មន្ត្រីជាន់ខ្ពស់ក្នុងទីក្រុងហុងកុង បាននិយាយនៅថ្ងៃសៅរ៍នេះថា ពួកគេមានការ “ខកចិត្តខ្លួនយ៉ាងខ្លាំង” ចំពោះការសម្រេចចិត្តរបស់ប្រទេសកាណាដា ក្នុងការផ្អាកកិច្ចព្រមព្រៀង ធ្វើបត្យាប័នជាមួយនឹងហុងកុង ហើយហុងកុង បានធ្វើការបន្ទោសទីក្រុងវ៉ាស៊ីនតោនថា បានជ្រៀតជ្រែកចូលកិច្ចការផ្ទៃក្នុងរបស់ខ្លួន។
ក្រុងប៉េកាំងបានធ្វើការអនុម័តច្បាប់សន្តិសុខថ្មីមួយ នៅសប្តាហ៍នេះលើទីក្រុងហុងកុង បើទោះបីជាមានការតវ៉ាពីប្រជាជនហុងកុង និងប្រទេសលោកខាងលិចដែលបានកំណត់ថា ទីក្រុងហុងកុងកំពុងតែនៅលើផ្លូវនៃរបបផ្តាច់ការ។
ប្រធានផ្នែកសន្តិសុខហុងកុង John Lee បានថ្លែងនៅថ្ងៃសោរ៍នេះថា “រដ្ឋាភិបាលកាណាដាត្រូវតែធ្វើការពន្យល់អំពីនីតិរដ្ឋ និងពន្យល់ទៅកាន់ពិភពលោក ថាហេតុអ្វីកាណាដាអនុញ្ញាតឲ្យជនរត់គេខ្លួនមិនទទួលខុសត្រូវចំពោះទង្វើពួកគេ”។
លោក John Lee មានការខកចិត្តយ៉ាងខ្លាំង និងប្រឆាំងចំពោះវិធានការរបស់កាណាដា ខណៈដែលកាណាដាអនុញ្ញាតឲ្យបញ្ហានយោបាយលុបលើនីតិរដ្ឋ។
ការប្រកាសរបស់ហុងកុង កើតឡើងក្រោយពេលកាណាដា ចេញសេចក្តីប្រកាសនៅថ្ងៃសុក្រម្សិលមិញនេះ ដោយបញ្ជាក់ពីការផ្អាកកិច្ចព្រមព្រៀង ធ្វើបត្យាប័នជាមួយនឹងហុងកុង បន្ទាប់ពីមានច្បាប់សន្តិសុខថ្មី ដែលអាចជំរុញឲ្យមានការធ្វើអន្តោប្រវេសន៍ យ៉ាងច្រើនចេញពីហុងកុង។
នាយករដ្ឋមន្ត្រីកាណាដា Justin Trudeau បានថ្លែងប្រាប់អ្នកសារព័ត៌មានថា កាណាដាក៏នឹងធ្វើការហាមការនាំចេញសម្ភារយោធាទៅកាន់ហុងកុងផងដែរ។
នៅថ្ងៃសោរ៍នេះដែរ រដ្ឋមន្ត្រីក្រសួងយុត្តិធម៌ហុងកុង អ្នកស្រី Teresa Cheng បាននិយាយថា គាត់មានការខកចិត្តយ៉ាងខ្លាំង និងសម្តែងការសោកស្តាយចំពោះវិធានការរបស់កាណាដា។ អ្នកស្រីគិតថា ការសម្រេចចិត្តនោះប្រហែលរំលោភច្បាប់អន្តរជាតិ។
កាលពីថ្ងៃសុក្រ អ្នកនាំពាក្យរដ្ឋាភិបាលហុងកុង បានចាត់ទុកច្បាប់ដែលអនុម័តដោយព្រឹទ្ធសភាអាមេរិចថា ជាការមិនអាចទទួលយកបានទាំងស្រុង។ អាមេរិចបានអនុម័តច្បាប់ដាក់ទណ្ឌកម្ម លើធនាការទាំងឡាយណាដែលធ្វើជំនួយជាមួយនឹងមន្ត្រីចិន ដែលបានអនុវត្តច្បាប់សន្តិសុខថ្មី។
សូមបញ្ជាក់ថា ទីក្រុងហុងកុង ត្រូវបានអង់គ្លេសប្រគល់ទៅឲ្យចិនវិញកាលពីថ្ងៃទី ១ ខែកក្កដា ឆ្នាំ ១៩៩៧ ក្រោមកិច្ចព្រមព្រៀងអង់គ្លេសចិន ដោយក្នុងកិច្ចព្រមព្រៀងនោះ ចិនត្រូវផ្តល់សិទ្ធិសេរីភាព និងស្វ័យភាពកម្រិតខ្ពស់ដល់ហុងកុងសម្រាប់រយៈពេល ៥០ឆ្នាំទៅមុខ។ ហុងកុងជាភ្នែកមួយរបស់ចិន ប៉ុន្តែហុងកុងមានប្រព័ន្ធដឹកនាំផ្សេងពីចិន។ ប៉ុន្តែការធ្វើច្បាប់សន្តិសុខរបស់ចិនលើហុងកុង ត្រូវបានអ្នកជំនាញលើកឡើងថា វានឹងបំផ្លាញដល់សិទ្ធិសេរីភាព និងស្វ័យភាពរបស់ហុងកុង។
អាមេរិចបានប្រកាសថា ហុងកុងលែងមានស្វ័យភាពកម្រិតខ្ពស់ពីចិនទៀតហើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
