អ្នកស្រាវជ្រាវនៅក្នុងប្រទេសចិនបានរកឃើញជំងឺផ្តាសាយជ្រូកប្រភេទថ្មី ដែលមានសមត្ថភាពបង្កឲ្យមានការរាតត្បាតបាន។ នេះបើតាមការសិក្សាដែលចុះផ្សាយកាលពីថ្ងៃចន្ទ នៅលើទស្សនាវដ្តីវិទ្យាសាស្ត្រអាមេរិច PNAS។
ផ្តាសាយជ្រូកប្រភេទថ្មីនោះត្រូវបានគេដាក់ឈ្មោះថា G4 ដែលវាមានហ្សែនពីប្រភេទជំងឺផ្តាសាយ H1N1 ដែលបានរាតត្បាតកាលពីឆ្នាំ ២០០៩។
ជំងឺប្រភេទថ្មីនោះមានចំណុចសំខាន់ៗដែលអាចសម្របខ្លួនខ្ពស់ ក្នុងការឆ្លងទៅកាន់មនុស្សបាន។ នេះបើតាមអ្នកនិពន្ធ អ្នកវិទ្យាសាស្ត្រនៅសកលវិទ្យាល័យចិន និងមជ្ឈមបណ្ឌលដើម្បីគ្រប់គ្រង និងបង្ការជំងឺ។
ចាប់ពីឆ្នាំ ២០១១ ដល់ ២០១៨ អ្នកស្រាវជ្រាវបានយកសំណាកចំនួន ៣០.០០០ចេញពីសត្វជ្រូកនៅទីសត្វឃាតជាច្រើន នៅក្នុងខេត្តចំនួន ១០របស់ចិន និងមន្ទីរពេទ្យសត្វ ដែលធ្វើឲ្យពួកគេអាចញែកវីរុសផ្តាសាយជ្រូកចំនួន ១៧៩។
ក្រុមអ្នកស្រាវជ្រាវបានធ្វើការពិសោធន៍ផ្សេងៗគ្នា រួមមានពិសោធន៍លើសត្វសំពោចដែលត្រូវបានគេប្រើប្រាស់ យ៉ាងទូលំទូលាយក្នុងការសិក្សាពីជំងឺផ្តាសាយ ដោយសារតែសត្វទាំងនោះមានរោគសញ្ញាស្រដៀងគ្នា ទៅនឹងមនុស្ស ដូចជាគ្រុនក្តៅ ក្អក និងកណ្តាស់ជាដើម។
ជំងឺផ្តាសាយជ្រូក G4 ត្រូវបានគេសង្កេតឃើញថា មានការឆ្លងខ្ពស់ខ្លាំងនៅក្នុងកោសិការមនុស្ស និងបង្កឲ្យមានរោគសញ្ញាធ្ងន់ធ្ងរ នៅក្នុងសត្វសំពោចជាងវីរុសផ្សេងៗទៀត។
ការធ្វើតេស្តសាកល្បងក៏បានបង្ហាញដែរថា ភាពស៊ាំដែលមនុស្សបានមកពីជំងឺផ្តាសាយតាមរដូវ មិនអាចជួយការពារពីការឆ្លងជំងឺផ្តាសាយជ្រូក G4ឡើយ។
បើយោងតាមការធ្វើតេស្តឈាម ដែលបង្ហាញពីអង្គបដិប្រាណ ដែលបង្កើតឡើងដោយការប៉ះពាល់នឹងវីរុស ១០,៤ភាគរយ នៃកម្មករដែលធ្វើការនៅកន្លែងចិញ្ជឹមជ្រូកមានការឆ្លងវីរុសរួចទៅហើយ។
ដូច្នេះ វីរុសនោះបានចម្លងពីសត្វមកកាន់មនុស្សរួចហើយ ប៉ុន្តែមិនមានភស្តុតាងនៅឡើយទេថា វាអាចចម្លងពីមនុស្សទៅកាន់មនុស្សបានទេ។ នេះជាការព្រួយបារម្ភដ៏ធំរបស់អ្នកវិទ្យាសាស្ត្រ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
