អ្នកស្រាវជ្រាវជំងឺជាន់ខ្ពស់អាមេរិច លោកវេជ្ជបណ្ឌិត Anthony Fauci បានថ្លែងប្រាប់ព្រឹទ្ធសភាអាមេរិចថា “លោកនឹងគ្មានការភ្ញាក់ផ្អើលទេ” ប្រសិនជាការឆ្លងនៅក្នុងប្រទេសកើនឡើងដល់ ១០០.០០០ករណីក្នុងមួយថ្ងៃ។
លោកបានផ្តល់សក្ខីកម្មនៅព្រឹទ្ធសភាថា “ច្បាស់ណាស់ យើងមិនទាន់បានគ្រប់គ្រងវាបានទេឥឡូវនេះ” និងបានព្រមានថា ពលរដ្ឋអាមេរិចកាំងមិនទាន់គ្រប់គ្រាន់ទេ ដែលធ្វើការពាក់ម៉ាស ឬក៏អនុវត្តគម្លាតសង្គម។
នៅក្នុងអំឡុងសវនការ លោកនិយាយថា ករណីឆ្លងថ្មីប្រហែលពាក់កណ្តាល គឺកើតឡើងនៅក្នុង ៤រដ្ឋ។
មុននេះ អភិបាលរដ្ឋ New York បាននិយាយថា ពលរដ្ឋអាមេរិចកាំងជិតពាក់កណ្តាល ត្រូវដែលដាក់ខ្លួនឲ្យនៅដាច់ដោយឡែក ប្រសិនជាពួកគេបានធ្វើដំណើរមករដ្ឋ New York។
សូមបញ្ជាក់ថា កាលពីថ្ងៃអង្គារ ករណីឆ្លងថ្មីនៅអាមេរិចកើនដល់ ៤៧.០០០ករណីក្នុងរយៈពេលត្រឹម ១ថ្ងៃ ដែលវាជាការឆ្លងដ៏ច្រើនបំផុត នៅអាមេរិចចាប់តាំងពីវីរុសរាតត្បាតមក។
អាមេរិចជាប្រទេសដែលមានការឆ្លង និងស្លាប់ច្រើនបំផុតដោយសារ COVID-19 ហើយបើតាមតួលេខចុងក្រោយ អាមេរិចមានអ្នកឆ្លងជិត ២,៧លនានាក់ និងស្លាប់ជាង ១២៩.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
