ភ្នំពេញ ៖ ជនរងគ្រោះ និងងាយរងគ្រោះដោយសារប្រើប្រាស់គ្រៀងញៀនចំនួន ១៣៥នាក់ ទៅតាមមូលដ្ឋានរបស់ខ្លួនវិញ បន្ទាប់ពីទទួលបានការអប់រំ បណ្ដុះបណ្ដាល បន្សាបសារធាតុញៀន និងពិនិត្យឃើញថាពួកគាត់មានសុខភាព ក៏ដូចជាលក្ខណៈសម្បត្តិគ្រប់គ្រាន់ក្នុងការចូលទៅក្នុងសហគមន៍វិញ នៅថ្ងៃច័ន្ទ ទី២៩ខែមករាឆ្នាំ២០១៨។
ក្នុងពិធីធ្វើសមាហរណកម្មជនរងគ្រោះ និងងាយរងគ្រោះដោយសារប្រើប្រាស់គ្រៀងញៀននោះ លោកមាន ចាន់យ៉ាដា អភិបាលរងរាជធានីភ្នំពេញ បានបញ្ជាក់ថា ដើម្បីរួមចំណែកលើកកម្ពស់គុណតម្លៃនៃសង្គម រាជរដ្ឋាភិបាលកម្ពុជា ក៏ដូចជារដ្ឋបាលរាជធានីភ្នំពេញបានខិតខំប្រឹងប្រែងប្រមូល អប់រំ ស្តារ និងបណ្ដុះបណ្ដាលជំនាញវិជ្ជាជីវៈដល់ជនអនាថា អ្នកសុំទាន និងអ្នកគ្មានទីពឹងទាំងឡាយ ដើម្បីផ្តល់លទ្ធភាពជូនពួកគាត់ក្នុងការស្វែងរកមុខរបរចិញ្ចឹមជីវិតពិតប្រាកដមួយសម្រាប់ខ្លួនឯង។
លោកមាន ចាន់យ៉ាដា អភិបាលរងរាជធានីភ្នំពេញបានបញ្ជាក់ថា៖យើងទាំងអស់គ្នា ត្រូវរួមគ្នាលើកកម្ពស់ និងថែរក្សាគុណតម្លៃនៃសង្គមជាតិរបស់យើង តម្លៃរបស់យើង គឺតម្លៃរបស់ជាតិ៕ ដោយ៖កូឡាប