កណ្តាល៖ ស្នងការដ្ឋាននគរបាលខេត្តកណ្តាល បានឲ្យដឹងថា នគរបាលស្រុកកៀនស្វាយបានឃាត់ខ្លួនជនសង្ស័យម្នាក់ ជាបុគ្គលិកធនាគារមួយ ករណីក្លែងឯកសារសាធារណៈ (ធ្វើត្រាឃុំក្លែងក្លាយ)
ដោយរៀបចំ ឯកសារ ក្លែងក្លាយដោយមាន បោះត្រាមូល និងត្រាឈ្មោះក្លែងក្លាយ លើលិខិតផ្ទេរសិទ្ធិកាន់កាប់ ប្រើប្រាស់ដីធ្លី និង ផ្ទះសម្បែង ដើម្បីយកទៅដាក់នៅមីក្រូហិរញ្ញវត្ថុខេមា យកប្រាក់បានចំនួន
៣០.០០០ដុល្លារ។ ករណីនេះបានកើតហេតុថ្ងៃទី២ ខែកក្កដា ឆ្នាំ២០២០ វេលាម៉ោង១៦និង៣០នាទី ចំណុចភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល ។
ជនរងគ្រោះ ២នាក់គឺ១.ឈ្មោះមៀច ផៃ ភេទប្រុស អាយ៦៧ឆ្នាំ ជនជាតិខ្មែរ មុខរបរជំទប់ទី១ មានទីលំនៅភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល ។ ២.ឈ្មោះឡាង ថុលភេទប្រុស អាយុ៦៧ឆ្នាំ ជនជាតិខ្មែរ មុខរបរ មេភូមិ មានទៅលំនៅ ភូមិរទាំងត្បូង ឃុំភូមិធំ ស្រុកកៀនស្វាយ ខេត្តកណ្តាល ។
ចំណែកជនសង្ស័យឈ្មោះម៉ៃ វណ្ណៈ ភេទប្រុសអាយុ៣១ឆ្នាំ ជនជាតិ ខ្មែរ មុខរបរ បុគ្គលិកធនាគារ មានលំនៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល ។ វត្ថុតាងចាប់យក៖ ត្រាមូលឃុំក្លែងក្លាយ០១ ត្រាឈ្មោះ០២ ។
នគរបាលបញ្ជាក់ពីសភាពនៃរឿងហេតុនេះថា នៅថ្ងៃខែឆ្នាំនិងម៉ោងខាងលើ ប៉ុស្តិ៍នគរបាលរដ្ឋបាលភូមិធំ បានទទួលព័ត៌មាន ថាមានគេបន្លំធ្វើលិខិត ផ្ទេរសិទ្ធិកាន់កាប់ ប្រើប្រាស់ដីធ្លី និង ផ្ទះសម្បែង ដោយមានត្រាក្លែងក្លាយ ទាំងឈ្មោះ ហត្ថលេខា និង ត្រា ថែមទៀត ពេលទទួលបានពាក្យបណ្តឹងភ្លាម កម្លាំងនគរបាលប៉ុស្តិ៍ភូមិធំ សហការជាមួយកម្លាំងនគរបាលយុត្តិធម៌ស្រុក បានហៅ ជនសង្ស័យខាងលើមកសាកសួរនៅប៉ុស្តិ៍នគរបាល រដ្ឋបាលភូមិធំ ។
នៅចំពោះមុខសមត្ថកិច្ច ជនសង្ស័យឈ្មោះ ម៉ៃ វណ្ណៈ ភេទប្រុស បានឆ្លើយសារភាពថាខ្លួន បានឆាតទៅកន្លែងឆ្លាក់ត្រា តាមរយៈFacebook ដែលមានយីហោឆ្លាក់ត្រា ពីចម្ងាយឲ្យធ្វើត្រាឃុំភូមិធំ និងត្រាឈ្មោះឲ្យខ្លួន ក្នុងតម្លៃ២០ដុល្លារ ពេលបានត្រាហើយខ្លួន ក៏រៀបចំឯកសារ ក្លែងក្លាយដោយមាន បោះត្រាមូល និងត្រាឈ្មោះក្លែងក្លាយ លើលិខិតផ្ទេរសិទ្ធិកាន់កាប់ ប្រើប្រាស់ដីធ្លី និង ផ្ទះសម្បែង ដើម្បីយកទៅដាក់នៅមីក្រូហិរញ្ញវត្ថុខេមា យកប្រាក់បានចំនួន
៣០.០០០ដុល្លារ ដើម្បីប្រកបមុខរបរ ប្រាកដមែន ។ ករណីនេះ សមត្ថកិច្ចបន្តចាត់ការ តាមនីតិវិធី ៕
ដោយ៖កូឡាប
