ស្ត្រីអាយុ ៥៥ ឆ្នាំ ម្នាក់ មកពីប្រទេសចិន ស្ទើរបាត់បង់ជីវិត បន្ទាប់ពីឈាមនៅក្នុងខួរក្បាលរបស់នាងបានច្រាលឡើង ខណៈនាងកំពុងព្យាយាមស្រែកច្រៀងឡើងតុងខ្ពស់ពេក នៅក្នុងអំឡុងច្រៀងខារ៉ាអូខេសប្បាយជាមួយក្រុមគ្រួសារ។
កាសែតចិន Peninsula Morning Post បានចុះផ្សាយឲ្យដឹងថា ស្ត្រីឈ្មោះ Zhang ខណៈកំពុងច្រៀងខារ៉ាអូខេជាមួយគ្រួសាររបស់នាង កាលពីថ្ងៃទី៥ ខែមិថុនា នៅពេលនោះ នាងបានច្រៀងបទចម្រៀងមួយដែលមានតុងខ្ពស់។ ប៉ុន្តែ ខណៈព្យាយាមច្រៀងតុងខ្ពស់ អ្នកស្រី Zhang ស្រាប់តែត្រូវឈឺក្បាល ក្អួតចង្អោរ និងដេកដួលគ្រឹបតែម្តង។ ភ្លាមៗនោះ អ្នកស្រី Zhang ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យក្រុង Dalian ទីកន្លែងដែលការស្កេន CT ត្រូវបានធ្វើឡើង។
លទ្ធផល បានបង្ហាញថា អ្នកស្រីបានដាច់សរសៃឈាមខួរក្បាល និងត្រូវធ្វើការវះកាត់សង្គ្រោះបន្ទាន់ ។ ក្រោយរយៈពេល២ម៉ោង នៃការសង្គ្រោះយ៉ាងយកចិត្តទុកដាក់ពីក្រុមគ្រូពេទ្យ អ្នកស្រី Zhang បានរួចផុតពីអាយុជីវិត។
តើអ្វីទៅជាការប៉ោងសរសៃឈាមក្រហម?
យោងតាមសេវាសុខភាពជាតិចក្រភពអង់គ្លេស បានឲ្យដឹងថា ជំងឺប៉ោងសរសៃឈាម គឺជាចំណុចមួយនៅក្នុងសរសៃឈាម ដែលបណ្តាលមកពីភាពខ្សោយនៃជញ្ជាំងសរសៃឈាម។ នៅពេលដែលឈាមឆ្លងកាត់សរសៃឈាមខ្សោយ នោះសម្ពាធឈាម បានធ្វើឲ្យឱ្យផ្នែកតូចមួយនៃសរសៃឈាមឡើងប៉ោងដូចបាល់តែម្តង៕
ប្រែសម្រួល៖ លឹម ហុង (ប្រភព៖ worldofbuzz)
