ខេត្តព្រះសីហនុ៖ មន្ត្រីរាជការថ្នាក់ទាបមួយចំនួន ជាពិសេសមន្ត្រីកំពុងបំរើការងារនៅមន្ទីរសុខាភិបាល ខេត្តព្រះសីហនុ និងមន្ត្រីមន្ទីរពេទ្យបង្អែកខេត្តនេះ បង្ហាញការមិនពេញចិត្ត នៅគ្រាមានព័ត៌មានមកថា មានមន្ត្រីស្ថាប័នពាក់ព័ន្ធក្រសួងស្ថាប័នមួយចំនួនកំពុងជួយរត់ការឲ្យ លោក លិ គឹមហ៊ួរ មានតួនាទីបច្ចុប្បន្នជាគ្រូពេទ្យនៅមន្ទីរពេទ្យបង្អែកខេត្តព្រះសីហនុ ឲ្យក្លាយទៅជាអនុប្រធានមន្ទីរសុខាភិបាលខេត្តនេះ ទាំងបុគ្គលរូបនេះ អសកម្មក្នុងការងារ និងកំពុងជាប់ការស៊ើបអង្កេតពីអង្គភាពប្រឆាំងអំពើពុករលួយផងនោះ។
ផ្តើមពីបញ្ហានេះ មន្ត្រីរាជការមួយចំនួន នៃរដ្ឋបាលខេត្តព្រះសីហនុ បានសំណូមពរ និងស្នើដល់ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ជាពិសេស ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ឲ្យជួយអង្កេតតាមដាន សកម្មភាពរត់ការជួយឲ្យ លោក លិ គឹមហ៊ួរ ធ្វើជាអនុប្រធានមន្ទីរសុខាភិបាលខេត្តព្រះសីហនុជាថ្មីឡើងវិញ។
ករណីលោក លិ គឹមហ៊ួរ នេះ មន្ត្រីសាលាខេត្តព្រះសីហនុ បានឲ្យដឹងថា កាលពីខែតុលា ឆ្នាំ២០១៧កន្លងទៅ ក្រុមប្រឹក្សាខេត្តព្រះសីហនុ ក៏បានកំណត់កាលបរិច្ឆេទត្រៀមបើកកិច្ចប្រជុំ ដើម្បីស្នើសុំមតិគាំទ្រ តែងតាំង លោកវេជ្ជបណ្ឌិត លិ គឹមហ៊ួរ មានតួនាទីបច្ចុប្បន្នជាគ្រូពេទ្យនៅមន្ទីរពេទ្យបង្អែកខេត្តព្រះសីហនុ ទៅជាអនុប្រធានមន្ទីរសុខាភិបាលខេត្តព្រះសីហនុនេះដែរ ប៉ុន្តែត្រូវប្រកាសលើកពេល។
មន្ត្រីស្នើមិនបញ្ចេញឈ្មោះ បានឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុដឹងនៅថ្ងៃអាទិត្យ ទី២៨ ខែមករា ឆ្នាំ២០១៨ ដោយអះអាងថា ជាបន្តបន្ទាប់មកនេះ លោកវេជ្ជបណ្ឌិត លិ គឹមហ៊ួរ ធ្លាប់ត្រូវគេរិះគន់ ជាមន្ត្រីម្នាក់ អសកម្មក្នុងការងារបំពេញតួនាទីប្រចាំថ្ងៃ ដោយបុគ្គលរូបនេះ មិនបានទៅធ្វើការងារឲ្យបានពេញតាមម៉ោងរដ្ឋបាល ដែលមន្ទីរពេទ្យបង្អែកខេត្តព្រះសីហនុ ប្រគល់ជូននោះទេ។ ប៉ុន្តែពួកគេមានចម្ងល់ថា បែរជាពេលនេះ មានព័ត៌មានមកថា មន្ត្រីអសកម្មរូបនេះ ត្រូវមន្ត្រីថ្នាក់ដឹកនាំ នៃរដ្ឋបាលខេត្តព្រះសីហនុ និងក្រសួងស្ថាប័នពាក់ព័ន្ធ កំពុងជួយរត់ការជ្រោមជ្រែង តែងតាំងឲ្យក្លាយទៅជាអនុប្រធានមន្ទីរសុខាភិបាលខេត្តព្រះសីហនុទៅវិញ។
