សហរដ្ឋអាមេរិចកាលពីថ្ងៃសុក្រ បានធ្វើការបដិសេធសំណើរ របស់ក្រុមហ៊ុនអាកាសចរណ៍ចិន សុំឲ្យមានជើងហោះហើរប្រចាំសប្តាហ៍បន្ថែមទៀត រវាងប្រទេសទាំងពីរ។ អាមេរិចនិយាយថា សេចក្តីសម្រេចចិត្តនោះ មិនមែនមានន័យថាជាការបង្កើនភាពតានតឹង ជុំវិញការរឹតត្បិតការធ្វើដំណើរឡើយ។
នៅក្នុងសេចក្តីប្រកាស ក្រសួងដឹកជញ្ជូនអាមេរិចនិយាយថា ការសម្រេចចិត្តនោះ គឺដើម្បីរក្សាភាពស្មើគ្នានៅក្នុងកាលវិភាគ សេវាដឹកអ្នកដំណើររវាងប្រទេសទាំងពីរ។ ក្រសួងបន្ថែមថា ខ្លួនមានឆន្ទៈក្នុងការពិនិត្យមើលឡើងវិញ នូវសេចក្តីសម្រេចចិត្តនោះ ប្រសិនជាអាជ្ញាធរអាកាសចរណ៍ចិន កែសម្រួលគោលនយោបាយរបស់ពួកគេ ដែលបានប៉ះពាល់ដល់ក្រុមហ៊ុនរបស់អាមេរិច។
“ក្រសួងបានបញ្ជាក់ទៅខាងភាគីចិនថា ការសម្រេចចិត្តគឺជាបញ្ហានិតិវិធីតែប៉ុណ្ណោះ ហើយវាមិនគួរត្រូវបានចាត់ទុកថា ជាការបង្កើនភាពតានតឹងលើភាគីទាំងសងខាងឡើយ”។
កាលពីដើមសប្តាហ៍នេះ សហរដ្ឋអាមេរិច និងចិនបាននិយាយថា ពួកគេនឹងអនុញ្ញាតឲ្យមានជើងហោះហើរប្រចាំសប្តាហ៍ចំនួន ៤រវាងប្រទេសទាំងពីរ។
សូមបញ្ជាក់ថា កាលពីថ្ងៃទី ១៦ខែមិថុនានេះ អាមេរិចបានគំរាមឈប់ឲ្យមានជើងហោះហើរចិនទាំងអស់ ដោយសារតែការទប់ស្កាត់របស់ក្រុងប៉េកាំង លើក្រុមហ៊ុនអាកាសចរណ៍អាមេរិច ចំពេលប្រទេសទាំងពីរកំពុងមានភាពតានតឹង ហើយវាធ្វើឲ្យមានការព្រួយបារម្ភ ពីជើងហោះហើររបស់ក្រុមហ៊ុនចិនដែលចង់ហោះហើរ។
ក្រុមហ៊ុនអាកាសចរណ៍អាមេរិច ដូចជា Delta Air Lines និង United Airlines បានស្វែងរកការចាប់ផ្តើមសេវាកម្មដឹកអ្នកដំណើរទៅចិនកាលពីខែមិថុនា ប៉ុន្តែបានផ្លាស់ប្តូរគម្រោងពួកគេ ដោយសារតែមិនមានការអនុម័តពីរដ្ឋាភិបាល៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
