ភ្នំពេញ៖ជនសង្ស័យមួយក្រុមជិះម៉ូតូធ្វើសកម្មភាពឆក់កាបូបស្ពាយពីនារីម្នាក់បានសម្រេចគេចខ្លួនបានដោយសុវត្ថិភាព កាលពីវេលាម៉ោង១៩និង៣០នាទីថ្ងៃទី២៤ខែមិថុនា ឆ្នាំ២០២០នៅតាមបណ្តោយផ្លូវ២៧១ សង្កាត់ស្ទឹងមានជ័យ១ ខណ្ឌមានជ័យ ។
ជនរងគ្រោះឈ្មោះ អាង ស៊ីថូ អាយុ១៨ឆ្នាំ មុខរបរជាងសំអាង បច្ចុប្បន្នស្នាក់នៅផ្ទះជួលម្តុំបឹងត្របែក មានស្រុកកំណើតនៅភូមិវិហារសួគ៌ ស្រុកខ្សាច់កណ្តាល ខេត្តកណ្តាល។
តាមការរៀបរាប់ពីនារីរងគ្រោះបានឲ្យដឹងថា មុនពេលកើតហេតុ នាងបានចេញពីហាងសំអាង នៅម្តុំផ្លូវ២០០៤ ជិះម៉ូតូកង់បី passapp ក្នុងទិសដៅឆ្ពោះទៅផ្ទះ លុះពេលធ្វើដំណើរមកជិតដល់គល់ស្ពានអាកាសស្ទឹងមានជ័យ ស្រាប់តែលេចមុខជនសង្ស័យ២នាក់ជិះម៉ូតូមិនចាំម៉ាក បានធ្វើសកម្មភាពឆក់កាបូបស្ពាយ ដែលដាក់នៅក្បែរខ្លួន បានសម្រេចរួចជនសង្ស័យទាំងនោះជិះម៉ូតូគេចខ្លួនបាត់ស្រមោល ទោះខំប្រឹងស្រែកឆោឡោពីចម្ងាយក៏ដោយ។
នារីរងគ្រោះបានប្រាប់ថា សម្ភារ ដែលបាត់បង់នៅក្នុងកាបូបស្ពាយនោះរួមមាន ទូរស័ព្ទម៉ាក iphone ភ្នែក៣មួយគ្រឿង ទូរស័ព្ទម៉ាក samsong មួយគ្រឿង លុយ៤ម៉ឺនរៀល និងសម្ភារ មួយចំនួនទៀត។
ក្រោយពេលកើតហេតុនារីរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលស្ទឹងមានជ័យ១ ដើម្បីឲ្យសមត្ថកិច្ចកំណត់មុខសញ្ញា និងស្រាវជ្រាវបន្ដ ចាប់ជនល្មើសយកមកផ្ដន្ទាទោសតាមផ្លូវច្បាប់៕ ដោយ៖ភត្រា និងសាម៉េត
