បាត់ដំបង៖ បងប្អូនដែលនិយមប្រើប្រាស់បណ្តាញសង្គម នៅថ្ងៃទី ១៧ ខែ មិថុនា ឆ្នាំ ២០២០ មានគណនីហ្វេសប៊ុកឈ្មោះ MeyMey បានផុស Poste រូបភាពដែលក្នុងរូបភាពនេះបានថតរូបមនុស្សស្រីចំនួន ២នាក់ ហើយនៅខាងចុងនៃរូបភាពចំនួន ២សន្លឹកនោះ មានរូបភាពដែលម្ចាស់គណនីបានគូរ ជារង្វង់ និងគូសទិសបង្ហាញឱ្យឃើញរូបមន្ត្រីនគរបាលចរាចរណ៍កំពុងឈរបំពេញភារកិច្ចរបស់ខ្លួនស្របតាមការចាត់តាំងនិងជំនាញវិជ្ជាជីវៈនៅលើដងផ្លូវ ។
នៅខាងលើរូបភាពទាំងនេះម្ចាស់គណនីហ្វេសប៊ុកដដែលបានសរសេរជាប្រធានបទចំពោះរូបភាពនេះថា (ទៅមិនទាន់ដល់ផងមានសត្វចម្លែកនៅខាងមុខកាក់ផ្លូវបើបងប្អូនណាចង់មកលេងប្រាសាទបាណន់ប្រយ័ត្នប្រយែងផង) ។ ក្នុងរូបភាពដែលម្ចាស់គណនីបានបង្ហាញនោះគឺពិតជាមន្ត្រីនគរបាលចរាចរណ៍នៃអធិការដ្ឋាននគរបាលស្រុកបាណន់ ដែលលោកកំពុងឈរបំពេញភារកិច្ចស្របតាមតួនាទី និង ការចាត់តាំងរបស់ថ្នាក់ដឹកនាំ ហើយតាមរយៈខ្លឹមសារដែលបានសរសេរដោយម្ចាស់គណនីហ្វេសប៊ុកខាងលើគឺពិតជាមានចេតនា ប្រមាថមាក់ងាយយ៉ាងធ្ងន់ធ្ងរចំពោះមន្ត្រីនគរបាលចរាចរណ៍ដែលលោកកំពុងឈរបំពេញភារកិច្ចនៅទីនោះយ៉ាងពិតប្រាកដ។
ក្នុងនាមថ្នាក់ដឹកនាំស្នងការនៃស្នងការដ្ឋាននគរបាលខេត្តបាត់ដំបង មិនអាចទទួលយកបានឡើយ នូវខ្លឹមសារ បែបប្រមាថមាក់ងាយដល់មន្ត្រីនគរបាលជាតិបែបនេះ ជាមួយនេះស្នើឱ្យម្ចាស់គណនីហ្វេសប៊ុកខាងលើចូលមកបំភ្លឺនៅបរិវេណស្នងការដ្ឋាននគរបាលខេត្តបាត់ដមបងឱ្យបានច្បាស់លាស់ពិតប្រាកដអំពីគោលបំណងនឹងខ្លឹមសារពិតដែលខ្លួនបានសរសេរ ក្នុងករណីម្ចាស់គណនីខាងលើមិនបានចូលខ្លួនមកបំភ្លឺការពិតនោះទេ ស្នងការដ្ឋាននគរបាលខេត្តបាត់ដំបង និងមានវិធានការបន្ត។
ការអនុវត្តរឹតបន្តឹងច្បាប់ស្តីពីចរាចរណ៍ផ្លូវគោកដែលបានចាប់ផ្តើមតាំងពីថ្ងៃទី១ ខែឧសភាឆ្នាំ២០២០រហូតមក មន្ត្រីនគរបាលចរាចរណ៍បានអនុវត្ត ដោយត្រឹមត្រូវស្របតាមតួនាទីនិងភារកិច្ចរបស់ខ្លួនក្រោមការណែនាំរបស់រាជរដ្ឋាភិបាល របស់ក្រសួងមហាផ្ទៃ និងរបស់អគ្គស្នងការដ្ឋាននគរបាលជាតិ រីឯការពង្រឹងរឹតបន្តឹងច្បាប់ចរាចរណ៍ផ្លូវគោកនេះមានបំណងតែមួយគាត់គឺសំដៅការពារឱ្យបាននូវករណីគ្រោះថ្នាក់ចរាចរណ៍ ការពារនូវអាយុជីវិត បងប្អូនដែលប្រើប្រាស់ផ្លូវ ប្រើប្រាស់យានយន្តទាំងអស់ មិនមែនមានហេតុផលដូចការលើកឡើងពីមជ្ឈដ្ឋានអគតិណានោះឡើយ សូមបងប្អូនចូលរួមគោរពច្បាប់ដោយត្រឹមត្រូវទៅនោះ មិនមានទទួលរងនូវការផាកពិន័យអ្វីទាំងអស់ពីមន្ត្រីនគរបាលចរាចរណ៍។
