ភ្នំពេញ ៖ កម្ពុជាជាប្រទេសកសិកម្ម តាំងពីយូយារណាស់មកហើយ នៅក្នុងតំបន់អាស៊ីអាគ្នេយ៍ ដែលមានពលរដ្ឋខ្មែរ ប្រមាណ៨០% ប្រកបរបរកសិកម្មនេះ។ ប៉ុន្តែដោយសារបច្ចេកវិទ្យា និងការប្រើប្រាស់គ្រឿងយន្តច្រើនឡើង ធ្វើឲ្យកម្លាំងពលកម្មក្នុងវិស័យនេះ បន្តធ្លាក់ចុះជាបន្តបន្ទាប់។
យោងតាមស្ថិតិ ដែលបង្ហាញដោយមន្ត្រីក្រសួងកសិកម្ម នៅឆ្នាំ២០០៧ កម្លាំងពលកម្មកសិកម្មកម្ពុជា ធ្លាក់ចុះមកនៅត្រឹម ៦០% ហើយនៅឆ្នាំ២០១៧ គឺធ្លាក់ចុះមកនៅត្រឹម ៤២% និងនៅឆ្នាំ២០២០នេះ កម្លាំងពលកម្មក្នុងវិស័យកសិកម្ម ធ្លាក់ចុះមកនៅត្រឹម៣០%។
ក្នុងសន្និសីទសារព័ត៌មាន ស្តីពីសក្តានុពលនាំចេញកសិផលកម្ពុជា ទៅកាន់ទីផ្សារអន្តរជាតិ ឯកឧត្តម ងិន ឆាយ ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានកសិកម្ម បានឲ្យដឹងថា បច្ចុប្បន្ននេះ កម្លាំងពលកម្ម របស់ប្រជាជនកម្ពុជា ដែលបម្រើឲ្យវិស័យកសិកម្ម មានការធ្លាក់ចុះ មកនៅត្រឹមជាង ៣០ភាគរយប៉ុណ្ណោះ ដោយសារតែការរីកចម្រើន និងភាពសម្បូរបែបនៃគ្រឿងយន្តកសិកម្ម។
ការប្រើប្រាស់កម្លាំងគោ-ក្របី នៅក្នុងវិស័យកសិកម្ម បានធ្លាក់ចុះ ខណៈការភ្ជួររាស់ដាំដុះដំណាំស្រូវរដូវវស្សា ដោយគ្រឿងយន្តកសិកម្ម មានរហូតដល់ជាង ៩៦%។
គួរជម្រាបថា ក្នុងឆ្នាំ២០១៩ កន្លងទៅ ការនាំចេញផលិតផលដំណាំកសិកម្មផ្លូវការ សម្រេចបានចំនួនជាង៤,៨៧លានតោន កើនឡើង១៣,២០% ធៀបនឹងការនាំចេញ សម្រេចបានក្នុងឆ្នាំ២០១៨។ ការនាំចេញផលិតផលសំខាន់ៗ រួមមាន៖ អង្ករ, ចំណិតដំឡូងមីក្រៀម , ដំឡូងមីស្រស់ , ម្ស៉ៅដំឡូងមី, គ្រាប់ស្វាយចន្ទី, ផ្លែចេកស្រស់, គ្រាប់ពោត, សណ្តែកបាយ, សណ្តែកសៀង, ម្ទេសស្រស់, ម្រេច , ផ្លែស្វាយស្រស់ និងដំណាប់ស្វាយជាដើម៕
ដោយ៖CEN