មន្ត្រីមន្ទីរសុខាភិបាល និងក្រុមគ្រូពេទ្យមួយចំនួន កំពុងបំរើការងារនៅមន្ទីរពេទ្យបង្អែកខេត្តព្រះសីហនុ បានផ្តល់មតិរិះគន់ និងបង្ហាញការមិនពេញចិត្តទេ នៅគ្រាមានព័ត៌មានមកថា មានមន្ត្រីស្ថាប័នរដ្ឋមួយចំនួន រាប់ទាំងថ្នាក់ដឹកនាំរដ្ឋបាលខេត្តព្រះសីហនុផង កំពុងជួយអន្តរាគមន៍ ទៅក្រសួងសុខាភិបាល តម្លើងតួនាទី និងត្រៀមប្រកាសតែងតាំង លោក លិ គឹមហ៊ួរ ពីគ្រូពេទ្យបង្អែកខេត្តព្រះសីហនុ ឲ្យក្លាយទៅជាអនុប្រធានមន្ទីរសុខាភិបាលខេត្តនេះក្នុងពេលដ៏ឆាប់ខាងមុខ។
មន្ត្រីរាជការមួយចំនួនបង្ហាញការហួសចិត្ត ហើយពួកគេបានរិះគន់ថ្នាក់ដឹកនាំរដ្ឋបាលខេត្តព្រះសីហនុ ចំពោះសកម្មភាពជួយជ្រោមជ្រែងជួយឲ្យ លោក លិ គឹមហ៊ួរ ដែលជាមន្ត្រីអសកម្មក្នុងការងារកន្លងមក បែរជាត្រូវលើកទឹកចិត្តតម្លើងឋានៈបុណ្យស័ក្តិជាបន្តបន្ទាប់ ចំណែកមន្ត្រីរាជការ ដែលខិតខំបំពេញការងារបានត្រឹមត្រូវ បែរជាមិនត្រូវបានយកចិត្តទុកដាក់ ឬជួយអន្តរាគមន៍តម្លើងតួនាទីទៅវិញ។
ប្រភពដដែល បានបង្ហាញការមិនពេញចិត្ត ចំពោះគម្រោងតែងតាំង លោកវេជ្ជបណ្ឌិត លិ គឹមហ៊ួរ ដែលជាមន្ត្រីអសកម្មការងារ ព្រោះបុគ្គលរូបនេះ មិនបានមកបំពេញការងារឲ្យបានត្រឹមត្រូវតាមម៉ោងការងាររដ្ឋផ្តល់ជូនសោះ ប៉ុន្តែបែរជា មានឱកាសត្រូវថ្នាក់ដឹកនាំ នៃរដ្ឋបាលខេត្តព្រះសីហនុ ជួយទំនុកបម្រុងតម្លើងតួនាទី ឬឋានៈបុណ្យស័ក្តិដោយរលូនបែបនេះនោះទេ។
ចំពោះគម្រោងតែងតាំង លោក លិ គឹមហ៊ួរ ពីគ្រូពេទ្យបង្អែកខេត្តព្រះសីហនុ ឲ្យក្លាយទៅជាអនុប្រធានមន្ទីរសុខាភិបាលខេត្តព្រះសីហនុ ត្រូវបានមន្ត្រីកំពុងបំរើការងារនៅក្នុងមន្ទីរពេទ្យបង្អែកខេត្ត និងមន្ត្រីមន្ទីរសុខាភិបាលភាគច្រើន បង្ហាញការមិនពេញចិត្ត និងស្នើដល់ថ្នាក់ដឹកនាំស្ថាប័នពាក់ព័ន្ធពិចារណាជាថ្មីឡើងវិញ។
ករណី លោក លិ គឹមហ៊ួរ នេះដែរ មន្ត្រីមន្ទីរពេទ្យបង្អែកខេត្តព្រះសីហនុ បានអះអាងថា កន្លងមកក្រសួងសុខាភិបាល ក៏ធ្លាប់បានចេញលិខិតជូនរដ្ឋបាលខេត្តព្រះសីហនុ ឲ្យចាត់វិធានការណ៍វិន័យ ដល់បុគ្គលរូបនេះដែរ ប៉ុន្តែជាក់ស្តែង រដ្ឋបាលខេត្តនេះមិនបានដាក់វិន័យទៅលើ លោក លិ គឹមហ៊ួរ ទេ ប៉ុន្តែបែរជាមានអ្នកជួយរត់ការតែងតាំង ឲ្យក្លាយទៅជា អនុប្រធានមន្ទីរសុខាភិបាលខេត្តព្រះសីហនុ ទាំងបុគ្គលរូបនេះ មានលិខិតព្រមានពី អង្គភាពប្រឆាំងអំពើពុករលួយ (ACU) ចំនួនពីរដង។ ក្នុងនោះ លោក លិ គឹមហ៊ួរ ក៏ធ្លាប់ត្រូវបាន មន្ទីរសុខាភិបាលខេត្តព្រះសីហនុ បានដាក់សំណើរស្នើសុំ ទៅក្រសួងសុខាភិបាល ស្នើផ្ទេរបុគ្គលរូបនេះ ចេញពីមន្ទីរពេទ្យបង្អែកខេត្តនេះដែរនាពេលកន្លងទៅ។
យ៉ាងណាក៏ដោយចុះ អ្នកយកព័ត៌មាន CEN.COM.KH ប្រចាំខេត្តព្រះសីហនុ មិនទាន់អាចស្នើសុំបញ្ជាក់បញ្ហាខាងលើនេះពី លោកវេជ្ជបណ្ឌិត លិ គឹមហ៊ួរ បច្ចុប្បន្នជាគ្រូពេទ្យបង្អែកខេត្តព្រះសីហនុ និងជាប្រធានមន្ទីរពហុព្យាបាលសេតេ ឬមន្ទីរពេទ្យឯកជន ឈ្មោះ «សេតេ ,CT» ដើម្បីបំភ្លឺបានទេតាមទូរស័ព្ទ នៅព្រឹកថ្ងៃអាទិត្យ ទី២៨ ខែមករា ឆ្នាំ២០១៨។
ចំពោះករណី លោកវេជ្ជបណ្ឌិត លិ គឹមហ៊ួរ នេះដែរ កាលពីថ្ងៃទី២៦ ខែមិថុនា ឆ្នាំ២០១៥ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានផ្ញើលិខិតមួយច្បាប់ជូន ឯកឧត្តមអភិបាលខេត្តព្រះសីហនុ ដោយក្នុងកម្មវត្ថុ នៃលិខិតនោះ បានស្នើឲ្យចាត់វិធានការខាងវិន័យចំពោះ លោកវេជ្ជបណ្ឌិត លិ គឹមហ៊ួរ មន្ត្រីរាជការមន្ទីរពេទ្យបង្អែកខេត្ត នៃមន្ទីរសុខាភិបាលខេត្តព្រះសីហនុ។
លិខិត របស់ ក្រសួងសុខាភិបាល ដែលយោងតាមអនុក្រឹត្យលេខ ៤៩៧ អនក្រ.បក ចុះថ្ងៃទី៦ ខែវិច្ឆិកា ឆ្នាំ២០១៣ ស្តីពីការធ្វើប្រភូកម្មអំណាចដល់រដ្ឋបាលថ្នាក់ក្រោមជាតិ ក្នុងការតែងតាំងការផ្លាស់ប្តូរ និងការបញ្ចប់ភារកិច្ចន្ត្រីរាជការស៊ីវិល ដែលបំពេញការងារនៅថ្នាក់ក្រោមជាតិ។
សេចក្តីណែនាំ លេខ. ២២០២ មស.សណន ចុះថ្ងៃទី៤ ខែកក្កដា ឆ្នាំ២០១៤ របស់ក្រសួងមុខងារសាធារណៈ ស្តីពីនីតិវិធី នៃការតែងតាំង ការផ្លាស់ប្តូរ និងការបញ្ចប់ភារកិច្ចមន្ត្រីរាជការស៊ីវិល ដែលបំពេញការងារ នៅថ្នាក់ក្រោមជាតិ។
លិខិតលេខ៦២១មស.ខពសន ចុះថ្ងៃទី២៧ ខែមេសា ឆ្នាំ២០១៥ របស់មន្ទីរសុខាភិបាលខេត្តព្រះសីហនុ ស្តីពីរបាយការណ៍ករណី លោកវេជ្ជបណ្ឌិត លិ គឹមហ៊ួរ។
លិខិតលេខ៨២០មស.ខពសន ចុះថ្ងៃទី៥ ខែមិថុនា ឆ្នាំ២០១៥ របស់មន្ទីរសុខាភិបាលខេត្តព្រះសីហនុ ស្តីពីសំណើរសុំផ្ទេឈ្មោះ លោកវេជ្ជបណ្ឌិត លិ គឹមហ៊ួរ ចេញពីមន្ទីរសុខាភិបាលខេត្តព្រះសីហនុ។
