ភ្នំពេញ៖ អាជ្ញាធររាជធានីភ្នំពេញ បានប្រើប្រាស់ម៉ាស៊ីនបូមសម្អាតធូលី ស្លឹកឈើ និងសំរាម ចំនួន២ គ្រឿង ដើម្បីបោសនៅតាមដងផ្លូវ និងតាមសួនច្បារនានានៅក្នុងរាជធានីភ្នំពេញ។ ម៉ាស៊ីនទាំងពីរ គ្រឿងនេះ ជាអំណោយរបស់ទីក្រុងណាននីង នៃសាធារណរដ្ឋប្រជាមានិតចិន ដែលជាទីក្រុងចងសម្ព័ន្ធមេត្រីភាព ជាមួយរាជធានីភ្នំពេញ ។
គួរបញ្ជាក់ថា ចំពោះការងារសម្អាតធូលី ស្លឹកឈើ សំរាមនិងអនាម័យ នៅតាមផ្លូវសាធារណៈ តាមសួនច្បារនានា តាមទីផ្សារនានាត្រូវបានលោកឃួង ស្រេង អភិបាលរាជធានីភ្នំពេញ បានយកចិត្តទុកដាក់ជាចម្បង ដើម្បីថែរក្សាអនាម័យនិងសុខុមាលភាព ជូនប្រជាពលរដ្ឋក្នុងទីក្រុងផង និងដើម្បីសោភ័ណភាពទីក្រុងភ្នំពេញផង ដោយលោកបានចាត់ចែង ដល់អង្គភាពជំនាញធ្វើកិច្ចការងារនេះដោយផ្ទាល់។
ពាក់ព័ន្ធការងារនេះលោក នួន សំណាវុធ អភិបាលរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ មានប្រសាសន៍ឲ្យដឹងថា ម៉ាស៊ីនបូមធូលី ស្លឹកឈើ និងសំរាមនេះ ជាអំណោយរបស់ទីក្រុងណាននីង ប្រទេសចិន ដែលបានបញ្ជូនមកឲ្យរាជធានីភ្នំពេញ ស្របពេលដែលទីក្រុងណាននីង ផ្តល់បរិក្ខារពេទ្យមួយចំនួន ដើម្បីប្រយុទ្ធប្រឆាំងនឹងជំងឺកូវីដ-១៩ កាលពីប៉ុន្មានខែកន្លងមកនេះ។
លោកក៏បានបញ្ជាក់ទៀតថា ម៉ាស៊ីនបូមទាំង២ខាងលើនេះ គឺសមត្ថភាពប្រើប្រាស់សម្រាប់បោសសម្អាត នៅក្នុងបរិវេណដែលផ្ទៃដីទំហំ ១៦០០០ ម៉ែត្រការ៉េក្នុង១ម៉ោង និងអាចបូមសម្អាតបាន ៨គីឡូម៉ែត្រក្នុងមួយម៉ោង។
ម៉ាស៊ីនបូមទាំង២នេះ កាលពីល្ងាចថ្ងៃទី២៩ ខែមិថុនា ឆ្នាំ២០២០ ត្រូវបានរដ្ឋបាលរាជធានីភ្នំពេញ យកមកធ្វើសកម្មភាពបូមសម្អាត នៅលើសួនច្បារមាត់ទន្លេ ចាប់ពីមុខផ្សារចាស់ រហូតដល់មុខវត្តឧណ្ណាលោម ហើយជាក់ស្តែងម៉ាស៊ីននេះ ពិតជាមានគុណភាពដែលអាចបូមសម្អាតធូលី ស្លឹកឈើ និងសំរាម បានស្អាត និងមិនធ្វើឱ្យធូលីហុយនោះទេ ព្រោះមានទឹកសម្រាប់បាញ់ស្រោប នៅពេលកំពុងប្រតិបត្តិការបូមធូលី។
លោក នួន សំណាវុធ បានបញ្ជាក់ថា ម៉ាស៊ីនបូមមទាំង២នេះ ជាម៉ាស៊ីនប្រើប្រាស់អាគុយ មិនបង្កផលប៉ះពាល់បរិស្ថាន ហើយបើខណ្ឌមួយចំនួន ត្រូវការអាចយកទៅប្រើប្រាស់ នៅក្នុងមូលដ្ឋានរបស់ខ្លួនបាន៕
ដោយ៖កូឡាប
