អាជ្ញាធរប្រេស៊ីលកាលពីថ្ងៃពុធ បានបង្ហាញឲ្យដឹងថា ភ្លើងឆេះព្រៃអាម៉ាហ្សូននៅក្នុងប្រទេសប្រេស៊ីល បានកើនឡើង ១៩,៥ ភាគរយ នៅក្នុងខែមិថុនា បើប្រៀបធៀបទៅនឹងខែដូចគ្នានេះកាលពីឆ្នាំមុន ដែលធ្វើឱ្យខែមិថុនាឆ្នាំនេះអាក្រក់បំផុត ក្នុងរយៈពេល ១៣ ឆ្នាំ។
ខែមិថុនាគឺជាការចាប់ផ្តើមនៃរដូវប្រាំង ហើយមានករណីអគ្គិភ័យកើតឡើងចំនួន ២.២៤៨ ដែលធ្វើឱ្យក្រុមអ្នកវិភាគរំពឹងថាជាឆ្នាំដ៏អាក្រក់មួយសម្រាប់ព្រៃទឹកភ្លៀងនេះ ជាងការបំផ្លិចបំផ្លាញកាលពីឆ្នាំ២០១៩ ដែលបានបង្កឱ្យរលកកំហឹងទូទាំងពិភពលោក។
អ្វីដែលអាក្រក់បំផុត ត្រូវបានគេរំពឹងទុកថាកើតឡើងនៅក្នុងខែសីហា។ កាលពីឆ្នាំមុនមានអគ្គិភ័យជាង ៣០.០០០ នៅខែនេះ គឺកើនឡើង ៣ ដងបើប្រៀបធៀបនឹងខែដដែលក្នុងឆ្នាំ ២០១៨ ។
ភ្លើងឆេះព្រៃភាគច្រើននៅអាម៉ាហ្សូន គឺបណ្តាលមកពីការដុតបំផ្លាញ និងមានទំនាក់ទំនងដោយផ្ទាល់ទៅនឹងការកាប់បំផ្លាញព្រៃឈើ ដែលភាគច្រើនបណ្តាលមកពីកសិករដាំដំណាំសម្រាប់ការដាំដុះ។
ការកាប់បំផ្លាញព្រៃឈើនៅក្នុងប្រទេសប្រេស៊ីល គឺខ្ពស់ណាស់នៅឆ្នាំនេះមុនរដូវប្រាំង ដែលមានទំហំផ្ទៃដីជាង ២.០០០ គីឡូម៉ែត្រក្រឡា បានបាត់បង់នៅចន្លោះខែមករា និងឧសភា ដែលជាការកើនឡើង ៣៤ ភាគរយក្នុងរយៈពេលដូចគ្នាក្នុងឆ្នាំ ២០១៩។
វិទ្យាស្ថានស្រាវជ្រាវបរិស្ថានអាម៉ាហ្សូនប៉ាន់ស្មានថា ព្រៃចំនួន ៩.០០០ គីឡូម៉ែត្រក្រឡា ត្រូវបានកាប់បំផ្លាញអស់ហើយតាំងពីឆ្នាំមុន អាចនឹងឆេះរាលដាលមុនដើមខែសីហា។
អ្នកឯកទេសក៏ជឿជាក់ផងដែរថា ការកើនឡើងនៃភ្លើងឆេះព្រៃ អាចបង្កើនការពិបាកដកដង្ហើម សម្រាប់ប្រជាជនដែលរងគ្រោះដោយមេរោគឆ្លងថ្មីនេះ៕
ប្រែសម្រួល៖ លឹម ហុង (ប្រភព៖ worldofbuzz)