សេចក្តីមានចែងនៅក្នុងកម្មវត្ថុ និងយោងខាងលើ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានជំរាបជូន ឯកឧត្តម អភិបាលខេត្តព្រះសីហនុ ថា តាមរបាយការណ៍ របស់មន្ទីរសុខាភិបាលខេត្តព្រះសីហនុ អំពីករណី លោកវេជ្ជបណ្ឌិត លិ គឹមហ៊ួរ បានបង្ហាញថា ទោះបីជាមានការណែនាំជាបន្តបន្ទាប់ឲ្យ លោកវេជ្ជបណ្ឌិត លិ គឹមហ៊ួរ ខិតខំយកចិត្តទុកដាក់បំពេញការងារ គោរពតាមបទបញ្ជាផ្ទៃក្នុង របស់អង្គភាពយ៉ាងណាក៏ដោយ លោក លិ គឹមហ៊ួរ នៅតែមិនបានយកចិត្តទុកដាក់បំពេញការងារ ដោយបានត្រឹមតែមកចុះហត្ថលេខា លើបញ្ជីវត្តមានការងារ ហើយវិលត្រឡប់ទៅវិញ ដោយមិនបានគោរពតាមការណែនាំនោះទេ។
ករណីនេះ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏ធ្លាប់បានដាក់លិខិតជូន ឯកឧត្តមអភិបាល ខេត្តព្រះសីហនុ ឲ្យពិនិត្យចាត់វិធានការខាងវិន័យ ចំពោះ លោកវេជ្ជបណ្ឌិត លិ គឹមហ៊ួរ តាមនីតិវិធីតាមការគួរ ប៉ុន្តែតាមការពិនិត្យជាក់ស្តែង ដូចជាមិនទាន់ឃើញរដ្ឋបាលខេត្តនេះ ចាត់វិធានការខាងវិន័យ លោក លិ គឹមហ៊ួរ នោះទេពេលកន្លងមក។
ចំណែកងាកទៅ អង្គភាពប្រឆាំងអំពើពុករលួយ កាលពីថ្ងៃទី១៣ ខែធ្នូ ឆ្នាំ២០១៦ ក៏បានដាក់លិខិតឆ្លើយតប ជូន ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ដែលបានដាក់ពាក្យប្តឹងស្នើឲ្យស្ថាប័នប្រឆាំងអំពើពុករលួយមួយនេះ ជួយពិនិត្យ និងដោះស្រាយករណីភាពអសកម្ម របស់ លោក លិ គឹមហ៊ួរ លោក ស៊ិក ប៊ុណ្ណា និងលោក ញ៉ុក ម៉េត ជាមន្ត្រីរាជការបំរើការងារនៅមន្ទីរពេទ្យបង្អែកខេត្តព្រះសីហនុ។
លិខិតមានចុះហត្ថលេខា និងបោះត្រា ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានឆ្លើយតប ឯកឧត្តម ម៉ម ប៊ុនហេង ថា អង្គភាពប្រឆាំងអំពើពុករលួយ បានទទួលពាក្យប្តឹងពាក់ព័ន្ធនឹងករណីអវត្តមានក្នុងម៉ោងការងារ របស់ លោក លិ គឹមហ៊ួរ គ្រូពេទ្យបង្អែកខេត្តព្រះសីហនុ ទទួលបន្ទុកផ្នែកសង្គ្រោះបន្ទាន់។ លោក ស៊ិក ប៉ុណ្ណា អនុប្រធានមន្ទីរពេទ្យ ទទួលបន្ទុក ផ្នែកបច្ចេកទេស សល្យាគារ និងសង្គ្រោះបន្ទាន់ ព្រមទាំងលោក ញ៉ុក ម៉េត វេជ្ជបណ្ឌិត នៃមន្ទីរពេទ្យបង្អែកខេត្តព្រះសីហនុ ដែលមិនមកបំពេញការងារ ដោយគ្រាន់តែមកចុះហត្ថលេខាលើបញ្ជីវត្តមានរួចហើយត្រឡប់ទៅផ្ទះវិញ។
