ភ្នំពេញ៖ ផ្សិតគឺជាអាហាររសជាតិឈ្ងុយឆ្ងាញ់ពិសេសមួយ ដែលអាចត្រូវបានយកទៅកែច្នៃច្រើនបែបក្នុងមុខម្ហូបប្រចាំថ្ងៃ និងមិនត្រឹមតែប៉ុណ្ណឹងទេ ផ្សិតក៏អាចជាអាហារពិសេសមានអត្ថប្រយោជន៍អាចជួយប្រឆាំងជំងឺភ្លេចភ្លាំងបានផងដែរ។ ប៉ុន្តែ មនុស្សភាគច្រើន ពុំសូវចាប់អារម្មណ៍ទៅនឹងការដាំផ្សិតនោះទេ ដោយសារតែគេគិតថាវាជាការលំបាក ដើម្បីទទួលផល។
តែយ៉ាងណា ដើម្បីជំរុញលើកទឹកចិត្តគ្រប់គ្នាងាកមកចាប់អារម្មណ៍អំពីវិធីដាំផ្សិតតាមបែបបច្ចេកទេសងាយៗនេះវិញ Ajarn Ekarat អាយុ ២៥ ឆ្នាំ នៅរស់ក្នុងទីក្រុងបាងកក (ថៃ) បានបង្ហើបឲ្យដឹងថា មុនក្លាយជាគ្រូគណនេយ្យ ខ្ញុំធ្លាប់ធ្វើការជាអ្នកគ្រប់គ្រងនៅភោជនីយដ្ឋានស្ងោជើងមាន់។ មិនយូរប៉ុន្មាន គាត់បានលាឈប់ធ្វើជាគ្រូបង្រៀនគណនេយ្យ និងដាំផ្សិតប៊ូតាននៅលើអន្តេវាសិកដ្ឋាន។
តាមរយៈការវិនិយោគ ៦០០ បាត ដើម្បីទិញផ្សិតដាំដុះចំនួន ៥០ ។ បន្ទាប់ពីនោះពេលផ្សិតរីកហើយ គឺធ្វើឲ្យគាត់អាចចាប់ផ្តើមលក់ ដូច្នេះបានទិញបន្ថែម ៥០ ដុំ ដោយដាក់តាមសំយាបទឹករាល់ព្រឹក ដោយចាក់ទឹកពីខាងលើមកជាន់ក្រោម។
Ajarn បានប្រាប់ថា៖ «ដំបូងឡើយ ខ្ញុំបានស្វែងរកចំណេះដឹងនេះនៅលើអ៊ិនធឺណិត តាមរយៈនាយកដ្ឋានកសិកម្ម ហើយរកឃើញថា ការដាំផ្សិតគឺមិនមែនជាការលំបាកនោះទេ គន្លឹះគឺចេះគ្រប់គ្រងសីតុណ្ហភាព។ ហើយបន្ទាប់បើកចំហរថង់ប្រហែលរយៈពេល ៤ ថ្ងៃ ផ្សិតចាប់ផ្តើមរីកដុះដាលដែលមានសណ្ឋានដូចត្រចៀកជ្រូកអ៊ីចឹង។» ។ Ajarn បន្តថា «ជាការពិតណាស់ ផ្សិតនេះមានរសជាតិឈ្ងុយឆ្ងាញ់ ដែលមនុស្សចូលចិត្តបំផុត។ លក់នៅលើទីផ្សារ វាមានតម្លៃ ៨០ បាត ក្នុង១គីឡូក្រាម» ។
Ajarn បន្ថែមថា «តំបន់» គឺមិនមែនជាបញ្ហានៅក្នុងការដាំដុះផ្សិតទេ ប៉ុន្តែ បញ្ហាគឺមនុស្សភាគច្រើនពុំបានធ្វើវា ព្រោះថា ចំណូលបានពីការលក់វាក្នុង១សប្តាហ៍ បានប្រហែល ៥០០ បាត ដែរ និងបានលក់រហូតហ្នឹង។ បើទោះជាទទួលបានប្រាក់ចំណូលពុំសេសសល់ជាដុំកំភួន តែវាអាចធ្វើឲ្យគាត់រួចថ្លៃបង់អន្តេវាសិកដ្ឋានយ៉ាងងាយស្រួល។ ប៉ុន្តែ ពេលខ្លះក៏បានសល់គ្រាន់ចាយផងដែរ។
សូមបញ្ជាក់ថា សម្រាប់ផ្សិតប៊ូតាននេះ ត្រូវបានចាត់ទុកថាជាផ្សិតសេដ្ឋកិច្ច ដែលមនុស្សភាគច្រើនចូលចិត្តហូប ដែលវាអាចត្រូវបានឃើញនៅលើចានអាហារជាច្រើន៕
ប្រែសម្រួល៖ លឹម ហុង (ប្រភព៖ baansuann)
