ភ្នំពេញ៖ មជ្ឈមណ្ឌលសិទ្ធិមនុស្សកម្ពុជា បានឲ្យដឹងថា នៅថ្ងៃទី១៩ ខែមិថុនា ឆ្នាំ២០២០ នេះសាលាដំបូងរាជធានីភ្នំពេញបានសម្រេចផ្ដន្ទាទោសយុវជន គង់ រ៉ៃយ៉ា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទការមិនរាងចាលក្នុងបទមជ្ឈិមបន្ទាប់ពីការផ្ដន្ទាទោសបទមជ្ឈិម តាមមាត្រា៤៩៤ មាត្រា ៤៩៥ និង មាត្រា៨៨ នៃក្រមព្រហ្មទណ្ឌកម្ពុជា។
លោក រ៉ៃយ៉ា ត្រូវបានកាត់ទោសឱ្យជាប់ពន្ធនាគាររយៈពេលពីរឆ្នាំ ដោយអនុវត្តទោសរយៈពេល ៤ ខែ ១៨ ថ្ងៃ ជារយៈពេលដែលលោកបានជាប់ឃុំបណ្ដោះអាសន្នរួចហើយនោះ ចំណែកទោសដែលនៅសល់ត្រូវព្យួរ។ បន្ថែមពីលើទោសពន្ធនាគារ សម្ភាររបស់លោក រ៉ៃយ៉ា ដែលត្រូវបានរឹបអូសរួមមានអាវយឺត សៀវភៅ និងទូរស័ទ្ទដៃ ត្រូវដាក់ចូលជាសម្បត្តិរដ្ឋ។
លោក គង់ រ៉ៃយ៉ា ត្រូវបានចាប់ខ្លួនកាលពីខែកក្កដា ឆ្នាំ២០១៩ បន្ទាប់ពីធ្វើការផ្សព្វផ្សាយលក់អាវយឺតដែលមានរូបភាពនិងសាររបស់អ្នកវិភាគ លោកបណ្ឌិត កែម ឡី។
លោក រ៉ៃយ៉ា ក៏បានបង្ហោះលេខទូរស័ព្ទអ្នកបើកតាក់ស៊ីដែលអាចដឹកអ្នកដំណើរទៅកាន់រាជធានីភ្នំពេញដើម្បីចូលរួមពិធីបុណ្យរំលឹកខួបនៃការស្លាប់របស់លោកបណ្ឌិត កែម ឡី ផងដែរ។ លោកត្រូវបានដោះលែងឱ្យនៅក្រៅឃុំបណ្ដោះអាសន្នកាលពីថ្ងៃទី២៩ ខែវិច្ឆិកា ឆ្នាំ២០១៩ ៕ ដោយ៖កូឡាប