ឥណ្ឌា៖នៅក្នុងដំណើរទស្សនកិច្ចផ្លូវការរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី២៧ ខែមករា ឆ្នាំ២០១៨ នេះ សម្ដេចតេជោ នាយករដ្ឋមន្ត្រី និងលោក Narendra Modi នាយករដ្ឋមន្ត្រីនៃសាធារណរដ្ឋឥណ្ឌាបានអញ្ជើញជាអធិបតីនៅក្នុងពិធីចុះហត្ថលេខាលើកិច្ចព្រមព្រៀងចំនួន៤ រួមមាន ១) អនុស្សារណៈនៃការយោគយល់គ្នាស្តីពីការទប់ស្កាត់ ការជួញដូរមនុស្ស ២)សន្ធិសញ្ញាស្តីពី ការជួយគ្នាទៅវិញទៅមកផ្នែកច្បាប់លើបញ្ហាព្រហ្មទណ្ឌ ៣)កម្មវិធីផ្លាស់ប្តូរវប្បធម៌ និងទី៤) កិច្ចព្រមព្រៀងឥណទានសម្បទានចំនួន ៣៦,៩២ លានដុល្លារអាមេរិកសម្រាប់គម្រោង អភិវឌ្ឍន៍ធនធានទឹកស្ទឹងស្វាហាប់។ បន្ទាប់ពីអញ្ជើញជាអធិបតីនៅក្នុងពិធីចុះហត្ថលេខារួចមក សម្ដេចតេជោ នាយករដ្ឋមន្ត្រី និង ឯកឧត្ដម នាយករដ្ឋមន្ត្រីសាធារណរដ្ឋឥណ្ឌា បានអញ្ជើញប្រកាសព័ត៌មានរួម នៃដំណើរទស្សនកិច្ចផ្លូវការរបស់ សម្ដេចតេជោ (សូមភ្ជាប់ជូន សេចក្ដីថ្លែងការរួម របស់ក្រសួងការបរទេស) ។
នៅព្រឹកថ្ងៃទី២៧ ខែមករា ឆ្នាំ២០១៨ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញបំពេញទស្សនកិច្ចផ្លូវការនៅសាធារណរដ្ឋឥណ្ឌា។
សម្ដេចតេជោនាយករដ្ឋមន្ត្រី ត្រូវបានទទួលគារវកិច្ចស្វាគមន៍យ៉ាងកក់ក្តៅ និងស្និទ្ធស្នាលរាក់ទាក់បំផុតពីសំណាក់លោកនាយករដ្ឋមន្ត្រីឥណ្ឌា Narendra Modi រួមទាំង មន្ត្រីថ្នាក់ដឹកនាំជាន់ខ្ពស់នៃរដ្ឋាភិបាលឥណ្ឌាជាច្រើនរូបទៀត។
នេះគឺជាលើកទី៤ហើយនៃដំណើរទស្សនកិច្ចផ្លូវការរបស់ សម្ដេចតេជោនាយករដ្ឋមន្ត្រី មកកាន់សាធារណរដ្ឋឥណ្ឌា។ កន្លងទៅទស្សនកិច្ចលើកទី១គឺនៅឆ្នាំ១៩៨១, លើកទី២ នៅថ្ងៃទី១៧-១៩ កុម្ភះ ឆ្នាំ២០០០ និងលើកទី៣ គឺនៅថ្ងៃទី០៧-៩ ខែធ្នូ ឆ្នាំ២០០៧ ។
កម្ពុជា និងឥណ្ឌាបានបង្កើតទំនាក់ទំនងការទូតចាប់តាំងពីថ្ងៃទី៣០ ឧសភា ឆ្នាំ១៩៥២ មកម្ល៉េះ ប៉ុន្តែជាអកុសលគឺនៅឆ្នាំ១៩៧៥ ប្រទេសយើងត្រូវបានបំផ្លេចបំផ្លាញដោយរបបប្រល័យពូជសាសន៍ប៉ុលពត ហើយទំនាក់ទំនងការទូតក៏ត្រូវបានកាត់ផ្ដាច់។ រហូតមកដល់ឆ្នាំ១៩៨១ កម្ពុជា និងឥណ្ឌា ត្រូវបានតភ្ជាប់ទំនាក់ទំនងការទូតឡើងវិញ ហើយពេលនោះគឺជាឆ្នាំនៃដំណើរទស្សនកិច្ចផ្លូវការដំបូងបង្អស់របស់ សម្ដេចតេជោ ហ៊ុន សែន នាយករដ្ឋមន្ត្រី ទៅកាន់ប្រទេសឥណ្ឌាផងដែរ។
