បាត់ដំបងៈ ឯកឧត្តម ងួន រតនៈ អភិបាលខេត្តបាត់ដំបង និងជាអនុប្រធានកិត្តិយសាខាកាកបាទក្រហមកម្ពុជាខេត្តបាត់ដំបង បានជំរុញឲ្យឃុំតាគ្រាម និងអភិបាលស្រុកបាណន់ ត្រូវពន្លឿននិងចុះស្រង់ប្រជាពលរដ្ឋក្រីក្រពិតប្រាកដ ក្នុងមូលដ្ឋានដែលងាយរងគ្រោះដោយផលប៉ះពាល់ជំងឺកូវីដ-១៩។ ប្រជាពលរដ្ឋចំនួន៥៥គ្រួសារ ដែលងាយរងគ្រោះ ដោយសារផលប៉ះជំងឺកូវីដ ១៩ដែលរស់នៅក្នុងឃុំតាគ្រាម ស្រុកបាណន់ ខេត្តបាត់ដំបង បានទទួលអំណោយមនុស្សធម៌ ពីសាខាកាកបាទក្រហមកម្ពុជាខេត្តបាត់ដំបង កាលពីថ្ងៃទី២ ខែកក្កដា ឆ្នាំ២០២០នេះ។
ឯកឧត្តម ងួន រតនៈ អភិបាលខេត្តបាត់ដំបង និងជាអនុប្រធានកិត្តិយសសាខាកាកបាទក្រហមកម្ពុជាខេត្តបាត់ដំបង និងឯកឧត្តមបណ្ឌិត ប៊ុត គឹមស៊ាន ប្រធានគណៈកម្មាធិការសាខានិងសហការី ជាច្រើនរូបទៀត បានចុះសួរសុខទុកដោយនាំយកនូវអំណោយមនុស្សធម៌ ផ្តល់ជូនបងប្អូនប្រជាពលរដ្ឋក្រីក្រ និងកំពុងតែជួបនូវផលប៉ះពាល់ដោយសារតែវិបត្តិកូវិដ-១៩។ អំណោយដែលនាំយកទៅចែកជូនដល់ក្រុមគ្រួសារទាំង៥៥គ្រួសារនោះ មានជនចាស់ជរាគ្មានទីពឹង ស្ត្រីមេម៉ាយ ជនក្រីក្រកូនច្រើន និងជនពិការទីទ័លក្រ ខ្លាំងដែលមកពីភូមិទាំង១១ ដែលបានធ្វើឡើងក្នុងបរិវេណ ” វត្តចន្ទតាគ្រាម ” ឃុំតាគ្រាម ស្រុកបាណន់ ខេត្តបាត់ដំបង ដើម្បីជាការឆ្លើយតបពីតម្រូវការជាក់ស្តែង នៃការខ្វះខាតស្បៀងអាហាររបស់បងប្នូន នៅក្នុងដំណាក់កាល ដែលប្រទេសកម្ពុជាកំពុងតែប្រយុទ្ធប្រឆាំងជំងឺកូវីដ ១៩ តាមរយៈការជួបសំណេះសំណាលជាមួយនិងគ្រួសារក្រីក្រ បងប្អូនពិការ និងទីទ័លក្រផងដែរ។
ឯកឧត្តម ងួន រតនៈ អភិបាលខេត្តបាត់ដំបង និងជាអនុប្រធានកិត្តិយសសាខាកាកបាទក្រហមកម្ពុជាខេត្តបាត់ដំបង បាននាំនូវការផ្ដាំផ្ញើសួរសុខទុក្ខពី សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេច តែងតែផ្តោតការយកចិត្តទុកដាក់ គិតគូរខ្ពស់បំផុតចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់រើសអើងវណ្ណៈ ពណ៌សម្បុរជំនឿសាសនា ឬនិន្នាការនយោបាយ ណាមួយឡើយ។ ដោយសារតែវិបត្តិជាសកល ពីកូវីដ-១៩ សម្ដេចកិតិព្រឹទ្ធបណ្ឌិត តែងតែគិតគូរនិងបានយកចិត្តទុក្ខដាក់ខ្លាំង ចំពោះបងប្អូនប្រជាពលរដ្ឋ ដែលងាយរងគ្រោះនៅតាមមូលដ្ឋាន ព្រោះតែវិបត្តិកូវីដ-១៩ វាបានធ្វើឲ្យប៉ះពាល់ដល់សេដ្ឋកិច្ច និងជីវភាពវរបស់បងប្អូន ក្នុងការប្រកបមុខរបរប្រចាំថ្ងៃបង្កផលប៉ះពាល់ដល់ គ្រួសារចាស់ជរានិងគ្មានទីពឹង កុមារកំព្រា ស្ត្រីមេម៉ាយក្រីក្រមានកូនច្រើន អ្នកផ្ទុកមេរោគអេដស៍ និងជនពិការទីទ័លក្រ។ អំណោយមនុស្សធម៌ទាំងអស់នេះ គឺបានមកពីការកៀរគរ តាមរយៈសប្បុរសជននានា ហើយវាគ្រាន់តែអាចជួយសម្រួលនូវការខ្វះខាតជីវភាពរស់នៅ របស់បងប្អូនបានមួយរយៈពេលខ្លីតែប៉ុណ្ណោះ៕ ដោយ៖អ៊ុងសារុំ
