ព្រៃវែង៖ករណីប្លន់សម្លាប់ពូករត់ម៉ូតូឌុបម្នាក់ នៅខេត្តព្រៃវែង បានធ្វើឲ្យមហាជនផ្ទុះកំហឹង និងសម្តែងនូវក្តីអាណិតអាសូរដល់ជនរងគ្រោះជាខ្លាំង ព្រោះគាត់ជាមនុស្សម្នាក់ស្លូតបូត និយាយស្តីមានការគោរពសូម្បីតែជាមួយមនុស្សអាយុក្មេង។ តែឈាមស្រែស្បែកហៅ កម្លាំងសមត្ថកិច្ចបានបើកប្រតិបត្តិការតាមប្រមាញ់ចាប់ជនដៃដល់ជាឃាតករ មកផ្តន្ទាទោសតាមផ្លូវច្បាប់ ដែលមិនបានប៉ុន្មានម៉ោង បន្ទាប់ធ្វើសកម្មភាពប្លន់សម្លាប់ កាលពីយប់ថ្ងៃទី២២ ខែមិថុនា ឆ្នាំ២០២០។
ជនរងគ្រោះមានឈ្មោះ ភី យុន អាយុ ៤៩ ឆ្នាំ រស់នៅភូមិព្រេជ ឃុំច្រេស ស្រុកមេសាង (ជាអ្នករត់ម៉ូតូឌុប) ។ ចំណែកជនដៃដល់ជាឃាតករមានឈ្មោះ បាន កាន អាយុ៣០ឆ្នាំ រស់នៅភូមិចំបក់ជ្រុំ ឃុំច្រេស ស្រុកមេសាង។
ដោយឡែក នៅរសៀលថ្ងៃទី២៣ ខែមិថុនា ឆ្នាំ២០២០នេះ ស្នងការនគរបាលខេត្តព្រៃវែង លោកឧត្តមសេនីយ៍ត្រី ព្រំ សន្ធរ បានប្រាប់បណ្តាញព័ត៌មានឲ្យដឹងថា ករណីប្លន់សម្លាប់អ្នករត់ម៉ូតូឌុបនៅស្រុកមេសាង ខេត្តព្រៃវែង កាលពីថ្ងៃទី២១ ខែមិថុនា ឆ្នាំ២០២០ ត្រូវបានកម្លាំងនគរបាលរបស់លោក បន្តចាប់ខ្លួនបានបក្ខពួក២នាក់ បន្ថែមទៀត។
ស្នងការរងនគរបាលខេត្តព្រៃវែង ទទួលផែនព្រហ្មទណ្ឌ លោកឧត្តមសេនីយ៍ត្រី ពៅ ជីវី បានឲ្យដឹងថា ក្រោមបទបញ្ជាពីលោកឧត្តមសេនីយ៍ត្រី ព្រំ សន្ធរ ស្នងការនគរបាលខេត្ត លោកបានដឹកនាំកម្លាំងអធិការដ្ឋាននគរបាលស្រុកមេសាង សហការជាមួយកម្លាំងជំនាញនគរបាលខេត្ត កម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ កម្លាំងនគរបាលរាជធានីភ្នំពេញ និងកម្លាំងប៉ុស្តិ៍នគរបាលស្រះចក បានឃាត់ខ្លួនជនសង្ស័យម្នាក់ នៅក្នងមន្ទីរពេទ្យកាល់ម៉ែត និងម្នាក់ទៀតនៅក្នុងខេត្តព្រៃវែង។
ជនសង្ស័យជាបក្ខពួកទាំងពីរនេះ ដែលទើបត្រូវបានសមត្ថកិច្ចចាប់ខ្លួនទី១-ឈ្មោះ ធឿន ប្រេស ភេទប្រុស អាយុ២៤ឆ្នាំ និងជនសង្ស័យទី៣-ឈ្មោះ ធឿន ប្រេស អាយុ២៤ឆ្នាំ មានស្រុកកំណើតនៅភូមិទួលតារី ឃុំច្រេស ស្រុកមេសាង ខេត្តព្រៃវែង (ចាប់ខ្លួននៅក្នុងមន្ទីរពេទ្យកាល់ម៉ែត)។ ចំណែកជនសង្ស័យទី២-ឈ្មោះ ស៊ីន កុសល ហៅ ឈីត អាយុ ២៨ ឆ្នាំ មានស្រុកកំណើតនៅភូមិឃុំខាងលើដូចគ្នា (ចាប់ខ្លួននៅខេត្តព្រៃវែង)៕ ដោយ៖ លឹម ហុង