បន្ទាប់ពីបានអញ្ជើញបំពេញទស្សនកិច្ចផ្លូវការនៅសាធារណរដ្ឋឥណ្ឌា រួចហើយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបន្តអញ្ជើញដាក់កម្រងផ្កាស្កូបរំលឹកវិញ្ញាណខ័ន្ទ លោក មហាត្មៈ គន្ធី ដែលជាអតីតវិរៈបុរសរបស់ប្រជាជនឥណ្ឌា ដែលបានទាមទារសេរីភាព និងឯករាជ្យជូនប្រជាជាតិឥណ្ឌាទាំងមូលពីអាណានិគមអង់គ្លេស។
តាមកម្មវិធីដែលបានគ្រោងទុក បន្ទាប់ពីអញ្ជើញដាក់កម្រងផ្កា ស្កូបរំលឹកវិញ្ញាណខ័ន្ទ លោក មហាត្មៈ គន្ធី រួចសម្ដេចតេជោ នាយករដ្ឋមន្ត្រីនឹង ជួបប្រជុំទ្វេភាគីជាមួយរដ្ឋម្ត្រីការបរទេសឥណ្ឌា កិច្ចប្រជុំទ្វេភាគី ជំនួបសម្ដែងការគួរសមជាមួយអនុប្រធានាធិបតីឥណ្ឌា ជំនួបសម្ដែងការគួរសមជាមួយប្រធានាធិបតីឥណ្ឌា និងកម្មវិធីចុងក្រោយគឺជាវេទិកាធុរកិច្ចកម្ពុជា-ឥណ្ឌា។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញជួបពិភាក្សាទ្វេភាគី ជាមួយ លោកNarendra Modi នាយករដ្ឋមន្ត្រីឥណ្ឌា នៅវិមានរដ្ឋាភិបាល ទីក្រុង New Delhi ប្រទេសឥណ្ឌា។
សម្តេចតេជោ ហ៊ុន សែន នាយករដ្ឋមន្ត្រី បានមានប្រសាសន៍ថ្លែងអំណរសាទរយ៉ាងកក់ក្តៅជូនចំពោះលោកនាយករដ្ឋមន្ត្រី និងប្រជាជនឥណ្ឌា ដែលបានរៀបចំកិច្ចប្រជុំកិច្ចប្រជុំកំពូលរំលឹកខួបអនុស្សាវរីយ៍ អាស៊ាន-ឥណ្ឌា ប្រកបជោគជ័យ និងការរៀបចំយ៉ាងអធិកអធមនូវខួបលើកទី ៦៩ នៃទិវាសាធារណរដ្ឋឥណ្ឌា ។ សម្ដេចតេជោ បានជម្រាបផងដែរថានេះជាលើកទី៤ ហើយនៃដំណើរទស្សនកិច្ចរបស់ សម្ដេចមកកាន់ប្រទេសឥណ្ឌា។ ប៉ុន្តែតាមពិតសម្តេចតេជោបានអញ្ជើញមកឥណ្ឌាចំនួនជាង២០លើកមកហើយ។ សម្ដេចតេជោ ជឿជាក់ថាទស្សនកិច្ចរបស់សម្ដេចនៅពេលនេះ នឹងរួមចំណែកជំរុញទំនាក់ទំនងជាប្រពៃណីររវាងប្រទេសយើងទាំងពីរឲ្យឈានឡើងមួយកំរិតធំទៀត។
