នេះជារឿងរ៉ាវភ្ញាក់ផ្អើល និងគួរឲ្យកោតសរសើរខ្លាំងមែនទែន ចំពោះក្មេងស្រីអាយុ ១០ ឆ្នាំ ដែលមានភាពក្លាហានបញ្ចេញនូវពាក្យប្រដែប្រដៅ ទៅដល់បុរសកំហូចម្នាក់ ដែលបានលួចថតម្តាយរបស់នាង។ ហេតុការណ៍ដ៏ហួសចិត្តនេះ បានកើតឡើងកាលពីថ្ងៃទី២៩ ខែមិថុនា ឆ្នាំ២០២០ នៅពេលដែលប៉ូលិសក្រុង Patthalung ធ្វើការចាប់ខ្លួនបុរសម្នាក់អាយុ ២១ ឆ្នាំ ពីផ្សារមួយកន្លែងនៅក្នុងខេត្ត Patthalung (ថៃ)។
យោងតាមប្រភពព័ត៌មានបានឲ្យដឹងថា ស្ត្រីរងគ្រោះអាយុ ៣៧ ឆ្នាំ ដែលទើបតែទិញអីវ៉ាន់រួច បានដើរទៅកាន់បន្ទប់ទឹក ។ ខណៈពេលនាងកំពុងរៀបចាកចេញពីបន្ទប់ទឹក ជនសង្ស័យក៏ចាប់ផ្តើមថតនាងតែម្តង។ ភ្លាមៗនោះ អ្នកឡើងផ្សារនៅក្បែរនោះ ដែលបានប្រទះឃើញនូវអ្វីបុរសនោះកំពុងធ្វើហាក់មិនសមរម្យ ក៏បានធ្វើការឃាត់ខ្លួនប្រគល់ឲ្យប៉ូលិសតែម្តង។
ជនសង្ស័យបានសារភាពថា រូបគេពិតជាបានថតជនរងគ្រោះប្រាកដមែន ដោយមិនគ្មានការយល់ព្រមពីនាង។ រូបគេក៏បានអះអាងថា នេះជាលើកដំបូងដែលបានធ្វើដូច្នេះ ហើយថាគ្រាន់តែចង់សាកថតប៉ុណ្ណោះ។
ទោះយ៉ាងណា នៅពេលប៉ូលិសធ្វើការឆែកឆេរទូស័ព្ទ ពួកគេបានរកឃើញរូបភាពជនរងគ្រោះជាច្រើននាក់ និងសូម្បីវីដេអូដ៏មិនសមរម្យជាច្រើនផងដែរ ។ ជាលទ្ធផល បុរសរូបនេះត្រូវបានផាកពិន័យ ១ ពាន់បាត ជាមួយការព្រមាន មុនពេលអនុញ្ញាតឲ្យមានសេរីភាពវិញ។
ប៉ុន្តែ មុនពេលចាកចេញពីប៉ុស្តិ៍ប៉ូលីស កូនស្រីអាយុ ១០ ឆ្នាំ របស់ស្ត្រីរងគ្រោះ ក៏បាននិយាយប្រដែប្រដៅទៅកាន់ជនរូបនេះយ៉ាងចាស់ៗដៃថា៖ «តើអ្នកដឹងទេថា អ្នកជាគំរូអាក្រក់សម្រាប់កុមារ? ជនជាតិថៃត្រូវបានគេសន្មតថាជាមនុស្សដ៏ល្អ។ ខ្ញុំតូចមែនពិត តែខ្ញុំដឹងច្បាស់ជាងអ្នកធំដូចក្របី ប៉ុន្តែ អ្នកបែរជាមិនស្គាល់នូវអ្វីដែលល្អ ឬអាក្រក់បែបនេះ។ អ្នកកំពុងធ្វើអាកប្បកិរិយាថោកទាប អ្នកគួរតែកែខ្លួនធ្វើឲ្យបានល្អជាងនេះទៅ។ មែនដឹងទេថា ឪពុកម្តាយ និងកូន មានការសោកសៅយ៉ាងណា។ តើឪពុកម្តាយរបស់អ្នក នឹងមានអារម្មណ៍យ៉ាងណា ប្រសិនបើពួកគាត់ដឹងថារឿងនេះបានកើតឡើង? ចូរកុំធ្វើទង្វើបែបនេះម្តងទៀត ចំពោះម្តាយឪពុក ឬក្មេងដទៃទៀត”។
ក្រោយស្តាប់ការប្រដៅទូន្មានដ៏គួរឲ្យអាម៉ាសទាំងនេះរួច ជនសង្ស័យក៏បានសុំទោសក្មេងស្រីតូចនោះ ហើយនាងព្រមទទួលយកការសុំទោសនេះផងដែរ៕
ប្រែសម្រួល៖ លឹម ហុង (ប្រភព៖ Khaosod)