ភ្នំពេញ៖ បច្ចុប្បន្ននេះ បើទោះនៅតាមបណ្តាដងផ្លូវ និងផ្ទះជាច្រើន ត្រូវបានបំពាក់កាមេរ៉ាសុវត្ថិភាពយ៉ាងណា ក៏អំពើចោរកម្មលួចឆក់ ប្លន់ តែងតែកើតឡើងជារឿយៗរៀងថ្ងៃ មិនថានៅក្នុងទីក្រុង ឬ ជនបទស្រុកស្រែ។
យ៉ាងណាមិញ សម្រាប់ការបាត់បង់របស់ទ្រព្យដោយសារអំពើចោរកម្មលួចនេះផងដែរ ក៏ត្រូវបានគេស្តីបន្ទោសថា មកពីម្ចាស់ខ្វះការប្រុងប្រយ័ត្ន ដោយមើលស្រាលសំអាងថារបស់ទ្រព្យរបស់ខ្លួន ត្រូវបានចាក់សោសុវត្ថិភាពទៅហើយ ដោយពុំបានគិតថា ពួកចោរមានជំនាញខ្ពស់ប៉ុនណានោះទេ។
ជាក់ស្តែង ដូចជាករណីចោរកាច់កម៉ូតូនេះជាដើម ដែលត្រូវបានដឹងថាបានកើតឡើងនៅផ្ទះមួយកន្លែងក្នុងទីក្រុងភ្នំពេញ វេលាម៉ោង ១៦ និង៤២ នាទី ថ្ងៃទី១ ខែកក្កដា ឆ្នាំ២០២០ ដោយពួកចោរ២នាក់ បានធ្វើសកម្មភាពត្រឹមតែ ២ នាទី ប៉ុណ្ណោះ ជិះយកទៅដោយសុវត្ថិភាព ខណៈផ្លាកលេខម៉ូតូចោរ បានត្រឹមគេមើលឃើញថាដូចជាលេខៈ 1A 3010។
តាមរយៈវីដេអូនេះផងដែរ សូមបងប្អូនប្រជាពលរដ្ឋយើង ត្រូវមានការប្រុងប្រយ័ត្នជានិច្ច កុំប្រហែសអាងមានកាមេរ៉ាសុវត្ថិភាព ឬ ម៉ូតូទំនើបត្រូវចាក់សោគិតថាសុវត្ថិភាពឲ្យសោះ៕ ដោយ៖ លឹម ហុង