សម្ដេចតេជោ បានថ្លែងអំណរគុណចំពោះមិត្តភាពល្អរបស់ឥណ្ឌា ដែលបានចូលរួមចំណែកក្នុងការអភិវឌ្ឍប្រទេសកម្ពុជា តាមរយៈការផ្តល់ឥណទាន និង ហិរញ្ញប្បទានឥតសំណងនាពេលកន្លងមក ហើយក៏ដូចជាការផ្តល់ហិរញ្ញប្បទានសម្បទានដល់គម្រោងអភិវឌ្ឍន៍ធនធានទឹកស្ទឹងស្វាហាប់ និង ការបញ្ចប់នាពេលខ្លីខាងមុខ នូវគម្រោងសាងសង់ខ្សែបណ្តាញថាមពលអគ្គិសនីតង់ស្យុងខ្ពស់ ២៣០ KV ពីស្រុកសួង ខេត្តត្បូងឃ្មុំ ទៅស្រុក ស្វាយអន្ទរ ខេត្តព្រៃវែង រួមទាំងការផ្តល់អណ្តូងស្នប់ចំនួន ១,៥០០ អណ្តូង ដើម្បីកែលំអរជីវភាពរស់នៅរបស់ប្រជាជនតាមជនបទ និងការកាត់បន្ថយភាពក្រីក្រ និងជំនួយឥតសំណងចំនួន ១,៧ លានដុល្លារ ដើម្បីសិក្សាធនធានទឹកក្រោមដីនៅស្រុកបរសេដ្ឋ និងគងពិសី ខេត្តកំពង់ស្ពឺ(២០១៤-២០១៨)។ លើសពីនេះ ដោយមើលឃើញថា គម្រោងផ្ដល់អណ្ដូងទឹកស្អាតនេះដំណើរការបានល្អ សម្ដេចតេជោ ស្នើឥណ្ឌាពិនិត្យលទ្ធភាពផ្តល់ជំនួយឥតសំណងសម្រាប់ពង្រីកគម្រោងសិក្សាធនធានទឹកក្រោមដី ទៅក្នុងស្រុកចំនួន ៤ ទៀត ក្នុង
ខេត្តកំពង់ស្ពឺ ដែលត្រូវការថិកាចំនួន ៣,៨៧ លានដុល្លាអាមេរិក។ សម្តេចតេជោ ក៏បានស្នើអោយភាគីឥណ្ឌាជួយបំពាក់អណ្តូងស្នប់ដោយប្រើប្រព័ន្ឋកម្តៅព្រះអាទិត្យផងដែរ។
សម្ដេចតេជោ បានមានប្រសាសន៍បន្តទៀតថា ដោយសារទំហំសេដ្ឋកិច្ច កម្ពុជា ឥណ្ឌា នៅនមិនទាន់ស័ក្ដិសិទ្ធ សម្ដេចតេជោ ស្នើសុំអោយរដ្ឋាភិបាលឥណ្ឌានឹងលើកទឹកចិត្តវិនិយោគិនទៅបណ្ដាក់ទុននៅកម្ពុជាបន្ថែមទៀត និងពិនិត្យលទ្ធភាពទិញផលិតផលកៅស៊ូ, គ្រាប់ស្វាយចន្ទី និងកសិផលផ្សេងៗទៀតពីកម្ពុជាដោយត្រង់។ ចំពោះវិស័យវប្បធម៌វិញ សម្ដេចតេជោ សូម អគុណចំពោះការជួសជុលប្រសាទ អង្គរវត្ត និងប្រសាទតាព្រហ្ម ដំណាក់កាលទី ៣ និងឆន្ទៈជួសជុលប្រាសាទព្រះវិហា។
នៅក្នុងជំនួបទ្វេភាគីនេះដែរ សម្ដេចតេជោ អរគុណរដ្ឋាភិបាលឥណ្ឌា ដែលបានរួមចំណែកជួយអភិវឌ្ឍន៍ធនធានមនុស្ស តាមរយៈការផ្តល់វគ្គបណ្តុះបណ្តាលរយៈវែង និងខ្លី ក្នុងវិស័យព័ត៌មានវិទ្យា កសិកម្ម ឧស្សាហកម្ម និងមន្ត្រីជំនាញអាជ្ញាធរអប្សរា។ សម្តេចបានស្នើសុំអោយឥណ្ឌាជួយផ្តល់បច្ចេកវិទ្យាIT ក្នុងការជួយកសិករជ្រើសរើសដី និងជីរដែលសមស្របក្នុងការប្រកបរបរកសិកម្មអោយទទួលបានទិន្នផលខ្ពស់។
