ភ្នំពេញ៖ បន្ទាប់ពីមានហេតុការណ៍រអិលបាក់ដី ក្នុងការដ្ឋានជីកយករ៉ែមួយកន្លែង នៃតំបន់ Hapakant ដែលបានបណ្តាលឲ្យបាត់បង់អាយុជីវិតប្រជាជន១៧២នាក់ ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គសព្វព្រះរាជហឫទ័យប្រោសព្រះរាជទានព្រះរាជសាររំលែកទុក្ខយ៉ាងក្រៀមក្រំជាទីបំផុត ជូន ឯកឧត្តម U WIN MYINT ប្រធានាធិបតី នៃសាធារណរដ្ឋសហភាពមីយ៉ាន់ម៉ា ចំពោះឧបទ្ទវហេតុដ៏រន្ធត់នេះ។
បើតាមការផ្សាយព័ត៌មានរបស់ព្រះបរមរាជវាំង Royal du Cambodge នៅថ្ងៃទី៤ខែកក្កដាឆ្នាំ២០២០ បានឲ្យដឹងថា “ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យប្រោសព្រះរាជទានព្រះរាជសាររំលែកទុក្ខយ៉ាងក្រៀមក្រំជាទីបំផុត ជូន ឯកឧត្តម U WIN MYINT ប្រធានាធិបតី នៃសាធារណរដ្ឋសហភាពមីយ៉ាន់ម៉ា ចំពោះឧបទ្ទវហេតុដ៏រន្ធត់ ការរអិលបាក់ដី ក្នុងការដ្ឋានជីកយករ៉ែមួយកន្លែង នៃតំបន់ Hapakant ដែលបានបណ្តាលឲ្យបាត់បង់អាយុជីវិតប្រជាជនជាច្រើនរយនាក់”។
បើតាមការចេញផ្សាយ ដោយសារព័ត៌មាន CNA នាព្រឹកថ្ងៃសៅរ៍ ទី០៤ ខែកក្កដា ឆ្នាំ២០២០
ឧបទ្ទវហេតុដ៏រន្ធត់ ការរអិលបាក់ដី ក្នុងការដ្ឋានជីកយករ៉ែមួយកន្លែង នៃតំបន់ Hapakant បណ្តាលឲ្យកម្មករអណ្តូងរ៉ែចំនួន ១៧២នាក់ បានស្លាប់ ។ នេះមិនមែនជាលើកទី ១ នោះទេសម្រាប់ប្រទេសមីយ៉ាន់ម៉ា ដែលបានកើតមានករណីបាក់អណ្តូងរ៉ែ ឬក៏ហេតុការណ៍រអិលបាក់ដី នៅតំបន់ដែលមានសកម្មភាពរុករករ៉ែ។
អាជ្ញាធររដ្ឋកាឈីន (Kachin) ភាគខាងជើងប្រទេសមីយ៉ាន់ម៉ា បានជីករណ្តៅដ៏ធំមួយ ដើម្បីបញ្ចុះសាកសពកម្មរអណ្តូងរ៉ែរាប់រយនាក់រួមគ្នាតែម្តង ក្រោយពីពួកគេបានបាត់បង់ជីវិត នៅក្នុងគ្រោះរអិលបាក់ដី ដែលបានកើតមានឡើង កាលពីប៉ុន្មានថ្ងៃមុន។
គួរបញ្ជាក់ថា នៅទីតាំងជុំវិញរណ្តៅកប់សាកសព មានប្រជាជន និងសាច់ញាតិជនរងគ្រោះ បានសម្តែងការសោកស្តាយ ចំពោះការបង់ជីវិតគួរឲ្យសង្វេគបំផុត។ អាជ្ញាធររដ្ឋកាឈីន ដែលស្ថិតនៅជាប់ព្រំដែនចិន បានបញ្ជាក់ថា នៅមានសាកសពមួយចំនួនទៀត អាចកំពុងកប់ក្នុងល្បាប់ដីនៅឡើយ ដែលត្រូវការក្រុមសង្គ្រោះរុករកបន្តទៀត។
គ្រោះអកុសលនោះកើតឡើងកាលពីព្រឹកថ្ងៃព្រហស្បិ៍ នៅពេលដែលកាកសំណល់ដី នៅកន្លែងរករ៉ែថ្ម បានបាក់ចូលក្នុងទន្លេ និងបានកប់កម្មករជាច្រើនអ្នក។
ហេតុការណ៍ដ៏រន្ធត់នោះកើតឡើង ក្រោយពេលមានភ្លៀងធ្លាក់ខ្លាំងនៅក្នុងរដ្ឋ Kachin ស្ថិតនៅក្បែរព្រំដែនប្រទេសចិន។ នេះបើតាមការបញ្ជាក់របស់ភ្នាក់ងារពន្លត់អគ្គិភ័យ បង្ហោះនៅលើហ្វេសប៊ុករបស់ខ្លួន។
ប៉ូលិសប្រចាំតំបន់ថ្លែងប្រាប់ AFP ដូច្នេះថា កម្មកររករ៉ែមិនអើពើទៅនឹងការព្រមាន ដែលមិនឲ្យមានការរុករកនៅពេលភ្លៀងធ្លាក់។
សូមបញ្ជាក់ថា ការរអិលបាក់ដីកើតមានជាញឹកញាប់នៅតំបន់ខាងលើ ជាពិសេសនៅពេលមានភ្លៀងធ្លាក់ខ្លាំង។
កាលពីឆ្នាំ ២០១៥ មានការរអិលបាកដីដ៏ធំនៅក្នុងប្រទេសនេះ បណ្តាលឲ្យមនុស្សជាង ១០០នាក់ស្លាប់។
មីយ៉ាន់ម៉ាជាប្រភពនៃរ៉ែថ្មដ៏សំខាន់ ហើយឧស្សាហកម្មរ៉ែមានតម្រូវការយ៉ាងច្រើនសម្រាប់ពីប្រទេសចិន៕
ដោយ៖កូឡាប