ឯកឧត្តមទេសរដ្ឋមន្ត្រី ឱម យ៉ិនទៀង បានបញ្ជាក់ក្នុងលិខិតដដែលថា ពាក់ព័ន្ធនឹងករណីមន្ត្រីអសកម្មការងារន្មាននាក់ខាងលើនេះ កន្លងមកឯកឧត្តមរដ្ឋមន្ត្រីក្រសួងសុខាភិបាល ក៏ធ្លាប់បានធ្វើរបាយការណ៍មក អ.ប.ព. តាមរយៈលិខិតលេខ១៤៩ សខល ចុះថ្ងៃទី២២ ខែតុលា ឆ្នាំ២០១៥ ដោយបានស្នើឲ្យ ឯកឧត្តមអភិបាលខេត្តព្រះសីហនុ ឲ្យចាត់វិធានការខាងវិន័យចំពោះនីតិវិធីចំពោះ លោក លិ គឹមហ៊ួរ ប៉ុន្តែមកដល់ពេលនេះពុំទាន់មានវិធានការណាមួយនៅឡើយ។
លិខិតអង្គភាពប្រឆាំងអំពើពុករលួយ បានបង្ហាញថា យោងតាមបញ្ជីវត្តមាន របស់មន្ត្រីរាជការបំរើការងារនៅមន្ទីរពេទ្យបង្អែកខេត្តព្រះសីហនុ បញ្ជាក់ថា លោក លិ គឹមហ៊ួរ លោក ស៊ិក ប៉ុណ្ណា និងលោក ញ៉ុក ម៉េត អវត្តមានច្រើនជាងគេបំផុតក្នុងម៉ោងធ្វើការងារ ប្រជុំ និងយាមផងដែរ។ ជាក់ស្តែងក្នុងអំឡុង កាលពីខែសីហា ឆ្នាំ២០១៦ ក្រុមការងារ របស់ អង្គភាពប្រឆាំងអំពើពុករលួយមួយក្រុម បានធ្វើការចុះឃ្លាំមើលដោយផ្ទាល់អំពីសកម្មភាពបុគ្គលទាំងបីនាក់ខាងលើ ដោយពិនិត្យឃើញថា មន្ត្រីដែលមានឈ្មោះខាងលើនេះ ពិតជាមិនបានមកបំពេញការងារ ឲ្យបានជាប់លាប់ក្នុងម៉ោងការងារ របស់រដ្ឋ បានដាក់ជូន ពិតប្រាកដមែន។
ករណីនេះ ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏បានស្នើឲ្យ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ឲ្យពិនិត្យដោះស្រាយករណីនេះ ជាមួយ ឯកឧត្តមអភិបាលខេត្តព្រះសីហនុ រួចផ្តល់លទ្ធផល នៃការដោះស្រាយនោះមកអង្គភាពប្រឆាំងអំពើពុករលួយវិញ ឲ្យបានឆាប់តាមការគួរ។
ទោះជាបែបនេះក្តី លោកវេជ្ជបណ្ឌិត លិ គឹមហ៊ួរ ពេលនេះបែរជាមានព័ត៌មានមកថា នឹងទទួលបានការតែងតាំងជាអនុប្រធានមន្ទីរសុខាភិបាលខេត្តព្រះសីហនុ ដោយមានការជួយទំនុកបំរ៉ុង ពីថ្នាក់ដឹកនាំស្ថាប័នពាក់ព័ន្ធ នៃរដ្ឋបាលខេត្តព្រះសីហនុ និងក្រសួងសុខាភិបាលទៅវិញ។