ចំពោះការងារ កិច្ចសហប្រតិបត្តិការវិស័យការពារជាតិ និង សន្តិសុខ កម្ពុជាបានស្វាគមន៍ទស្សនកិច្ចសុឆន្ទៈរបស់កងនាវាឥណ្ឌាចំនួន៣លើក (ពីឆ្នាំ២០១៥ ដល់ ២០១៧) ក្នុងគោលបំណងពង្រឹងកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ ផ្លាស់ប្ដូរបទពិសោធន៍គ្នាទៅវិញទៅមក បណ្ដុះបណ្ដាលកងទ័ពជើងទឹកកម្ពុជា និងធ្វើកម្មវិធីមនុស្សធម៌នៅកម្ពុជា និងសូមអរគុណឥណ្ឌាដែល បានផ្តល់ឆ្កែចំនួន ១៥ ក្បាល ដល់កម្ពុជាដើម្បីជួយដល់ការដោះមីននៅកម្ពុជា ក្នុងឆ្នាំ ២០១៦ និង ផ្តល់វគ្គហ្វឹកហ្វឺនដល់កងកម្លាំងកម្ពុជាផ្នែករក្សាសន្តិភាពអង្គការសហប្រជាជាតិ។ សម្ដេចតេជោបានលើកឡើងថា ឥណ្ឌា និង កម្ពុជា គួរបង្កើតឲ្យមានកិច្ចសហប្រតិបត្តិការចែករំលែកព៌ត័មានដល់គ្នាទៅវិញទៅមក ក្នុងពេលចូលរួមប្រតិបត្តិការរក្សាសន្តិភាពក្នុងក្របខ័ណ្ឌអ.ស.ប។ កម្ពុជាចង់បង្កើនការចូលរួមគឺមិនមែនតែលើការផ្តល់កម្លាំងនោះទេ តែយើងចង់រួមចំណែកជាគំនិតក្នុងការរៀបចំផងដែរ។ សម្ដេចតេជោ បានបន្តទៀតថា កម្ពុជាបានត្រៀមខ្លួនរួចជាស្រេចដើម្បីចូលរួមការពារទប់ស្កាត់ បញ្ហាភេរវកម្ម ការប្រយុទ្ធប្រឆាំងការជួញដូរមនុស្ស។
នៅទីបញ្ចប់នៃកិច្ចប្រជុំទ្វេភាគី សម្ដេចតេជោ នាយករដ្ឋមន្ត្រី បានសម្តែងនូវសេចក្តីសោមនស្សរីករាយ និងអំណរគុណយ៉ាងជ្រាលជ្រៅ ចំពោះការស្វាគមន៍ និង បដិសណ្ឋារកិច្ចយ៉ាងកក់ក្តៅជូនចំពោះរូបសម្ដេច និងគណៈប្រតិភូកម្ពុជា ក្នុងអំឡុងស្នាក់ក្នុងនៅប្រទេសឥណ្ឌា។ ឆ្លៀតក្នុងឱកាសនេះដែរ សម្ដេចតេជោ នាយករដ្ឋម្ត្រី ក៏បានអញ្ជើញ ឯកឧត្តមនាយករដ្ឋមន្ត្រី នៃសាធារណរដ្ឋឥណ្ឌា អញ្ជើញទៅបំពេញទស្សនកិច្ចនៅព្រះរាជាណាចក្រកម្ពុជា ក្នុងពេលវេលាសមស្របដើម្បីរក្សា និងជំរុញការបង្កើនសន្ទុះនៃទំនាក់ទំនងទ្វេភាគីរបស់យើងឱ្យបានកាន់តែខ្លាំងក្លាឡើងថែមទៀត៕ ដោយ៖បញ្ញាស័ក្តិ