បន្ទាយមានជ័យ ៖ បុរសម្នាក់ជាសកម្មជនដីធ្លី ត្រូវចូលពន្ធនាគារជាលើកទី២ ក្នុងរឿងក្រៅពីដីធ្លី គឺធ្វើឲ្យខូចខាតមានស្ថានទម្ងន់ទោស (ដោយមានគ្នាច្រើននាក់ ក្នុងឋានៈជាចារី សហចារី(អ្នកផ្តើមគំនិត និងអ្នកសមគំនិត ) និងប្រើអំពើហិង្សាលើអ្នកកាន់កាប់អចលនទ្រព្យដោយសុចរិត ប្រព្រឹត្តនៅភូមិអូអំពិល ឃុំទួលពង្ស ស្រុកម៉ាឡៃ អំឡុងថ្ងៃទី១០ ខែមីនា ឆ្នាំ២០១៤ ដល់ខែតុលា ឆ្នាំ២០១៨ កន្លងមកនេះ។
យោងតាមដីកាបង្គាប់ឲ្យចាប់ខ្លួន របស់លោក ផេង កុសល ចៅក្រមស៊ើបសួរនៃសាលាដំបូងខេត្តបន្ទាយមានជ័យ លេខ១២៨ដខ/ចចុះថ្ងៃទី៣ ខែតុលា ឆ្នាំ២០១៩ បានបង្គាប់ឲ្យចាប់ខ្លួនឈ្មោះ កែវ យ៉យ ភេទប្រុស អាយុ៦៩ឆ្នាំ រស់នៅភូមិទួលពង្រ ឃុំទួលពង្រ ក្នុងបទចោទធ្វើឲ្យខូចខាតមានស្ថានទម្ងន់ទោស មកកាន់តុលាការ ។
នគរបាលប៉ុស្តិ៍រដ្ឋបាលឃុំ ស្រុក និងខេត្តបន្ទាយមានជ័យ បានចាប់ខ្លួនជនជាប់ចោទ កែវ យ៉យ ហើយបញ្ជូនដល់តុលាការខេត្ត និងបញ្ជូនទៅពន្ធនាគារកាលពីថ្ងទី២៦ ខែមិថុនា ឆ្នាំ២០២០ ។
នៅថ្ងៃទី២៦ ខែមិថុនាដដែលនោះ មនុស្សប្រមាណ៦០នាក់ ដែលអះអាងថា ជាពលរដ្ឋ និងសាច់ញាតិនៅភូមិជាមួយ បានលើកគ្នាមកប្រមូលផ្តុំនៅមុខសាលាខេត្ដ រួចបន្តទៅមុខស្នងការដ្ឋាននាភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
ជាមួយគ្នានោះដែរ ខណៈប្រជាពលរដ្ឋប្រមាណជាង៦០នាក់ ទៅស្នងការដ្ឋាននគរបាលខេត្ត លោកវរសេនីយ៍ទោ ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកម្រិតធ្ងន់ បានអះអាងថា ៖ ការដែលសមត្ថកិច្ចចាប់ឃាត់ខ្លួនឈ្មោះ កែវ យ៉យ នោះ គឺនគរបាលអ្នកអនុវត្តច្បាប់ គឺធ្វើតាមដីការបស់តុលាការ បើចង់សំណូមពរអ្វីទៅតុលាការចុះ ។
ជាមួយគ្នានោះដែរ បើយោងតាមពលរដ្ឋទាំងនោះថា លោក កែវ យ៉យ ត្រូវជាប់ពន្ធនាគារលើកទី២ហើយ ។ លើកនេះ គាត់ត្រូវចោទប្រកាន់ ៖ ១ លើកគ្នាដុតបំផ្លាញត្រាក់ទ័រ អេស្កាវ៉ាទ័រ ។ ២ វាយមនុស្ស (ម្ចាស់ដី ) និងវាយព្រះសង្ឃ។ ៣ វាយបំផ្លាញទ្រព្យសម្បត្តិសាធារណៈ ។
សមត្ថកិច្ចតុលាការ និងមន្ត្រីនគរបាលយុត្តិធម៌ បានបង្ហើបប្រាប់ថា ៖ ជនត្រូវចោទឈ្មោះ កែវ យ៉យ (ដែលពិការជើង ជាអតីតទាហានខ្មែរក្រហម) ។ ការចាប់ខ្លួនឈ្មោះ កែវ យ៉យ នេះមកពីជននេះមិនព្រមចូលខ្លួនតាមដីកាកោះ ដីកាបញ្ជូន ដីកាបង្គាប់ឲ្យនាំខ្លួនរបស់តុលាការ ៣ លើករួចមកហើយ គឺបន្ថែមពីលើបទចោទដូចខាងលើ ។ ប៉ុន្តែប្រភពមួយពីតុលាការខេត្តបន្ទាយមានជ័យ នៅល្ងាចថ្ងៃទី២៦ ខែមិថុនាថា ៖ លោក មាស ច័ន្ទពិសិដ្ឋ ព្រះរាជអាជ្ញា បានឲ្យលោក តេង សាម៉ៃ ព្រះរាជអាជ្ញារង ធ្វើការរឿងនេះជាមួយលោក ផេង កុសល ចៅក្រមស៊ើបសួរ តាមការការណែនាំរបស់លោក ងួន ណារ៉ា ប្រធានសាលាដំបូង គឺបានទទួលយកសំណូមពរមនុស្ស ដែលលើកគ្នាមកឈឺឆ្អាលនឹងជន ត្រូវចោទឈ្មោះ កែវ យ៉យ ហើយសុំឲ្យដោះលែងនោះ ប៉ុន្តែសូមឲ្យជ្រើសរើសរកមេធាវីជាតំណាងមកធ្វើការជាមួយតុលាការ ។ បន្ទាប់មកក្រុមមនុស្សលើកគ្នាមកទាំងនោះ បានរំសាយទៅវិញ ៕
ដោយ៖បញ្ញាស័ក្តិ
