ភ្នំពេញ៖ ឯកឧត្តម ឃួង ស្រេង បានថ្លែងថា បងប្អូនអ្នករើសអេតចាយនៅទីលានចាក់សំរាម បានប្រកបការរកស៊ីដោយសុច្ចរិតទៀងត្រង់ មិនប្រព្រឹត្តនូវបទល្មើស លួច ឆក់ ប្លន់ដែលជាបទល្មើសមួយខុសច្បាប់ឡើយ។
នេះពិតជាបានបង្ហាញឲ្យឃើញថា បងប្អូនជាប្រជាពលរដ្ឋល្អរស់នៅក្នុងសង្គមដ៏ត្រឹមត្រូវមួយ។
ឯកឧត្តម បានបញ្ជាក់ថា “នាព្រឹកនេះ ខ្ញុំ និងភរិយា ព្រមទាំងឯកឧត្ដម លោកជំទាវ លោក លោកស្រីដែលជាថ្នាក់ដឹកនាំសាខាកាកបាទក្រហមកម្ពុជារាជធានីភ្នំពេញ អនុសាខាកាកបាទក្រហមកម្ពុជាតាមបណ្ដាខណ្ឌទាំង១៤ បានចុះសួរសុខទុក្ខសំណេះសំណាល ព្រមទាំងបាននាំយកអំណោយដ៏ថ្លៃថ្លារបស់សម្ដេចអគ្គមហាសេនា បតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនអ្នករើសសំរាម ( អេតចាយ ) ចំនួន៣៩៤គ្រួសារ ក្នុងទីលានចាក់សំរាមដង្កោ ដើម្បីរួមចំណែក និងកាត់បន្ថយការចំណាយក្នុងជីវភាពគ្រួសារ បានមួយចំណែករបស់បងប្អូនអ្នករើសសំរាម ( អេតចាយ )ក្នុងទីលានចាក់សំរាមដង្កោ” ។
ឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមរាជធានីភ្នំពេញ និងជាអភិបាល នៃគណៈអភិបាលរាជធានីភ្នំពេញ បានសម្ដែងនូវការកោតសរសើរ ចំពោះបងប្អូនប្រជាពលរដ្ឋដែលប្រកបមុខរបរ រើសអេតចាយនៅទីលានចាក់សំរាមខណ្ឌដង្កោ ដែលបានប្រឹងប្រែងរស់នៅ ដោយការរើសអេតចាយ នៅទីលានចាក់សំរាម ដើម្បីចិញ្ចឹមជីវិត ដោយមិនបានប្រព្រឹត្តបទល្មើសដែលខុសនឹងច្បាប់ បើទោះបីបងប្អូនមានការពិបាកក្នុងជីវភាពគ្រួសារយ៉ាងណាក្តី ។
ឯកឧត្តមឃួង ស្រេង បានបញ្ជាក់ទៀតថា ស្ថិរភាពនៅក្នុងសង្គម គឺផ្ដើមឡើងពីប្រជាពលរដ្ឋយើងទាំងអស់គ្នាចូលរួម បើប្រជាពលរដ្ឋមិនបានចូលរួម ក្នុងការរក្សាស្ថិរភាពសង្គមទេ សង្គមរបស់យើង ក៏មិនមានស្ថិរភាពល្អបានដែរ។
ឯកឧត្តម ឃួង ស្រេង ក៏បានណែនាំដល់ប្រជាពលរដ្ឋ ដែលប្រកបមុខរបរ រើសអេតចាយ នៅទីលានចាក់សំរាមខណ្ឌដង្កោទាំងអស់ ក្រោយបញ្ចប់ជំងឺកូវីដ១៩ បងប្អូនត្រូវជំរុញកូនចៅឲ្យទៅសិក្សារៀនសូត្រ នៅតាមសាលានានា ដោយហេតុថាកូនចៅរបស់បងប្អូននេះហើយ ជាទំពាំងស្នងឫស្សីសម្រាប់សង្គមជាតិរបស់យើង។ ដូច្នេះត្រូវតែជំរុញការបណ្ដុះបណ្ដាលពួកគាត់ ឲ្យមានចំណេះដឹងបានខ្ពង់ខ្ពស់៕ ដោយ៖កូឡាប
