ភ្នំពេញ៖ អាជ្ញាធរខណ្ឌដូនពេញ បានដាក់ផែនការយ៉ាងម៉ឺងម៉ាត់ ដើម្បីរៀបចំតំបន់ភូមិ២ ភូមិ៣ ក្នុងសង្កាត់ស្រះចក ចំណុចផ្លូវរថភ្លើងដែលគេដឹងថាជាចំណុចខ្មៅនៃសម្បុកគ្រឿងញៀន និងបង្ក្រាបមិនចេះអស់ ឲ្យក្លាយជាតំបន់ស ដោយបង្រ្កាបគ្រឿងញៀនឲ្យអស់ពីតំបន់នោះ។ សូមបញ្ជាក់ថា គិតពីខែវិច្ឆិកា ឆ្នាំ២០១៨ ដល់ខែមិថុនា ឆ្នាំ២០២០ សមត្ថកិច្ចបង្ក្រាបបាន១៤៩ករណី ឃាត់ខ្លួនជនសង្ស័យចំនួន២៤៤ នាក់ នៅក្នុងតំបន់ខាងលើ។
ក្នុងកិច្ចប្រជុំដើម្បីរៀបចំតំបន់ភូមិ២ ភូមិ៣ ក្នុងសង្កាត់ស្រះចក ចំណុចផ្លូវរថភ្លើង កាលពីថ្ងៃទី៣០ មិថុនា លោកសុខ ពេញវុធ អភិបាលខណ្ឌដូនពេញ បានលើកឡើងថា៖ ជំហានដំបូងនៃការទប់ស្កាត់បទល្មើសគ្រឿងញៀននៅតំបន់នេះគឺត្រូវមានការស្រង់ស្ថិតិអ្នករស់នៅពិតប្រាកដ អត្តសញ្ញាណមនុស្សចេញចូល។យើងចង់ប្រែក្លាយតំបន់នេះឲ្យទៅជាតំបន់ ស ដោយមិនចង់ឲ្យក្លាយជាតំបន់ខ្មៅដូចរាល់ដងដោយសារគ្រឿងញៀននោះទេ យ៉ាងហោចណាស់ក៏បានទប់ស្កាត់ឬកាត់បន្ថយការប្រើ ប្រាស់,ចែកចាយ ,ជួញដូរគ្រឿងញៀននៅទីនេះដែរ។ លោកអភិបាលខណ្ឌបាន អរគុណដល់សមត្ថកិច្ច និងអាជ្ញាធរសង្កាត់ពាក់ពន្ធ័ដែលប្រឹងប្រែងទប់ស្កាត់បទល្មើសគ្រឿងញៀននៅតំបន់នេះកន្លងមក។គិតពីខែវិច្ឆិកា ឆ្នាំ២០១៨ដល់ខែមិថុនា ឆ្នាំ២០២០សមត្ថកិច្ចបង្ក្រាបបាន១៤៩ករណីឃាត់ខ្លួនជនសង្ស័យចំនួន២៤៤ នាក់ ស្រីចំនួន៣២នាក់។
លោកឧត្តសេនីយ៏ទោ ហួត ចាន់យ៉ារ៉ាន់ ស្នងការរងទទួលបន្ទុកផែនប្រឆាំងគ្រឿងញៀននៃស្នងការដ្ឋាននគរបាលរាជធានីភ្នំពេញបានលើកឡើងថា៖យើងនឹងរៀបចំតំបន់ផ្លូវR6ផ្លូវរថភ្លើងនេះឲ្យដូចនៅតំបន់ត្រពាំងឈូកមុខពេទ្យលោកសង្ឃដូច្នេះដែរ។យើងនឹងរៀបចំផែនការឲ្យបានច្បាស់លាស់និងប្រាកដនិយមធ្វើយ៉ាងណាទប់ស្កាត់ឲ្យបានកំរិតខ្ពស់បំផុត។ទីតាំងភូមិ ២និងភូមិ៣ផ្លូវR6នេះជាតំបន់ត្រីកោណនៃភូមិសាស្ត្រខណ្ឌ៣គឺខណ្ឌដូនពេញ,ខណ្ឌទួលគោក និងខណ្ឌឬស្សីកែវ។ពេលនេះខណ្ឌដូនពេញចេញដំណើរមុនគេនិងអនុវត្តវិធានការទប់ស្កាត់បទល្មើសគ្រឿងញៀនដោយអនុវត្តព្រមគ្នាជាមួយ សង្កាត់ទាំង១១ក្នុងខណ្ឌតែម្តង៕
ដោយ៖កូឡាប