បន្ទាយមានជ័យ ៖ ពោលគឺគម្រោងនោះបានអនុវត្តបានមួយកំណាត់ហើយគឺផ្លូវជាតិលេខ៥៨ ដែលកសាងបានលឿននិងមានស្តង់ដារគុណភាព ជាមួយនឹងសោភ័ណភាព ទេសភាពដ៏ស្រស់ត្រកាល។
ក្រសួងសាធារណការនិងដឹកជញ្ជូនអះអាងថា ខ្លួនមានគម្រោងស្នើសុំរាជរដ្ឋាភិបាលដើម្បីកសាងផ្លូវជាតិអោយបានសសៀរនិងសណ្តូកមួយបណ្តោយជួរភ្នំដងរែកព្រំដែនកម្ពុជា ថៃតែម្តង។
លោក លឺម ស៊ីដេនីន រដ្ឋលេខាធិការក្រសួងសាធារណការនឹងដឹកជញ្ជូននិងប្រតិភូ បានប្រាប់សារព៍ត៍មានទី២៦មករាឆ្នាំ២០១៨ ខណ: លោកនិងគណប្រតិភូ រួមនឹងលោកគឹម សុវណ្ណ ប្រធានមន្ទិរសាធារណការនិងដឹកជញ្ជូន ខេត្តបន្ទាយមានជ័យ , ប្រធានមន្ទិរសាធារណការខេត្តឧត្តរមានជ័យ បានអញ្ជើញចុះត្រួតពិនិត្យបទដ្ឋានបច្ចេកទេសនិងល្បឿននៃការស្ថាបនាផ្លូវជាតិលេខ៥៨ ពីចំណុចភូមិផ្អុងសង្កាត់អូរស្មាច់ក្រុងសំរោងខេត្តឧត្តរមានជ័យដល់ភូមិ-សង្កាត់ផ្សារកណ្តាលក្រុងប៉ោយប៉ែតខេត្តបន្ទាយមានជ័យ។
លោក លឺម ស៊ីដេនីន មានប្រសាសន៍ថា : ក្រសួងបានស្នើសុំរាជរដ្ឋាភិបាលនិងបានស្នើសុំហិរញ្ញប្បទានសម្បទានសាធារណរដ្ឋប្រជាមានិតចិនបន្តដើម្បីកសាងបន្តផ្លូវជាតិលេខ៥៨នេះ តពីចំណុចផ្អុងខេត្តឧត្តរមានជ័យ កាត់ភូមិសាស្ត្រខេត្តព្រះវិហាររហូតភូមិសាស្ត្រខេត្តស្ទឺងត្រែងតែម្តង។
ពោលគឺត្រូវស្ថាបនាផ្លូវជាតិអោយបានសសៀរបណ្តោយព្រំដែនកម្ពុជា ថៃ ឡាវដែលសណ្តូកប្របនឹងជើងជួរភ្នំដងរ៉ែកតាំងពីច្រមុះភ្នំក្នុងភូមិសាស្ត្រខេត្តបន្ទាយមានជ័យដល់ខេត្តស្ទឺងត្រែង។
ចំណែក បងប្អូនប្រជាពលរដ្ឋរស់នៅតាមសងខាងផ្លូវ ក៏ដូចជាអាស្រ៏យផលដោយធ្វើដំណើរ ដឹកជញ្ជូនតាមដងផ្លូវជាតិលេខ៥៨ ដែលទើបកសាងថ្មីចែសនេះ មានសេចក្តីត្រេកអររកនិយាយមិនត្រូវដោយមានវាសនាបានទទួលផ្លូវដ៏ធំទូលាយនេះ។ពួកគេបានថ្លែងអំណរគុណនិងជូនពរដល់រាជរដ្ឋាភិបាលពិសេសសម្តេចតេជោហ៊ុនសែន នាយករដ្ឋមន្ត្រី ដល់ក្រសួងសាធារណការនិងដឹកជញ្ជូននិងមហាមិត្តចិនដែលបានស្ថាបនាផ្លូវជាតិលេខ៥៨ ដ៏មានអត្ថប្រយោជន៍និងតម្លៃជាប្រវត្តិសាស្ត្រនេះ។
ទទួលគណ:ប្រតិភូក្រសួងសាធារណការនិងដឹកជញ្ជូន លោកស៊ិនហ្គួ ស៊ុន( Mr Xinguo Shun) អគ្កនាយករងក្រុមហ៊ុនសំណង់សៀងហៃហ្គ្រុប (ShanghaiContruction Group:SCG) អោយដឹងថា៖ ផ្លូវជាតិលេខ៥៨ នេះមានប្រវែងសរុប១៧៤,១៦គម (ក្នុងនោះរាប់ទាំងខ្នែងផ្លូវចូលច្រកទ្វារព្រំដែនកម្ពុជាមួយចំនួនផង) ទទឹង១២ ម៉ែត្រ ក្រាលកៅស៊ូ៣ជាន់ និងផ្លូវ២គន្លង សម្រាប់បើកបរល្បឿន៦០គីឡូម៉ែត្រ មានស្ពាន ៣១ កន្លែង លូនិងដាលូ៣៣២កន្លែង បានបើកការដ្ឋានផ្លូវការពីថ្ងៃទី១៨មិនា២០១៥ មកក្រោមអធិបតីភាពសម្តេចតេជោហ៊ុនសែន នាយករដ្ឋមន្ត្រីកម្ពុជានិងលោកស្រីពូ ជៀនហ្គួ ឯកអគ្គរដ្ឋចិនប្រចាំកម្ពុជានិងក្រោមថវិកាហិរញ្ញប្បទានសាធារណរដ្ឋប្រជាមានិតចិន។