បញ្ហានេះ ទាំងប្រជាពលរដ្ឋ ពិសេស មន្ត្រីរាជការថ្នាក់ទាបមួយចំនួន កំពុងបំរើការងារនៅមន្ត្រីសុខាភិបាល និងមន្ទីរពេទ្យបង្អែកខេត្តព្រះសីហនុ មានការភ្ញាក់ផ្អើល និងបង្ហាញការហួសចិត្ត ចំពោះគំនិតផ្តួចផ្តើម របស់មន្ត្រីថ្នាក់ដឹកនាំស្ថាប័នពាក់ព័ន្ធ នៃរដ្ឋបាលខេត្តព្រះសីហនុ បែរជាទៅលើកទឹកចិត្តមន្ត្រីអសកម្មការងារ ឈ្មោះ លិ គឹមហ៊ួរ បច្ចុប្បន្នជាគ្រូពេទ្យបង្អែកខេត្តព្រះសីហនុ និងជាប្រធានមន្ទីរពហុព្យាបាលសេតេ ឲ្យបន្តឡើងតួនាទី ឬឋានៈបុណ្យស័ក្តិជាបន្តបន្ទាប់បែបនេះនោះទេ។
មន្ត្រីរាជការថ្នាក់ទាបមួយចំនួន ក៏បានរិះគន់ថ្នាក់ដឹកនាំ រដ្ឋបាលខេត្តព្រះសីហនុ ហាក់មិនបានជួយជ្រោមជ្រែងចំពោះមន្ត្រីខិតខំគោរពពេលម៉ោងការងារ និងខំប្រឹងប្រែងធ្វើការជាក់ស្តែង នៅមន្ទីរសុខាភិបាល និងមន្ទីរពេទ្យបង្អែកខេត្តនេះ ដែលពួកគេគ្មានខ្នងបង្អែក ពិសេសគ្មានលុយកាក់សម្រាប់សូកប៉ាន់ ដើម្បីបានតម្លើងតួនាទីដូចអ្នកមានលុយផ្តល់សំណូក បែរជាមិនត្រូវបានជួយលើកទឹកចិត្តទៅវិញ។
ត្រង់ចំណុចនេះ មន្ត្រីរាជការមន្ទីរសុខាភិបាល និងមន្ទីរពេទ្យបង្អែកខេត្តព្រះសីហនុមួយចំនួន ក៏បានស្នើដល់ ឯកឧត្តម យន្ត មីន អភិបាលខេត្តព្រះសីហនុ និង ឯកឧត្តម ជាម ហ៊ីម ប្រធានក្រុមប្រឹក្សាខេត្តព្រះសីហនុ ជាពិសេស ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល និងឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយ ឲ្យជួយពិនិត្យ និងពិចារណាទៅលើគម្រោងតែងតាំង លោកវេជ្ជបណ្ឌិត លិ គឹមហ៊ួរ ឲ្យមានតួនាទីជាអនុប្រធានមន្ទីរសុខាភិបាលខេត្តព្រះសីហនុជាថ្មីឡើងវិញ ដើម្បីជៀសវាងមតិរិះគន់ផ្សេងៗ ពីសាធារណៈជន។
ពិសេសជាងនេះទៀត មន្ត្រីរាជការមួយចំនួន នៃមន្ទីរសុខាភិបាល និងមន្ទីរពេទ្យបង្អែកខេត្តព្រះសីហនុ ក៏បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយអន្តរាគមន៍ទប់ស្កាត់ ចំពោះសកម្មភាពរត់ការតម្លើងតួនាទី ផ្តើមដោយថ្នាក់ដឹកនាំស្ថាប័នពាក់ព័ន្ធមួយចំនួន រួមមាន៖ មន្ត្រីរដ្ឋបាលខេត្តព្រះសីហនុ និងក្រសួងសុខាភិបាលជាដើម ដើម្បីជួយជ្រោមជ្រែងឲ្យមន្ត្រីអសកម្មក្នុងការងារ គឺ លោកវេជ្ជបណ្ឌិត លិ គឹមហ៊ួរ ពីគ្រូពេទ្យបង្អែកខេត្តព្រះសីហនុ តម្លើងតួនាទីឲ្យក្លាយទៅជា អនុប្រធានមន្ទីរសុខាភិបាលខេត្តព្រះសីហនុ ដែលកន្លងមក បុគ្គលរូបនេះ មិនបានទៅបំពេញការងារប្រចាំថ្ងៃ នៅមន្ទីរពេទ្យបង្អែកខេត្តព្រះសីហនុ ឲ្យបានត្រឹមត្រូវតាមម៉ោងធ្វើការងាររដ្ឋផងនោះ៕ ដែន សីមា