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បានឲ្យដឹងថា នៅរសៀលថ្ងៃទី ១៨ ខែ មិថុនា ឆ្នាំ ២០២០ម្ចាស់គណនីហ្វេសប៊ុកឈ្មោះMeyMeyបានចូលខ្លួនមកបំភ្លឺជុំវិញការសរសេរខ្លឹមសារបង្ហោះដោយភ្ជាប់រូបភាពមន្ត្រីនគរបាលចរាចរណ៍ក្នុងកណីហ្វេសប៊ុករបស់ខ្លួនកាលពីថ្ងៃទី១៦ខែមិថុនាឆ្នាំ២០២០នោះហើយ។
នៅចំពោះមុខការសាកសួរបំភ្លឺនេះ ម្ចាស់គណនីខាងលើដែលមាន ឈ្មោះពិតថា ហេង រស្មី ភេទស្រី អាយុ៤៣ឆ្នាំ រស់នៅក្នុងសង្កាត់ចំការសំរោង ក្រុងបាត់ដំបង បានសារភាពទទួលស្គាល់កំហុសថា គាត់ពិតជាបានសរសេរខ្លឹមសារថា(ទៅមិនទាន់ដល់ផងមានសត្វចម្លែកនៅខាងមុខកាក់ផ្លូវបើបងប្អូនណាចង់មកលេងប្រាសាទបាណន់ប្រយ័ត្នប្រយ៉ែងផង)។ ការសរសេរខ្លឹមសារនេះគាត់មានចេតនាសរសេរសំដៅចំពោះមន្ត្រីនគរបាលចរាចរណ៍ដែលកំពុងឈរបំពេញភារកិច្ចតាមដងផ្លូវនោះថា(ជាសត្វចម្លែក) ប្រាកដមែន ។
ការសរសេរខ្លឹមសារបែបនេះគាត់បញ្ជាក់ថា ជាការសរសេរលេងសេីចតែប៉ុណ្ណោះ។ ប៉ុន្តែអ្វីដែលបានកេីតឡេីងនៅពេលនោះគឺរូបគាត់និងមិត្តភក្តិម្នាក់ទៀតជិះម៉ូតូទៅលេងប្រាសាទបាណន់ ហេីយក្នុងចំណោមគ្នាគាត់ពីរនាក់នេះគឺរូបគាត់(មិនមានពាក់មួកសុវត្ថិភាព)ទេ ហេីយការធ្វេីដំណេីររបស់គាត់នៅពេលនោះក៏មិនត្រូវបានសមត្ថកិច្ចនគរបាលចរាចរណ៍ធ្វេីការផាកពិន័យចំពោះគាត់ឡេីយ ប៉ុន្តែចុងក្រោយត្រូវបានរូបគាត់ថតរូបភាពភ្ជាប់ជាមួយមន្ត្រីនគរបាលចរាចរណ៍នៅខាងក្រោយរួចសរសេរបង្ហោះដោយមានខ្លឹមសារបែបនេះតែម្តង។
នៅពេលសាកសួររួចម្ចាស់គណនីហ្វេសប៊ុកនេះបានទទួលស្គាល់កំហុសដែលគាត់បានធ្វើ ជាមួយនេះដែរគាត់បានធ្វេីលិខិតសុំការអភ័យទោសចំពោះកំហុសឆ្គងរបស់គាត់ដែលបានប្រព្រឹត្តមិនគប្បីចំពោះកងកម្លាំងនគរបាលជាតិទូទៅពិសេសនគរបាលចរាចរណ៍ម្យ៉ាងវិញទៀតគាត់បានអំពាវនាវសូមកុំឱ្យបងបង្អូនប្រជាពលរដ្ឋកុំយកគំរូតាមគាត់ឱ្យសោះ ហេីយសូមចូលរួមគោរពច្បាប់ចរាចរណ៍ផ្លូវគោកទាំងអស់គ្នា។
ទោះជាយ៉ាងណាក៏ដោយ សិទ្ធិក្នុងការសម្រេចចំពោះចំណាត់ការលើករណីនេះ ថ្នាក់ដឹកនាំស្នងការដ្ឋាននឹងពិនិត្យពិចារណាសម្រេចនៅពេលបន្ទាប់ ។ សូមសាធារណជន បន្តចូលរួម សហការជាមួយសមត្ថកិច្ចនគរបាលនិងចូលរួមគោរពច្បាប់ចរាចរណ៍ឱ្យបានត្រឹមត្រូវនិងខ្ជាប់ខ្ជួនទាំងអស់គ្នាដោយសេចក្តីគោរពបំផុត៕ ដោយ៖កូឡាប
