ភ្នំពេញ៖អាសូណាស់ ក្មេងស្រីពីរនាក់ទៅចាំសំណាប ឆ្លៀតទៅហែលទឹកលេង តែមិនប្រយ័ត្នរអិលជើងធ្លាក់ចូលទៅកន្លែងជ្រៅទាំងពីរនាក់រួចក៏លិចចូលទៅក្នុងទឹកបាត់ទៅ។
ហេតុការណ៍នេះ កើតឡើងនៅវេលាម៉ោង ១០ និង ២០ នាទីព្រឹក ត្រូវនិងថ្ងៃពុធទី២៤ ខែមិថុនា ឆ្នាំ ២០២០ នៅក្នុងភូមិតានួន ក្នុងសង្កាត់កំបូល ខណ្ឌកំបូល រាជធានីភ្នំពេញ។
ក្មេងស្រីទាំងពីរ មួយឈ្មោះ រក្សា អាយុ ៨ ឆ្នាំនៅជាសិស្សរៀនថ្នាក់ទី១ ។ ក្មេងស្រីទី២ មានឈ្មោះ ស៊ីវ អ៊ីញ អាយុ ១១ ឆ្នាំ ជាសិស្សរៀនថ្នាក់ទី៤ ។
យោងតាមប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ គេឃើញក្មេងស្រីទាំងពីរនាក់ ត្រូវជាបងប្អូនជីដូនមួយ នៅផ្ទះជាប់គ្នាបបួលគ្នាទៅមើលសំណាបក្រែងមានមាន់ និងគោចូល ស្រាប់តែភ្លាមៗនោះក្មេងស្រីទាំងពីរក៏ឆ្លៀតចុះទៅហែលទឹកលេង
ក៏រអិលលិចបាត់។
ស្រាប់តែមួយសន្ទុះក្រោយមក មានក្មេងប្រុសម្នាក់បានរត់ដោយមានភាពស្លន់ស្លោ បានមកប្រាប់ខាងគ្រួសារក្មេងស្រីទាំងពីរថា អាអ៊ីញ និង រក្សា លង់ទឹកបាត់ហើយ ឮសូរបែបនេះឪពុកក៏ស្ទុះរត់ទៅសំដៅត្រពាំងទឹក ហើយនាំគ្នាចុះមុចរាវរក ឃើញក្មេងស្រីទាំងពីរបានលិចទៅក្នុងកន្លែងរណ្តៅយ៉ាងជ្រៅ ពេលរកឃើញលើកមកដល់លើគោក តែអកុសល្យក្មេងទាំងពីរផុតដង្ហើមបាត់ទៅហើយ។
ឪពុកក្មេងស្រីទាំងពីរ និងបងប្អូនក្នុងភូមិ បានបីយកមកផ្ទះដោយមានការអាណិត និងសោកស្តាយការបាត់បង់ជីវិតក្មេងទាំងពីរនេះ។
ក្រោយពេលកើតហេតុ សមត្ថកិច្ចជំនាញ និងពិនិត្យកោសល្យវិច័យ មកដល់ពិនិត្យនិងធ្វើកំណត់ហេតុ ប្រគល់សពក្មេងស្រីទាំងពីរជូនទៅក្រុមគ្រួសារធ្វើបុណ្យតាមប្រពៃណីនៅភូមិតានួន ក្នុងសង្កាត់កំបូល ខណ្ឌកំបូល រាជធានីភ្នំពេញ៕ ដោយ៖សាមេត