លោកបន្តថា : ក្នុងផ្នែកលូនិងដាឡូ ស្ថាបនារួច១០០ភាគរយ , ស្ពានស្ថាបនាជិត៩៧ភាគរយ ក្នុងនោះនៅសល់ស្ពាន១ដែលសល់ពីមុននៅត្រង់ព្រំដែនកម្ពុជាថៃ ច្រកអូរបីជាន់។និងផ្នែកផ្លូវមេនិងខ្នែងស្ថាបនាបានជាង៨០ភាគរយ។ ក្នុងនោះ មានខ្នែងផ្លូវភ្ជាប់ទៅច្រកព្រំដែនថ្មដូន ច្រកប្រាសាទតាមាន់, ច្រកជប់គគីរ , ច្រកបឹងត្រកួន ច្រកតំបន់៤៣,ស្ថាបនាស្ពានច្រកអូរបីជាន់ , ច្រកអូរនាងជាដើម។
នៅភូមិសាស្ត្រខេត្តបន្ទាយមានជ័យ គណប្រតិភូបានទទួលការពារដោយកម្លាំងនគរបាលការពារព្រំដែនគោកលេខ៨០៧ និងលោក ឈើយ ចាន់ណា អភិបាលស្តីទីខេត្តបន្ទាយមានជ័យ ។ក្នុងនោះបានចូលពិនិត្យខ្នែងផ្លូវចូលច្រកព្រំដែនតំបន់បឹងត្រកួន-តាប្រាយ៉ា ជាប់នឹងបង្គោលព្រំដែនលេខ៣៦ ដែលភាគីទាំង២បានសម្របសម្រួលគ្នាអោយតភ្ជាប់។
បានចូលពិនិត្យខ្នែងផ្លូវចូលច្រកអូរបីជាន់ដែលតម្រូវអោយអាជ្ញាធរខេត្តបន្ទាយមានជ័យនិងខេត្តស្រះកែវជាសម្ព័ន្ធភាពជិតខាងសម្របសម្រួលគ្នាដើម្បីបានស្ថាបនាអោយមុនផ្លូវជាតិលេខ៥៨ត្រូវបានស្ថាបនាបញ្ចប់។
លោក រដ្ឋលេខាធិការក្រសួងសាធាណការបានកោតសរសើរក្រុមហ៊ុនសៀងហៃហ្គ្រុបដែលបានអនុវត្តគម្រោងបានលឿនជាងផែនការ ហើយរំពឹងថា នៅអំឡុងបុណ្យចូលឆ្នាំខ្មែរឆ្នាំចខាងមុខ ផ្លូវនេះបានស្ថាបនារួច ដើម្បីអោយភ្ញៀវទេសចរ ក៏ដូចពលរដ្ឋទូទៅអាចធ្វើកំសាន្តរីករាយ មើលទេសភាពស្រស់ត្រកាលនៃជួរភ្នំដងរែក ក៏ដូចជាចូលទស្សនាទីរមណីយដ្ឋានប្រាសាទបូរាណ រមណីយដ្ឋានធម្មជាតិនិងតំបន់អភិវឌ្ឍន៍ថ្មីៗជាមូលដ្ឋានជីវភាព វាលស្រែចម្ការ តាមអតីតតំបន់សមរភូមិនិងងចម្ការមីន អតីតតំបន់ជំរំជនភៀសខ្លួនខ្មែរ អតីតតំបន់ទំនប់ក៥ជាដើម។
ប្រតិភូក៏បានទទួលស្គាល់ការខិតខំប្រឹងប្រែងអនុវត្តនិងគោរពតាមកិច្ចសន្យាសាងសង់និងត្រួតពិនិត្យរបស់ក្រុមហ៊ុនសាងសង់ ក្រុមហ៊ុនទីប្រឹក្សានិងមន្ត្រីផ្នែកគ្រប់គ្រងគម្រោងរបស់ក្រសួងក្នុងការស្ថាបនាផ្លូវ ស្ពាន លូ គ្រោងដាក់បង្គោលសញ្ញា ក៏ដូចគំនូសនិងោនែកនានាដែលសម្រេចបានតាមបទដ្ឋានបច្ចេកទេស ស្តង់ដារ។
ហើយក៏បានកែលម្អចំណុចខ្វះខាតតិចតួចដើម្បីអោយផ្លូវជាតិលេខ៥៨នេះ ធានាការប្រើប្រាសបានយូរអង្វែងនិងឆ្លើយតបសេចក្តីការខាងវិស៏័យសេដ្ឋកិច្ច និងសង្គមកិច្ច ៕ ដោយ ៖ បន្ទាយ
