តាកែវ៖ នៅរសៀលថ្ងៃទី ៦ ខែកក្កដា ឆ្នាំ២០២០នេះ ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការកោះហៅម្ចាស់កាស៊ីណូចំនួន៨ នៅតាមបន្ទាត់ព្រំដែននៃប្រទេសជិតខាង មកធ្វើការណែនាំ និងផ្សព្វផ្សាយអំពីគោលការរបស់រាជរដ្ឋាភិបាល ដែលបានសម្រេចឲ្យបើកដំណើរការឡើងវិញនៅកាស៊ីណូ
ដើម្បីទ្រទ្រង់ស្ថានភាពសេដ្ឋកិច្ច ចំពោះបងប្អូនប្រជាពលរដ្ឋជាច្រើននាក់ បម្រើការងារនៅទីនោះ ត្រូវបានផ្អាកបិទឈប់សម្រាក ក្រោយមានវត្តមានវីរុសកូរូណា ហៅកូវីដ១៩ នៅក្នុងប្រទេសកម្ពុជា កាលប៉ុន្មានខែកន្លងមកនេះ។
លោកស្នងការបានមានប្រសាសន៍ថា ដោយសារតែនៅក្នុងប្រទេសកម្ពុជារបស់យើង កំពុងតែជួបប្រទះនឹងបញ្ហាជំងឺកូវីដ១៩ ដែលជាជំងឺឆ្លងដ៏សាហាវ ឈានទៅដល់ធ្វើឲ្យមនុស្សឆ្លងវីរុសនេះ និងស្លាប់បាត់បង់ជីវិតនៅលើសាកលលោករាប់លាននាក់ តែប្រទេសកម្ពុជា មានករណីឆ្លងវីរុសកូវីដនេះដែរ តែមិនមានអ្នកស្លាប់នោះទេ ហើយបានធ្វើការព្យាបាលបានជាសះស្បើយជាបន្តបន្ទាប់ និងមានការអន់ថមថយនៃជំងឺកូវីដ១៩នេះពីមួយថ្ងៃផងដែរ រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន បានប្រកាសឲ្យបើកដំណើរការកាស៊ីណូ និងកែតម្រូវពី ក្លឹបកម្សាន្ត និង KTV មកជាភោជនីយដ្ឋានឡើងវិញ ដោយគោរពទៅតាមបទដ្ឋានណែនាំរបស់ក្រសួងសុខាភិបាល ដើម្បីរួមចំណែកទ្រទ្រង់សេដ្ឋកិច្ច នៅក្នុងប្រទេស ខណៈដែលប្រជាពលរដ្ឋដែលទទួលផលកម្រៃសេវាពីការងារទាំងនោះ មិនតិចជាង ៤ម៉ឺននាក់ឡើយ ។
លោកបន្តថា ការស៊ីណូត្រូវតែគោរពឲ្យបានលើការណែនាំនេះ ហើយត្រូវធានាអំពីសុវត្ថិភាពរបស់ភ្ញៀវ ឬអតិថិជន ទៅលើបញ្ហាសុខភាព និងសន្តិសុខសណ្តាប់ធ្នាប់បានល្អប្រសើរ ៕
ដោយ៖ តាកែវ
