ឪពុកម្តាយរបស់ក្មេងប្រុសខូចម្នាក់ ដែលត្រូវបានចាប់ដាក់ខ្នោះដោយប៉ូលីស បានកំពុងគំរាមដាក់ពាក្យប្តឹង ដោយចោទថា បានធ្វើទង្វើឃោរឃៅមកលើកូនប្រុសរបស់ពួកគេ ។
ឪពុកម្តាយដែលមានឈ្មោះ Rolando Fuentes និង Mercy Alvarez រស់នៅ Miami, រដ្ឋ Florida បាននិយាយថា កូនប្រុសអាយុ ៧ ឆ្នាំ របស់ពួកគេ បានទៅចូលរួមក្នុងមជ្ឈមណ្ឌល Coral Way Bilingual K-8 កាលពីថ្ងៃព្រហស្បតិ៍ កន្លងមក ។ នៅពេលនោះ គ្រូរបានប្រាប់វាឲ្យឈប់លេងអាហាររបស់វា ។ ប៉ុន្តែ បន្ទាប់ភ្លាមនោះ ក្មេងជ្រលឺមនេះ បានដើរចូលទៅពីក្រោយអ្នកគ្រូរបស់គេ និងចាប់ចាប់ផ្តើមវាយប្រហារនាងយ៉ាងសាហាវតែម្តង ។
វាបានលើកជើងទាត់ធាក់ និងដាល់អ្នកគ្រូ ខណៈនាងប្រឈមមុខនឹងវា ។ ពួកគេទាំងពីរបានដេកដួលទៅនឹងដីទាំងអស់គ្នា ខណៈក្មេងប្រុសចិត្តឆៅនេះបានចាប់បោចសក់ និងវាយអ្នកគ្រូគ្មានត្រាប្រណីដៃ ។
ដោយហេតុការណ៍នេះ កាន់តែសាហាវ ប៉ូលីសត្រូវបានហៅមកកាន់កន្លែងកើតហេតុ ដើម្បីអន្តរាគមន៍ ។ ពួកគេបន្ទាប់មក បានសម្រេចចាប់ខ្លួន និងនាំយកក្មេងប្រុសនេះ ទៅកាន់មន្ទីរពេទ្យទាំងដៃជាប់ខ្នោះ ដើម្បីវាយតម្លៃបញ្ហាផ្លូវចិត្ត ។
ប៉ូលិសនិយាយថា ឥរិយាបទបច្ចុប្បន្នរបស់ក្មេងប្រុសនេះ ធ្វើឲ្យពួកគេជឿថា វាកំពុងមានបញ្ហាសុខភាពផ្លូវចិត្ត ។ ប៉ុន្តែ ខាងក្រុមគ្រូពេទ្យបានបញ្ជាក់ថា ក្មេងប្រុសនេះពុំមានបញ្ហាអ្វីនោះទេ ។
ទោះយ៉ាងណា ឪពុកម្តាយរបស់គេ Alvarez និង Fuentes និយាយថា ពួកគេកំពុងគ្រោងដាក់ពាក្យប្តឹង ប្រឆាំងសាលា និងប៉ូលីស ដោយសារវិធីដ៏ខុសឆ្គងដាក់ខ្នោះកូនប្រុសរបស់ពួកគេបែបនេះ ៕ ចន្ទី
