ភ្នំពេញ៖ រោងចក្រផលិតស៊ីម៉ងត៍កំពត ស៊ីមេន ខូអិលធីឌី ជារោងចក្រផលិតស៊ីម៉ងត៍ទី១ របស់ព្រះរាជាណាចក្រកម្ពុជា! រោងចក្រផលិតស៊ីម៉ងត៍កំពត ស៊ីមេន ខូអិលធីឌី (Kampot Cement Co., Ltd) មានសមត្ថភាពផលិតស៊ីម៉ងត៍ប្រមាណ ២លានតោនក្នុងមួយឆ្នាំ និងបានសម្ពោធដាក់ឱ្យដំណើរការនៅឆ្នាំ២០០៨។ ស្ថិតនៅតំបន់ភ្នំទទុង ភ្នំទូកមាសខាងកើត ស្រុកបន្ទាយមាស និងភ្នំតូច ស្រុកដងទង់ ខេត្តកំពត។ រោងចក្រនេះ វិនិយោគដោយ ក្រុមហ៊ុនវិនិយោគ កំពត ស៊ីមេន ខូអិលធីឌី (Kampot Cement Co., Ltd) ដែលមាន បរិមាណផលិត៖ ២លានតោន/1ឆ្នាំ។
រោងចក្រផលិតស៊ីម៉ងត៍កម្ពុជាចក្រីទីង ជារោងចក្រផលិតស៊ីម៉ងត៍ទី២ របស់ព្រះរាជាណាចក្រកម្ពុជា។ រោងចក្រផលិតស៊ីម៉ងត៍កម្ពុជាចក្រីទីង (Cambodia Cement Chakreyting Co,. Ltd) មានសមត្ថភាពផលិតស៊ីម៉ងត៍ប្រមាណ ១.១លានតោនក្នុងមួយឆ្នាំ។ រោងចក្រនេះ ត្រូវបានស្តារឡើងវិញនិងដាក់ឱ្យដំណើរការនៅឆ្នាំ២០១៥។ ទីតាំងគឺស្ថិតនៅភ្នំបោះដំបង ស្រុកកំពត ខេត្តកំពត។
រោងចក្រផលិតស៊ីម៉ងត៍ ជីបម៉ុង អ៊ិនស៊ី ស៊ីមេន ជារោងចក្រផលិតស៊ីម៉ងត៍ទី៣ របស់ព្រះរាជាណាចក្រកម្ពុជា។ រោងចក្រផលិតស៊ីម៉ងត៍ ជីបម៉ុង អ៊ិនស៊ី ស៊ីមេន (Chip Mong Insee Cement Corporation) មានសមត្ថភាពផលិតស៊ីម៉ងត៍ ប្រមាណ១,៧លានតោនក្នុងមួយឆ្នាំ និងបានសម្ពោធដាក់ឱ្យដំណើរការនៅក្នុងឆ្នាំ២០១៨ ក្រោមអធិបតីភាពដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
រោងចក្រផលិតស៊ីម៉ងត៍ ជីបម៉ុង អ៊ិនស៊ី ស៊ីមេនមានទីតាំងនៅ តំបន់ភ្នំទូកមាសខាងលិច ស្រុកបន្ទាយមាស ខេត្តកំពតក្រុមហ៊ុនវិនិយោគ៖ ជីបម៉ុង អ៊ិនស៊ី ស៊ីមេន (Chip Mong Insee Cement Corporation)៕
ដោយ៖CEN
