ភ្នំពេញ៖ នារីវ័យក្មេងម្នាក់ បានធ្វើឲ្យអ្នកប្រើប្រាស់បណ្តាញសង្គមសម្តែងនូវក្តីអាណិតអាសូរជាខ្លាំង និងបួងសួងសូមឲ្យនាងរួចផុតពីគ្រោះថ្នាក់ នៅពេលបានដឹងថានាងត្រូវពស់ពិស១ក្បាលចឹកចំស្មា បណ្តាលឲ្យឡើងពងបែកស្លោក និងជាំខ្មៅភ្លាមៗយ៉ាងសាហាវ។ ហេតុការណ៍ដ៏រន្ធត់នេះ ត្រូវបានដឹងថាបានកើតឡើងនៅពេលដែលនារីរងគ្រោះ កំពុងលក់ដូរនៅក្រោមដើមឈើ នាឆ្នេរកែបក្បែរផ្សារក្តាម កាលពីព្រឹកថ្ងៃទី៣ ខែកក្កដា ឆ្នាំ២០២០ ។
ជុំវិញហេតុការណ៍ដ៏មិននឹកស្មាននេះផងដែរ តាមរយៈគណនីហ្វេសប៊ុកឈ្មោះ Thida Mean បានបង្ហោះឲ្យដឹងថា៖ «ពស់ចឹកគាត់ព្រឹកមិញ ពេលនេះគេឲ្យបញ្ជូនទៅភ្នំពេញហើយ សូមជួយសង្រោះជីវិតគាត់ផង តើអាចជួយគាត់ឲ្យរួចផុតពីពិសពស់នេះបានទេ? លេខមីងគាត់0884363732 កំពុងធ្វើដំណើរទៅភ្នំពេញ ពេលនេះយើងខ្ញុំបានប្រមូលថវិកាបន្តិចបន្តួចជួយដល់ប្អូនស្រី សូមអរគុណទាំងអស់គ្នាពីទឹកចិត្តមួយនេះ» ។
បើតាមសាច់ញាតិរបស់នារីរងគ្រោះ បានប្រាប់ឲ្យដឹងថា ក្រោយហេតុការណ៍បានកើតឡើង នាងត្រូវបានក្រុមគ្រួសារដឹកយកមកសង្គ្រោះបន្ទាន់នៅមន្ទីរពេទ្យលោកសង្ឃ ប៉ុន្តែ ខាងមន្ទីរពេទ្យពុំហ៊ានទទួលទេ ដោយឲ្យបញ្ជូនទៅកាន់ពេទ្យទាហានវិញ។ បងស្រីជាសាច់ញាតិរូបនោះ ក៏បានបញ្ជាក់ឲ្យដឹងផងដែរថា នាងត្រូវបានក្រុមគ្រូពេទ្យនៅទីនោះ ធ្វើការចោះគ្រលៀនលាងឈាមយកពិសចេញ ហើយមកទល់ពេលនេះ នាងបានធូរស្រាលបន្តិចហើយ ប៉ុន្តែ អាការពីមុខរបួសដ៏សាហាវនេះទៅមុខទៀត វិវឌ្ឍយ៉ាងណា ពុំទាន់ដឹងទេ។
តាមរយៈនេះផងដែរ យើងក៏សូមអំពាវនាវដល់សប្បុរសជន ជួយឧបត្ថម្ភដល់ប្អូនស្រីខាងលើផង ដែលអាចទំនាក់ទំនងបានតាមរយៈលេខមីងរបស់ប្អូនស្រី 0884363732 ៕ ដោយ៖ លឹម ហុង