ភ្នំពេញ៖ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា ការចិញ្ចឹមជ្រូកនៅក្នុងស្រុកសព្វថ្ងៃអាចផ្គត់ផ្គង់ទីផ្សារ បានជាមធ្យមប្រមាណ ៥០០០ទៅ ៦០០០ក្បាល ក្នុងមួយថ្ងៃ ខណៈតម្រូវការទីផ្សារទាំងមូល មានចន្លោះពី ៨០០០ទៅ ៩០០០ក្បាល ក្នុងមួយថ្ងៃ។
ប្រធានសមាគមអ្នកចិញ្ចឹមសត្វកម្ពុជារូបនេះបានអះអាងថា ការចិញ្ចឹមជ្រូកក្នុងស្រុក នឹងអាចផ្គត់ផ្គង់ទីផ្សារបាន ក្នុងរយៈពេល ២ទៅ ៣ឆ្នាំទៀត។ ការដាក់ចេញវិធានការកាត់បន្ថយការនាំចូលសត្វជ្រូកពីក្រៅប្រទេស របស់ក្រសួងកសិកម្ម នៅក្នុងអំឡុងពេលកម្ពុជា ក៏ដូចជាពិភពលោកកំពុងប្រយុទ្ធប្រឆាំងនឹងជំងឺកូវីដ-១៩ កំពុងតម្រង់ទិសដល់អ្នកចិញ្ចឹមសត្វក្នុងស្រុកបង្កើនការចិញ្ចឹម ដែលរំពឹងថា នឹងអាចធានាការផ្គត់ផ្គង់ដោយខ្លួនឯងបាន ក្នុងរយៈពេល ២ ទៅ ៣ឆ្នាំខាងមុខ។
លោកថ្លែងថា បច្ចុប្បន្នកម្ពុជា នាំចូលជ្រូកពីប្រទេសថៃ តែមួយប៉ុណ្ណោះ ក្នុងពេលប្រទេសវៀតណាម កំពុងខ្វះខាត ជាងប្រទេសកម្ពុជាទៅទៀត។ ដូច្នេះហើយ ជាហេតុធ្វើឱ្យតម្លៃជ្រូករស់នៅលើទីផ្សារហក់ឡើងយ៉ាងឆាប់រហ័ស។ ប៉ុន្តែលោកជឿថា តម្លៃជ្រូកនឹងធ្លាក់ថ្លៃទៅវិញ នៅពេលបញ្ចប់វិបត្តិជំងឺកូវីដ-១៩។
ប្រធានសមាគមអ្នកចិញ្ចឹមជ្រូកកម្ពុជា បារម្ភថា នៅក្រោយវិបត្តិជំងឺកូវីដ-១៩ ឧស្សាហកម្មចិញ្ចឹមជ្រូកវៀតណាម នឹងងើបឡើងវិញ ហើយការហូរចូលជ្រូកខុសច្បាប់មកកម្ពុជា អាចនឹងកើតឡើងជាថ្មី ដែលវានឹងសម្លាប់អាជីវកម្មចិញ្ចឹមជ្រូកក្នុងស្រុក ដែលកំពុងបង្កើនទុន និងខ្ចីទុនពីគ្រឹះស្ថានហិរញ្ញវត្ថុនានា។
លោក ស្រ៊ុន ពៅ ស្នើឱ្យក្រសួងកសិកម្ម បន្តអនុវត្តវិធានការបែបនេះ ក្នុងរយៈពេលយូរអង្វែង។ លោក បង្ហាញការគាំទ្រចំពោះក្រសួងកសិកម្ម ដែលកំណត់តម្លៃជ្រូករស់នៅក្នុងទីផ្សារបច្ចុប្បន្នក្នុងចន្លោះពី ១២០០០ ទៅ ១៣០០០រៀល ក្នុងមួយគីឡូក្រាម។ ប៉ុន្តែអ្វីដែល នៅតែជាបន្ទុកសម្រាប់ប្រជាពលរដ្ឋអ្នកបរិភោគសាច់ជ្រូកនោះ គឺតម្លៃសាច់ជ្រូកនៅលើទីផ្សារ នៅតែមានតម្លៃខ្ពស់ បានឡើងថ្លៃហើយ មិនចុះមកវិញឡើយ។ សព្វថ្ងៃសាច់ជ្រូក ១គីឡូក្រាមថ្លៃប្រហែល ២៥០០០រៀល។
គួរបញ្ជាក់ថា សត្វជ្រូកសរុប ដែលកំពុងចិញ្ចឹមនៅកម្ពុជា មានចំនួន ២,៣លានក្បាល។ បើតាមសមាគមអ្នកចិញ្ចឹមសត្វកម្ពុជា ក្នុងមួយឆ្នាំ កម្ពុជា បានចំណាយនាំចូលជ្រូកពីបរទេសប្រមាណ ៤០០លានដុល្លារ ហើយបើគិតទាំងមាន់ ទា និងបន្លែ កម្ពុជាត្រូវចំណាយជិត ១ពាន់លានដុល្លារ៕
ដោយ៖CEN
