កន្លងមក អាជ្ញាធរតែងតែចាប់យក និងដុតកម្ទេចចោលទំនិញខូចគុណភាពបែបនេះជារឿយៗ ហើយតែមទាំងអះអាងពីការបន្តខិតខំពង្រឹងការត្រួតពិនិត្យ និងទប់ស្កាត់ទំនិញខូចគុណភាពនៅលើទីផ្សារកម្ពុជាផងដែរ។
ងាកទៅកាន់ “អតីតកាល” បន្តិចឃើញថា ៖
កាលពីថ្ងៃទី៦ ខែសីហា នគបាលប្រឆាំងបទល្មើសសេដ្ឋកិច្ចបានដុតកម្ទេចចោលនូវសាច់ខូចគុណភាពជិត១តោន នៅទីលានចាក់សំរាមបឹងជើងឯក។ សាច់ខូចគុណភាពទាំងនោះរួមមានដូចជា ថ្លើមមាន់ ថ្លើមគោ បេះដូងគោ និងសាច់ចិញ្ច្រាំជាដើម។ ចំណែកនៅថ្ងៃដដែលនេះ មន្ត្រីកាំកុងត្រូលខេត្តសៀមរាប ក៏បានដកហូតណែមសាច់ត្រីខូចគុណភាពចំនួន ៤១គីឡូក្រាម ពីអាជីវករផងដែរ។ មែនទែនទៅ នេះមិនមែនជាលើកទី១ទេ ដែលអាជ្ញាធរធ្វើបែបនេះ។
ជង្គង់មាន់ ប្រហិតខូចគុណភាព ជារឿយៗតែងមាននាំចូលពប្រទេសថៃ ហើយត្រូវគេជឿថា ពេលខ្លះសមត្ថកិច្ចចាប់បាន និងពេលខ្លះទៀតបានចុលមកដល់កណ្តាលរាជធានី។ ពីខាងកើតការនាំចូលបន្ថែមានជាតិគីមីពីប្រទេសវៀតណាមក៏ជាបញ្ហាដ៏ចម្បងមួយដែរ។
ដោយឡែក នៅក្នុងផ្ទៃប្រទេសវិញ ការផលិត និងក្លែងក្លាយគ្រឿងបរិភោគដូចជាប៊ីចេង ស្ករត្នោតផលិតឡើងពីស្ករសដោយប្រើសារធាតុគីមី ការផលិតសំម្បកសាច់ក្រកដែលប៉ះពាល់សុខភាពជាដើម បានកក្រើកមួយរយៈចុងក្រោយនេះ។ តាមរយៈការរកឃើញរបស់សមត្ថកិច្ចជាបន្តបន្ទាប់បែបនេះ ធ្វើឲ្យមានសំណួរលើកឡើងថា តើអាជ្ញាធរ បានគិតគូរពីសុខមាលភាពប្រជាពលរដ្ឋបានកម្រិតណា?
កាលពីថ្ងៃទី ៩ មីនា មន្ត្រីកាំកុងត្រួលសហការជាមួយមន្ត្រីគយប្រចាំច្រកទ្វារអន្តរជាតិប៉ោយប៉ែត្រចាប់សាច់មាន់ និងប្រហិតខូចគុណភាពជាង១តោននាំចូលពីថៃ។ សកម្មភាពដែលឈ្មួញនាំចូលសាច់ខូចគុណភាពមកកម្ពុជា ធ្វើឡើងតាមរយៈការបង្កប់ក្នុងរទេះដោយដាក់ទំនិញពីលើ ដើម្បីបំភ័ន្តភ្នែកសមត្ថកិច្ច។
ប៉ុន្តែសំណួរនៅត្រង់ថា ហេតុអ្វីបានជាទំនិញខូចគុណភាពនៅតែបន្តមានចរាចរលើទីផ្សារ ខណៈដែលអាជ្ញាធរខិតខំទប់ស្កាត់បែបនេះ?
ពាក់ព័ន្ធបញ្ហានេះកន្លងមក ឯកឧត្តមរដ្ឋមន្ត្រីក្រសួងកសិកម្មអះអាងថា បានកុម្ម៉ង់ទិញម៉ាស៊ីនត្រួតពិនិត្យគុណភាពសាច់សត្វមកដែរ។ ប៉ុន្តែគិតមកដល់ពេលនេះ មន្ត្រីជំនាញអះអាងថា ម៉ាស៊ីននេះមិនទាន់មកដល់នៅឡើយទេ។
១ឆ្នាំ នៃរឿងរ៉ាវរៀបរាប់ខាងលើ បានកន្លងផុត អ្វីៗនៅប្រព្រឹត្តទៅធម្មតាៗ តាមតួនាទី ភារៈកិច្ចរៀងៗខ្លួន របស់ស្ថាប័នពាក់ព័ន្ធ។ មកទល់ពេលនេះ ពុំទាន់មានការកំណត់ជាក់លាក់ណាមួយថា ទំនិញខូចគុណភាព ប៉ះពាល់សុខភាពទាំងនាំចូលពីប្រទេសជិតខាង ក៏ដូចជាការផលិតលួចលាក់ក្នុងក្រុង ស្ថាប័នណាជាអ្នកទទួលខុសត្រូវ? ខណៈពេលស្ថាប័នភាគច្រើនតែង ស្នើសុំរដ្ឋាភិបាល ដាក់ប៉ុស្តិ៍ប៉មនៅ “ដើមទី” ដើម្បីអនុវត្តភារកិច្ច?
ចុងក្រោយ គឺរឿងប៊ីចេងសញ្ញា ខ្ទះ…ទ្រ…វែក តែម្តង។ បណ្តាស្ថាប័នគប្បីចងចាំប្រសាសន៍ផ្តែផ្តាំរបស់ប្រមុខរាជរដ្ឋាភិបាលថា ៖ កាត់សក់ ងូតទឹក ដុលក្អែល ឆ្លុះកញ្ចក់ និងវះកាត់៕