ប្រទេសចិន កាលពីថ្ងៃសុក្រម្សិលមិញនេះ បានប្តេជ្ញាបញ្ឈប់ជាបន្តបន្ទាប់នូវការសម្លាប់ និងលក់បសុបក្សីរស់នៅផ្សារ ដែលការប្រកាសរបស់ចិននេះ ត្រូវបានសកម្មជនសិទ្ធិសត្វស្វាគមន៍ ចំពេលកំពុងមានការរាតត្បាតវីរុសកូរ៉ូណា។
សេចក្តីប្រកាសកើតឡើង ក្រោយពេលចិនបានធ្វើការត្រួតពិនិត្យលើផ្សារលក់ចំណីអាហារបោះដុំ និងចាត់ទុកថា ការលក់ និងការបរិភោគសត្វព្រៃជាការខុសច្បាប់។
វីរុសកូរ៉ូណា ត្រូវបានគេជឿជាក់ថាផ្ទុះចេញពីទីផ្សារលក់សត្វរស់ នៅកណ្តាលទីក្រុងវូហាន កាលចុងឆ្នាំមុន។
មន្ត្រីរដ្ឋបាលសម្រាប់គ្រប់គ្រងផ្សារ លោក Chen Xu បាននិយាយថា “ចិននឹងរឹតត្បិតការជួយដូរ និងការសម្លាប់បសុបក្សីរស់ ដោយលើកទឹកចិត្តឲ្យមានការសម្លាប់សត្វនៅកន្លែងមួយជាក់លាក់ និងបិទផ្សារលក់បសុបក្សីរស់បន្តិចម្តងៗ”។
ការដាក់សត្វរស់នៅក្នុងទ្រុងសម្រាប់លក់ជារឿងធម្មតា នៅក្នុងផ្សារលក់អាហារបោះដុំ និងផ្សារសើម ទូទាំងប្រទេសចិន។ បសុបក្សីត្រូវគេសម្លាប់នៅកន្លែងលក់ដោយអ្នកទិញ ឬអ្នកទិញអាចយកវាទៅសម្លាប់នៅផ្ទះពួកគេក៏បាន។
ប្រជាជនមួយចំនួនជឿជាក់ថា ការសម្លាប់សត្វភ្លាមៗ វាធ្វើឲ្យសាច់សត្វនៅស្រស់៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
