កាលពីសប្តាហ៍មុននេះ អគ្គនាយក នៃអគ្គនាយកដ្ឋានកៅស៊ូ បានរាយការណ៍ជូនរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អំពីស្ថានភាពនៃផលិតកម្ម និងតម្លៃកៅស៊ូ។
តាមរបាយការណ៍របស់អគ្គនាយប៉ុល សុផា ចុះថ្ងៃទី ១៦ ខែមករា ឆ្នាំ ២០១៨ បានឲ្យដឹងថា កម្ពុជាមានផ្ទៃដីកៅស៊ូសរុបចំនួន ៤៣៦.៣៣៩ ហិកតា ដែលក្នុងនោះ ផ្ទៃដីចៀរជ័រមានចំនួន ១៧០ ២៣០ហិកតា ស្មើនឹង ៣៩.០១% និងផ្ទៃដីថៃទាំមានចំនួន ២៦៦.១០៩ ហិកតា ស្មើនឹង ៦០.៩៨ភាគរយ។
របាយការណ៍ខាងលើ បានឲ្យដឹងបន្តថា បរិមាណផលិតផលសម្រេចបានក្នុងរយៈពេល ១២ខែ មានចំនួន ១៩៣,២៨៦តោន បានកើនឡើងចំនួន ៤៨ ០៨៧ តោន ស្មើនឹង ៣៣ភាគយ បើធៀបនឹងរយៈពេលដូចគ្នាកាលពីឆ្នាំមុន។ បរិមាណបញ្ចេញលក់ ក្នុងរយៈពេល ១២ខែ មានចំនួន ១៨៨,៨៣២តោន បានកើនឡើងចំនួន ៤៣,៧៣២តោន ស្មើនឹង ៣០ភាគរយ បើធៀបនឹងរយៈពេលដូចគ្នាកាលពីមុន។
របាយការណ៍ដដែលបានឲ្យដឹងពីតម្លៃរបស់កៅស៊ូផងដែរថា ៖ “តម្លៃលក់ជ័រកៅស៊ូមធ្យមក្នុងរយៈពេល ១២ខែ គឺ ១៥៨៦ដុល្លារ ក្នុងមួយតោន បានកើនឡើង ៣០៣ដុល្លារ ក្នុងមួយតោន ស្មើនឹង ២៤ភាគរយ បើធៀបនឹងរយៈពេលដូចគ្នាកាលពីឆ្នាំមុន”។
យោងតាមការប៉ាន់ប្រមាណរបស់មជ្ឈមណ្ឌលឧត្តមភាពប្រពលវប្បកម្មកសិកម្មនិរន្តរភាព និងអាហារូបត្ថម្ភ ដែលទទួលបានការឧត្ថម្ភពីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិប្រចាំនៅកម្ពុជាហៅកាត់ថា (USAID) បានឲ្យដឹងថា ៨០% នៃប្រជាជនសរុបនៅក្នុងប្រទេសកម្ពុជាបានធ្វើការដោយផ្ទាល់ និងដោយប្រយោលជាមួយកសិកម្ម។ ៦៥ភាគរយ នៃមុខរបររបស់ប្រជាជន គឺពាក់ព័ន្ធនឹងវិស័យកសិកម្ម ហើយវិស័យនេះបានចូលរួមចំណែក ៣២ភាគរយនៃផលិតផលក្នុងស្រុកសរុប (GDP) នៅក្នុងឆ្នាំ ២០១៣។ ប្រទេសកម្ពុជា មានផ្ទៃដីប្រមាណ ៣,៧ លានហិកតា សម្រាប់ការងារដាំដុះ។
ដូច្នេះឯងទើប ក្នុងអំឡុងពេលនៃដំណើរទស្សនកិច្ចផ្លូវការរបស់សម្តេចនាយករដ្ឋមន្ត្រី ទៅកាន់ប្រទេសឥណ្ឌា ដែលមានរយៈពេល ៣ថ្ងៃ គឺគិតចាប់ពីថ្ងៃទី ២៤ ដល់ថ្ងៃទី ២៧ មករា ឆ្នាំ ២០១៨នេះ សម្តេចបានស្នើឲ្យប្រទេសឥណ្ឌាជួយពង្រឹងវិស័យកសិកម្មកម្ពុជា តាមរយៈប្រព័ន្ធព័ត៌មានវិទ្យារបស់ឥណ្ឌា ក្នុងការពិនិត្យមើលគុណភាពដី និងបែងចែកតំបន់ដាំដុះ។ ពិតណាស់ក្នុងនោះ មានដំណាំកៅស៊ូ ដែលជាដំណាំយុទ្ធសាស្ត្រ ដើម្បីរួមចំណែកអភិវឌ្ឍសេដ្ឋកិច្ចជាតិ ៕ ពាយ័ព្យ