យោងតាមទំព័រហ្វេសប៊ុកផ្លូវការរបស់ DBKL បានឲ្យដឹងថា រោងចក្រផលិតមីមួយកន្លែង ដែលមានទីតាំងនៅក្នុងបរិវេណ YAMARICO TEA ស្ថិតនៅលើកោះ Jalan Segambut Selatan ប្រទេសម៉ាឡេស៊ី ត្រូវបានបិទ បន្ទាប់ពីមន្ត្រីជំនាញបានឆ្មក់ចូលរកឃើញថា គ្រប់ផ្នែកទាំងអស់នៃកន្លែងផលិតមីនេះ មហាសែនគគ្រិចគ្មានលេខដាក់។
មន្ត្រីបានឲ្យដឹងថា នៅពេលបានចូលដល់ក្នុងរោងចក្រផលិតចំណីអាហារនេះ កាលពីថ្ងៃទី២៤ ខែមិថុនា ឆ្នាំ២០២០ ក្រុមត្រួតពិនិត្យពិតជាមានការភ្ញាក់ផ្អើលជាខ្លាំង ដែលស្មានមិនដល់ថា បរិយាកាសការងារធ្វើមីនេះទាំងកន្លែងលាង និងសម្ងួត កខ្វក់គួរឱ្យញញើតបំផុត។ លើសពីនេះ សត្វកណ្តុរត្រូវបានគេមើលឃើញថា រត់ប្រសាចពាសពេញកម្រាលឥដ្ឋ ខណៈពេលដែលការបោះសត្វកណ្តុរចោល ក៏ត្រូវបានគេរកឃើញនៅក្នុងបរិវេណនោះដែរ។ ដោយឡែក ជញ្ជាំង និងកម្រាលឥដ្ឋ ក្នុងរោងចក្រផលិតចំណីអាហារនេះ គឺគ្របដណ្ដប់ពោរពេញដោយភាពកខ្វក់ ហើយបន្ទប់ទឹកទៀតសោត ដែលអាចប្រើបានសម្រាប់បុគ្គលិក ក៏គ្របដណ្ដប់ដោយភាពកខ្វក់ផងដែរ។
លើសពីនេះទៀត កម្មករធ្វើការនៅទីនោះ ក៏ត្រូវបានគេរកឃើញថាមិនត្រូវបានបំពាក់ដោយអៀម និងស្រោមដៃធានាអនាម័យ ក្នុងអំឡុងពេលផលិតមីនោះទេ។ សូម្បីតែសម្ភារការងារក៏ត្រូវបានគេរកឃើញថា ស្ថិតនៅក្នុងស្ថានភាពមិនត្រឹមត្រូវស្រដៀងគ្នានេះផងដែរ។
ចាប់តាំងពីពេលនោះមក ទីតាំងរោងចក្រផលិតមីនេះ ត្រូវបានបង្ខំឱ្យបិទ ស្ថិតក្រោមផ្នែកទី១១ នៃច្បាប់អាហារឆ្នាំ១៩៨៣៕
ប្រែសម្រួល៖ លឹម ហុង (ប្រភព៖ worldofbuzz)