សាកសពយ៉ាងតិចចំនួន ៥០នាក់របស់កម្មកររ៉ែថ្មត្រូវបានទាញយកចេញ ពីល្បាប់ភក់នៅថ្ងៃព្រហស្បតិ៍នេះ ក្រោយពេលមានការរអិលបាក់ដីនៅភាគខាងជើងប្រទេសមីយ៉ានម៉ា ខណៈដែលភ្លៀងម៉ូសុងបានធ្វើឲ្យស្ថានភាពគ្រោះថ្នាក់ខ្លាំង។ នេះបើតាមការបញ្ជាក់របស់ភ្នាក់ងារពន្លត់អគ្គិភ័យ។
មនុស្សជាច្រើនបានស្លាប់ជារៀងរាល់ឆ្នាំ ពេលកំពុងធ្វើការនៅក្នុងវិស័យនេះ ដោយសារមានការគ្រប់គ្រងមិនសូវល្អលើឧស្សាហ៍កម្មនេះ ដោយការប្រើប្រាស់កម្មករចំណាកស្រុក មានប្រាក់ចំណូលទាបដើម្បីឲ្យជីករកត្បូង ដែលមានតម្រូវការខ្លាំងនៅក្នុងប្រទេសចិន។
ហេតុការណ៍បាក់ដីនោះកើតឡើងនៅពេលព្រឹកថ្ងៃព្រហស្បតិ៍ ស្ថិតនៅជាប់ព្រំដែនប្រទេសចិនក្នុងរដ្ឋ Kachin ក្រោយពេលមានភ្លៀងធ្លាក់យ៉ាងខ្លាំង។ នេះបើតាមការស្ថាប័នពន្លត់អគ្គិភ័យរបស់មីយ៉ានម៉ាថ្លែងក្នុងហ្វេសបុក។
សេចក្តីប្រកាសបន្តទៀតថា កម្មកររករ៉ែថ្មត្រូវបានគ្របដោយល្បាប់ភក់។
កម្មករទាំងនោះបានរុករកត្បូងថ្មមានតម្លៃនៅតាមតំបន់ភ្នំខ្ពស់ៗនៅក្នុងតំបន់ Hpakant ដែលមានការជីករកពីមុនៗ។
សូមបញ្ជាក់ថាការរអិលបាក់ដីកើតមាននៅតំបន់នោះជាញឹកញាប់ ហើយជនរងគ្រោះជារឿយៗ មកពីសហគមន៍ជនជាតិដើមភាគតិច ដែលស្វែងរកសំណល់ដី ដែលទុកចោលដោយក្រុមហ៊ុនធំៗ។
អង្គការឃ្លាំមើលសិទ្ធិមនុស្ស Watchdog Global បានធ្វើការប៉ាន់ប្រមាណថា ឧស្សាហកម្មរ៉ែមានចំណូលជាទឹកប្រាក់ប្រមាណ ៣១ពាន់លានដុល្លារអាមេរិចនៅក្នុងឆ្នាំ ២០១៤ ទោះបីជាប្រាក់ចំណូលបានរដ្ឋតិចតួចក្តី៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
