ភ្នំពេញ៖ តាមរយៈគណនីហ្វេសប៊ុកលោក ហ៊ុយ ឧត្តម (Huy Ou Dom) កាលពីថ្ងៃទី២២ ខែមិថុនា ឆ្នាំ២០២០ បានបង្ហោះឲ្យដឹងថា អ៊ុំប្រុសឈ្មោះ ម៉មស៊ន និងគ្រួសារ រស់នៅផ្ទះលេខ ៣១៣ ផ្លូវ៣១៣ ភូមិ៥ សង្កាត់បឹងកក់១ ខណ្ឌទួលគោក រាជធានីភ្នំពេញ ជាប់ផ្សារTK ជាអតិតយោធា (ឥឡូវពិការ) ត្រូវមន្ត្រីភូមិឃុំយកលិខិតមួយច្បាប់ ដែលចេញដោយអភិបាលខណ្ឌទួលគោក ឲ្យរើផ្ទះចេញជាបន្ទាន់ ដើម្បីយកដីអភិវឌ្ឍន៍ក្រុង ហើយឲ្យសំណងថ្លៃដោះដូរ ៤ម៉ឺនដុល្លារប៉ុណ្ណោះ បើ ៣០ ថ្ងៃ មិនព្រមរើរុះតាម គឺត្រូវវៃចោលទាំងអស់។
លោក ហ៊ុយ ឧត្តម បានបញ្ជាក់បន្តថា ជាមួយនឹងការដោះដូរសំណងដែលហាក់មិនសមរម្យនេះ គ្រួសារអ៊ុំប្រុសខាងលើ បានលើកឡើងថា ផ្ទះគាត់មានទំហំទទឹង ៨ ម៉ែត្រ នឹង បណ្តោយ ៧០ម៉ែត្រ ជាប់ផ្សារTK មានតម្លៃជិតលានដុល្លារឯណោះ ដូច្នេះ សំណង ៤ម៉ឺនដុល្លារ ពិតជាតិចខ្លាំងណាស់ ។ ជាចុងក្រោយលោកអ៊ុំ ម៉ម ស៊ន រួមទាំងគ្រួសារ សូមអង្វរដល់ថ្នាក់ដឹកនាំឲ្យជួយដោះស្រាយ និងផ្តល់សំណងដល់ពួកគាត់បានសមស្របផង។
គួរបញ្ជាក់ឲ្យដឹងផងដែរថា ដោយមានគោលការណ៍ ដឹកនាំពីរដ្ឋបាលរាជនធានីភ្នំពេញ និងដើម្បីចូលរួមអភិវឌ្ឍន៍ហេដ្ឋារចនាសម្ព័ន្ធរូបវន្តភ្ជាប់ កាត់បន្ថយការកកស្ទះចរាចរណ៍ ការរក្សាសណ្តាប់ធ្នាប់របៀបរៀបរយ និងលើកកម្ពស់សោភ័ណភាពមូលដ្ឋាន ឲ្យបានល្អប្រសើរ រដ្ឋបាលខណ្ឌទួលគោក បានចេញសេចក្តីជូនដំណឹង ដល់បងប្អូនប្រជាពលរដ្ឋ និងសាធារណជនទាំងអស់ ឲ្យបានជ្រាបថា នឹងធ្វើការស្ថាបនាបើកដំណើរការផ្លូវលេខ ៣១៣ ក្នុងសង្កាត់បឹងកកទី១ ខណ្ឌទួលគោក។
រដ្ឋបាលខណ្ឌទួលគោក ក៏បានបញ្ជាក់ថា តាមរយៈសេចក្តីជូនដំណឹងលើនេះ នោះបងប្អូនប្រជាពលរដ្ឋ ដែលកំពុងរស់នៅតាមបណ្តោយផ្លូវលេខ ៣១៣ ត្រូវធ្វើការរុះរើតូបលក់ដូរ សំយាបផ្ទះ និងសំណង់គ្រប់ប្រភេទ ដែលលយចូលមកចិញ្ចើមផ្លូវ ឬ ទ្រូងផ្លូវ ។ រដ្ឋបាលខណ្ឌទួលគោក នឹងទុកពេលឲ្យ ៣០ ថ្ងៃ គិតចាប់ពីថ្ងៃចេញសេចក្តីជូនដំណឹងនេះ ។ ក្នុងករណីពុំធ្វើតាមការណែនាំទេ នឹងចាត់វិធានការតាមរដ្ឋបាល ដោយមិនទទួលខុសត្រូវរាល់ការខូចខាត ឬបាត់បង់ណាមួយឡើយ៕ ដោយ៖ លឹម ហុង