ភ្នំពេញ៖ បទចម្រៀងមួយបទមានចំណងជើងថា «អ្នកព្រៃវែងអាក្រក់ត្រង់ណា» ឃើញថាបានទទួលរងការរិះគន់ពីមហាជនជាខ្លាំង ចំពោះឈុតមួយនៃបទចម្រៀងនេះ បង្ហាញបុរសជាឪពុកម្នាក់ចូលស្តីដណ្តឹងប្រពន្ធឲ្យកូនប្រុសរបស់ខ្លួន តែបែរជាត្រូវម្តាយខាងស្រីបានបដិសេធ និងបណ្តេញចុះពីភ្លាមៗ ក្រោយពីបានដឹងថាឪពុកនិងកូនប្រុសនោះជាអ្នកខេត្តព្រៃវែង ដោយម្តាយខាងស្រីបានលើកហេតុផលឡើងថាសុទ្ធតែជាពូជចោរលួច ចោរប្លន់ កាប់ចាក់ និងសុំទានជាដើម។ នេះជាឈុតមួយហាក់បីដូចបង្ហាញពីការរើសអើង និងមាក់ងាយដល់អ្នកព្រៃវែងជាខ្លាំង ជាពិសេសធ្វើឲ្យប៉ះពាល់ដល់អារម្មណ៍អ្នកល្អយ៉ាងច្រើន។
ទាក់ទងនឹងឈុតសម្តែងដ៏ហួសចិត្តនេះផងដែរ ឯកឧត្តម ស សុខា រដ្ឋលេខាធិការ ក្រសួងអប់រំ យុវជន និងកីឡា បានបញ្ចេញទស្សនៈ តាមរយៈទំព័រហ្វេសប៊ុកឯកឧត្តម កាលពីថ្ងៃទី៥ ខែកក្កដា ឆ្នាំ២០២០ យ៉ាងដូច្នេះថា៖ “តើអ្នកព្រៃវែងខុសអី? ក្នុងនាមយុវជនម្នាក់ខ្ញុំពិតជាមានការសោកស្ដាយ និងហួសចិត្តពេលបានឃើញនិងស្ដាប់អត្ថន័យបទចម្រៀងនេះ។ មិនខុសពីការរិះគន់របស់បងប្អូនអ្នកប្រើប្រាស់បណ្តាញសង្គមជាច្រើនទៀត ខ្លឹមសារនេះមានចរិតរើសអើង បំបែកបំបាក់ជាតិសាសន៍ បន្ទាបតម្លៃអ្នកព្រៃវែង បន្តុះបង្អាប់កិត្តិយស ប្រមាថសេចក្ដីថ្លៃថ្នូរក្នុងនាមប្រជាពលរដ្ឋ ដែលមានសិទ្ធិពេញលេញនិងសេចក្ដីថ្លៃថ្នូរដ៏បរិបូរណ៍នាសម័យបច្ចុប្បន្ន”។
ឯកឧត្តម បានថ្លែងថា “ខ្ញុំយល់ថា អ្នកគ្រប់គ្រងការផលិត អ្នកដឹកនាំសម្ដែង ផលិតករ អ្នកនិពន្ធ គួរពិចារឱ្យបានគ្រប់ជ្រុងជ្រោយបំផុតជុំវិញផលប៉ះពាល់សតិអារម្មណ៍ និងសង្គមទាំងមូល មុននឹងផលិតចេញជាសាធារណៈ។ ចំណែកអ្នកចម្រៀង អ្នកសម្ដែង ក៏គួរពិចារណាដោយជួយកេះគ្នាពិនិត្យកែសម្រួលខ្លឹមសារផងដែរ”។
ធាតុពិតអ្នកព្រៃវែងពុំមានចរិតលក្ខណៈដូចអត្ថន័យសម្ដែងក្នុងបទនេះទេ។ អ្នកព្រៃវែងស្លូតបូត ឧស្សាហ៍ព្យាយាមប្រកបរបរការងារផ្សេងៗ។ ទោះជាមានចំណុចអវិជ្ជមានខ្លះ តែនោះជាឥរិយាបថបុគ្គល ហើយមិនមែនតែអ្នកព្រៃវែង និងមិនមែនមានតែស្រុកខ្មែរដែរ។ សូមកុំយកទស្សនៈ (ត្រីមួយកន្ត្រកស្អុយមួយស្អុយទាំងអស់)មកអនុវត្ត។ ជាសំណូមពរ ខ្ញុំគិតថា ក្រុមការងារផលិតគប្បីចេញមុខសុំទោសជាសាធារណៈ និងដកចេញគ្រប់ប្រព័ន្ធនៃការផ្សព្វផ្សាយទាំងអស់។
ជាថ្មីម្ដងទៀត ក្រុមការងារផលិតមុននឹងផលិត ត្រូវពិនិត្យឱ្យបានគ្រប់ជ្រុងជ្រោយ ជាពិសេសការទទួលខុសត្រូវសង្គម និងការប្រឈមផ្លូវច្បាប់។ ក្នុងករណីនេះ អាចចាត់ថាជាការញុះញុងឱ្យមានការរើសអើង ការជេរប្រមាថ…ដែលសុទ្ធតែជាបទល្មើសព្រហ្មទណ្ឌ។ តែទោះយ៉ាងណា យើងគាំទ្រនិងលើកទឹកចិត្តរាល់ការផលិតស្នាដៃនានា ដើម្បីលើកកម្ពស់វិស័យសិល្បៈវប្បធម៌ជាតិរបស់យើង ឈរលើវិជ្ជាជីវៈត្រឹមត្រូវ៕ ដោយ៖ លឹម ហុង