ភ្នំពេញ៖ រាជរដ្ឋាភិបាល បានសម្រេចប្រកាសឱ្យអនុវត្តវិធានការជុំទី ៤ ដើម្បីបន្តគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចជាតិ ក្នុងការស្តារ និងជំរុញកំណើនសេដ្ឋកិច្ចកម្ពុជា ក្រោយពីវិបត្តិនៃជំងឺកូវីដ-១៩ ដោយក្នុងវិធានការនោះ សម្តេចតេជោ ហ៊ុន សែន នាយករដ្ឋមន្ត្រី បានសម្រេចបង្កើនថវិកាសម្រាប់អនុវត្តគម្រោងសាច់ប្រាក់ពលកម្ម ក្នុងឆ្នាំ ២០២០ ពី១៥០ ពាន់លានរៀល ដល់ ៤១០ ពាន់លានរៀល។
តាមផែនការថ្មីនេះ ក្នុងឆ្នាំ២០២០ គម្រោងនេះ មានសមត្ថភាពស្រូប យកពលកម្ម ដែលបាត់បង់រយៈ ពេលខ្លីបានចំនួន ៨៩០ ០០០ នាក់ កសាងផ្លូវលំ បានចំនួន ២ ២៥៥ គីឡូម៉ែត្រ ប្រឡាយជើងក្អែបបានចំនួន ២ ៣៨៤ គីឡូម៉ែត្រ និងភ្ជាប់បណ្តាញអគ្គិសនីដល់ស្ថានីយបូមទឹកកសិកម្មបានចំនួន ៤៥ ។ ប្រជាពលរដ្ឋ ដែលទទួលផលពីហេដ្ឋារចនាសម្ព័ន្ធទាំងនេះ មានចំនួន ៩៥៧ ០០០ គ្រួសារ ។
ក្នុងឱកាសជួបជាមួយប្រជាពលករ កសិករ និងប្រជាជនជាអ្នកទទួលផលពីគម្រោងសាច់ប្រាក់ពលកម្ម ឯកឧត្តម អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា ឈរលើមូលដ្ឋាននៃសមិទ្ធផលជោគជ័យ ក្នុងជំហានទី ១ កាលពីដើមខែមីនា ឆ្នាំ ២០២០ រាជរដ្ឋាភិបាលបានសម្រេចដាក់ឱ្យអនុវត្ត “គម្រោងសាច់ប្រាក់ពលកម្ម ជំហាន ២ សម្រាប់ឆ្នាំ ២០២០ ដល់ ២០២២” ដោយបន្ថែមការងារស្តារ និងអភិរក្សធនធានធម្មជាតិ រួមមាន បឹងបួរ អាងស្តុកទឹក និងស្រះស្រោចស្រពដំណាំកសិកម្ម ព្រមទាំងពង្រីកវិសាលភាពគ្រប់ដណ្តប់លើខេត្តសរុបចំនួន១៨។
បើតាម ឯកឧត្តមឧបនាយករដ្ឋមន្ត្រី ខេត្តជាគោលដៅនៃគម្រោងជំហានទី ១ គឺទាំង១២ ខេត្ត និងពង្រីកបន្ថែមខេត្តថ្មីចំនួន ៦ ទៀត ព្រមទាំងបានគ្រោងថវិកាសរុបចំនួន ៤៥១ ពាន់លានរៀល សម្រាប់រយៈពេល ៣ ឆ្នាំ ក្នុងនោះ ឆ្នាំ ២០២០ គ្រោង ថវិកា ចំនួន ១៥០ ពាន់លានរៀល។
គម្រោងសាច់ប្រាក់ពលកម្មសម្រាប់អភិវឌ្ឍន៍ហេដ្ឋារចនាសម្ព័ន្ធជនបទ និងការគាំទ្រកសិករ មានគោលដៅចូលរួមកាត់បន្ថយភាពក្រីក្រ លើកកម្ពស់ជីវភាព និងសុខុមាលភាពអ្នកជនបទ និងប្រជាកសិករក្រីក្រ តាមរយៈ ការបង្កើតឱកាសការងាររយៈពេលខ្លីតាមកម្មវិធីសាច់ប្រាក់ពលកម្ម បង្កើតជាទុនបន្តលើរបរកសិកម្ម ឬ ផ្សេងទៀត និងការអភិវឌ្ឍហេដ្ឋារចនាសម្ព័ន្ធកសិកម្ម និងជនបទ មាន ផ្លូវលំ ប្រឡាយជើងក្អែប សម្រាប់បង្ហូរទឹកចូលស្រែ និងការតភ្ជាប់បណ្តាញអគ្គិសនីតម្លៃទាបឲ្យដល់ស្ថានីយបូមទឹកកសិកម្ម។
សូមបញ្ជាក់ថា គម្រោងកម្មវិធីសាច់ប្រាក់ពលកម្មដែលត្រូវបាន និងកំពុងអនុវត្ត ក្រោមការគិតគូរ និងដឹកនាំផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រី ពិតជាមានសារសំខាន់ ណាស់សម្រាប់សេដ្ឋកិច្ច-សង្គមបច្ចុប្បន្នរបស់កម្ពុជា ជាពិសេស ក្នុងបរិកាសដែលពិភពលោកទាំងមូល កំពុងស្ថិតក្នុងវិបត្តិជំងឺកូវីដ ១៩។
គម្រោងនេះ មិនត្រឹមតែជាជំនួយអន្តរាគមន៍សង្គម ដែលនឹងជួយបង្កើតការងាររយៈពេលខ្លីប៉ុណ្ណោះ ទេ តែថែមទាំងសម្រាប់ប្រជាជនក្រីក្រតាមមូលដ្ឋានស្រូបយកពលកម្ម ដែលបាត់បង់ការងារពីរោងចក្រ-សហគ្រាស និងដែលបានវិលត្រឡប់ពីបរទេសមកស្រុកកំណើតវិញ ក៏ដូចជា ជួយបង្កើតសមិទ្ធផលសេដ្ឋកិច្ច-សង្គម ជាហេដ្ឋារចនា- សម្ព័ន្ធ ផ្លូវលំ ប្រឡាយធារាសាស្ត្រនៅតាមមូលដ្ឋានសម្រាប់ទ្រទ្រង់ និងលើកកម្ពស់សេដ្ឋកិច្ចមូលដ្ឋានផ្ទាល់តែម្តង៕
ដោយ៖CEN
