងកូរ៉េ នឹងមានការពិនិត្យ វាយតម្លៃ ក្នុងការនាំចេញកសិផលរបស់កម្ពុជាកាន់តែលឿន គឺមិនមានការចំណាយពេលយូ ក្នុងការចរចានាំផលិតផលកសិកម្មរបស់កម្ពុជា ដូចអតីតកាលនោះទេ។
កិច្ចព្រមព្រៀងពាណិជ្ជកម្មសេរី គឺសំដៅដល់ការលើកកម្ពស់ការផ្លាស់ប្តូរពាណិជ្ជកម្មរវាងគ្នា និង គ្នា ដើម្បីជំរុញកំណើនសេដ្ឋកិច្ចប្រទេសផងគ្នា។ ក្រសួងពាណិជ្ជកម្ម គ្រោងនឹងបើកការចរចាផ្លូវការ ជាមួយប្រទេសកូរ៉េខាងត្បូង នៅខែកក្កដាខាងមុខនេះ ដើម្បីឈានទៅរកការចុះកិច្ចព្រមព្រៀងពាណិជ្ជកម្មសេរីជាមួយគ្នា។ កម្ពុជា មានសញ្ញាវិជ្ជមានជាច្រើន នៃការឈានទៅសម្រេចបាននូវកិច្ចព្រមព្រៀងពាណិជ្ជកម្មសេរីជាមួយកូរ៉េ បន្ទាប់ពីកម្ពុជាបានចរចាកិច្ចព្រមព្រៀងនេះ ជាមួយប្រទេសចិនបានជោគជ័យ។
កម្ពុជា និងចិន គ្រោងនឹងចុះហត្ថលេខា លើកិច្ចព្រមព្រៀងពាណិជ្ជកម្មសេរីជាមួយគ្នាជាផ្លូវការ នៅចុងឆ្នាំ២០២០នេះ។ អ្នកជំនាញមើលឃើញថា ប្រសិនបើកម្ពុជា និងចិន បានចុះកិច្ចព្រមព្រៀងពាណិជ្ជកម្មសេរីជាមួយគ្នាមែននោះ គេរំពឹងការនាំចេញរបស់កម្ពុជា នឹងកើនឡើងបន្ថែមប្រមាណ២០ភាគរយៈក្នុងមួយឆ្នាំ ហើយកំណើនវិនិយោគពីបរទេសក៏រំពឹងនឹងកើនឡើងខ្លាំងផងដែរ។
អ្នកជំនាញសេដ្ឋកិច្ច មើលឃើញទៀតថា បើទោះបីជាកិច្ចព្រមព្រៀងពាណិជ្ជកម្មសេរីផ្តល់អត្ថប្រយោជន៍ច្រើនយ៉ាងណា ក៏ការចរចាបង្កើតនូវកិច្ចព្រមព្រៀងពាណិជ្ជកម្មសេរីនេះ គឺមិនងាយស្រួលឡើយ ពីព្រោះត្រូវជជែកលើបញ្ហាជាច្រើន ហើយត្រូវបានប្រើប្រាស់ពេលវេលាយូរទៀត។
គួរបញ្ជាក់ថា ក្រៅពីចិន និង កូរ៉េ កម្ពុជាក៏មានគម្រោងចរចាកិច្ចព្រមព្រៀងពាណិជ្ជកម្មសេរី ជាមួយបណ្តាប្រទេសផ្សេងៗទៀតផងដែរ ដូចជា សហរដ្ឋអាមេរិក ចក្រភពអង់គ្លេស ជប៉ុន ម៉ុងហ្គោលី ឥណ្ឌា និង សហភាពសេដ្ឋកិច្ច EAEU ជាដើម៕
ដោយ ៖ CEN
