បាត់ដំបង៖ យោងតាមរបាយការណ៍អាជ្ញាធរមីនកម្ពុជា បានឲ្យដឹងថា គិតត្រឹមចាប់ពីខែមករា ដល់ខែឧសភា ឆ្នាំ២០២០នេះ មានឧប្បទ្ទវហេតុគ្រោះថ្នាក់ ដោយសារមីនកើតឡើងចំនួន ២៦ករណី ដោយមានមនុស្សរងគ្រោះចំនួន ៣២នាក់ ស្លាប់៦នាក់ បើធៀបរយៈពេលដូចគ្នា ក្នុងឆ្នាំ២០១៩ មានការថយចុះ ១៣ភាគរយ។
ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនកម្ពុជា ទទួលបន្ទុកបេសកកម្មពិសេស បានសម្ដែងនូវការព្រួយបារម្ភ ខណៈបញ្ហាពលរដ្ឋកម្ពុជារងគ្រោះថ្នាក់ដោយសារ កាកសំណល់ពីសង្គ្រាមនៅដើមឆ្នាំ២០២០នេះ នៅតែមានកើតឡើងច្រើន ដែលបញ្ហានេះ សូមប្រជាពលរដ្ឋទាំងអស់មានការប្រុងប្រយ័ត្ន ។
ក្នុងពិធីលើកផ្ទាំងបាណូផ្សព្វផ្សាយពីបញ្ហាមីន និងសំណេះសំណាលដល់ពលរដ្ឋនៅក្នុងស្រុកសំឡូតខេត្តបាត់ដំបង កាលពីថ្ងៃទី២៤ ខែមិថុនា ឆ្នាំ២០២០។
ឯកឧត្តម លី ធុជ បានមានប្រសាសន៍ថា បញ្ហាគ្រោះថ្នាក់ដោយសារគ្រាប់មីននិងយុទ្ធភណ្ឌមិនទាន់ផ្ទុះ នៅឆ្នាំ២០២០នេះ បានកើតឡើងជាបន្តបន្ទាប់ ពិសេសនៅរដូវភ្ជួររាស់របស់កសិករ ដើម្បីធ្វើស្រែចម្ការ។ ករណីគ្រោះថ្នាក់ ដោយសារបញ្ហាកាកសំណល់ពីសង្គ្រាមនេះ គឺនៅក្នុងខេត្តបាត់ដំបង ពិសេសក្នុងស្រុកសំឡូត បានកើតឡើងច្រើនជាងគេ ដែលបញ្ហានេះទាមទារដល់គ្រប់ភាគីទាំងអស់ ត្រូវខិតខំឲ្យខ្លាំងក្លាបន្ថែមទៀត ពាក់ព័ន្ធនឹងការអប់រំផ្សព្វផ្សាយពីបញ្ហាមីន។
ឯកឧត្តម លី ធុជ បានស្នើដល់អាជ្ញាធរមូលដ្ឋាន ពិសេសភូមិឃុំ ដែលនៅមានចម្ការមីន ហើយមានពលរដ្ឋចំណាកស្រុកមកក្នុងមូលដ្ឋានខ្លួន ត្រូវទៅអប់រំប្រាប់ពួកគាត់ ពីដីចម្ការមីនឲ្យបានច្បាស់លាស់ ចៀសវាងមានករណីគ្រោះថ្នាក់លើពួកគាត់ ព្រោះបច្ចុប្បន្នករណីគ្រោះថ្នាក់ដោយកាកសំណល់ពីសង្គ្រាមនេះ ក៏មានកើតលើពលរដ្ឋចំណាកស្រុកច្រើនផងដែរ ហើយក៏ជំរុញដល់កងកម្លាំងបោសសម្អាតមីន ដាក់ស្លាកសញ្ញានានា នៅតាមចម្ការមីនឲ្យបានគ្រប់ចម្ការ ដើម្បីឲ្យពលរដ្ឋបានដឹងគ្រប់គ្នា៕
ដោយ៖អ៊ុងសារុំ
