ខេត្តព្រះសីហនុ៖ សមត្ថកិច្ចក្នុងគណបញ្ជាការឯកភាពរដ្ឋបាលខេត្តព្រះសីហនុ មាននគរបាល កងរាជអាវុធហត្ថនិងអជ្ញាធរពាក់ព័ន្ធ នៅព្រឹកថ្ងៃ៥ ខែកក្កដា ឆ្នាំ២០២០នេះ ធ្វើប្រតិបត្តិការដេញបង្ក្រាបអំពើប្លន់យកប្រាក់៣០លានរៀល ពីពលរដ្ឋអ្នកប្រកបរបរដូរលុយ ក្នុងនោះមានជនសង្ស័យម្នាក់ ក្នុងចំណោមបក្ខពួក២នាក់ ជាជនជាតិចិន ត្រូវបានឃាត់ខ្លួន។
របាយការណ៍ពីសមត្ថកិច្ចប្រាប់ថា ជនល្មើសមានគ្នា២នាក់ ជាជនជាតិចិន បានធ្វើសកម្មភាពស្ទាក់ប្លន់ ដោយប្រើដំបងវាយទៅលើជនរងគ្រោះ២នាក់ប្តីប្រពន្ធកំពុងជិះម៉ូតូតាមផ្លូវចេញ ចូលម្តុំជិតបុរីហ៊ីលតុនក្នុងសង្កាត់លេខ៤ក្រុងព្រះសីហនុ វេលាម៉ោងជិត៩ព្រឹកថ្ងៃទី៥កក្កដានេះ បណ្តាលឲ្យជនរងគ្រោះរងរបួស ក្នុងនោះជនល្មើសប្លន់យកលុយពីជនរងគ្រោះមួយថង់ប្រមាណ៣០លានរៀល រួចគេចខ្លួន ប៉ុន្តែពេលកើតហេតុការណ៍នេះ ក៏មានអន្តរាគមន៍ពីកងសន្តិសុខ ព័ទ្ធចាប់បានជនសង្ស័យម្នាក់ និងបានប្រគល់ជូនកម្លាំងកងរាជអាវុធហត្ថខេត្តនាំយកទៅសាកសួរបន្ត ។
ចំណែកជនល្មើសម្នាក់ទៀតបានរត់គេចខ្លួនចូលក្នុងព្រៃម្តុំនោះ នាំយកលុយប្លន់បានទៅជាមួយ ដោយបន្សល់ទុកម៉ូតូជិះធ្វើសកម្មភាព បច្ចុប្បន្ននគរបាលជំនាញស្នងការដ្ឋាននគរបាលខេត្តនាំយកមករក្សាទុក ហើយប្រតិបត្តិការរុករកជនល្មើសដែលរត់គេចខ្លួនកំពុងធ្វើបន្ត ៕ដោយ៖បញ្ញាស័ក្តិ
