ភ្នំពេញ៖ សង្ឃមួយអង្គព្រះនាម ណេនថៃ បាននិងកំពុងក្លាយជាប្រធានបទក្តៅគគុក នៅលើអ៊ិនធឺណិត ក្រោយពីព្រះអង្គបានបង្ហោះកម្រងរូបភាពអនុស្សាវរីយ៍ ដែលមើលទាក់ទាញខ្លាំង ជាមួយស្តាយថតនៅទីកន្លែងស្រស់ៗស្អាតផ្សេងៗ។
ជាមួយរូបភាពកម្រងអនុស្សាវរីយ៍ទាំងនេះ របស់ព្រះអង្គ ណេនថៃ ត្រូវបានដឹងថា ជាដំណើរកម្សាន្តទៅកាន់ទឹកជ្រោះ អមដោយទង់ជាតិកម្ពុជាដ៏លេចធ្លោ ក្នុងអំឡុងវិស្សមកាលរយៈពេលខ្លី ក្រោយព្រះអង្គរៀនចប់អនុបណ្ឌិត ហើយត្រូវរៀនបន្តនៅសហរដ្ឋអាមេរិក ដែលធ្វើឲ្យមនុស្សជាច្រើនលួចសរសើរថា ព្រះអង្គពិតជាមានរូបរាងសង្ហា និងសាច់ដុំធំៗស្ទើរគ្រប់ៗគ្នា។
ទោះយ៉ាងណា ទន្ទឹមនឹងមានការកោតសរសើរ ក៏មានបុគ្គលមួយចំនួនតូច បានចូលមកបញ្ចេញមតិអវិជ្ជមាន ដោយរិះគន់ទៅលើព្រះសង្ឃអង្គនេះថា មិនគួរណាបង្អួចភាពឡូយឆាយ ធ្វើខ្លួនប្រៀបដូចជាតារាបង្ហាញម៉ូដអ៊ីចឹង, បួសចង់យកការចាប់អារម្មណ៍ឲ្យនាងទាវមួយចំនួនជ្រួលជ្រើម…។
យ៉ាងណាមិញ ក្រោយឃើញមនុស្សមួយចំនួនបានបញ្ចេញរិះគន់ ស្រាប់តែពេលនេះ ក្រសួងធម្មការ និងសាសនា តាមរយៈលោក សេង សុមុនី អ្នកនាំពាក្យក្រសួងធម្មការ និងសាសនា បានប្រាប់វិទ្យុក្នុងស្រុកមួយថា ពាក់ព័ន្ធនឹងរឿងនេះ ក្រសួងបានចាត់វិធានការហើយ ដោយខណៈពេលនេះ ខាងមន្ត្រីពាក់ព័ន្ធកំពុងតាមដានស្រាវជ្រាវទាក់ទងទៅនឹងព័ត៌មានសង្ឃនេះ ដែលពុំទាន់ដឹងថា គង់នៅវត្តណានោះទេ។
ទន្ទឹមនេះផងដែរ ក្រោយពីទទួលដំណឹងថា ក្រសួងធម្មការនិងសាសនា ចាត់វិធានការទៅលើព្រះអង្គរួច ស្រាប់តែតារាចម្រៀងជើងចាស់លោក ទិត្យ វិច្ឆិកា បានបញ្ចេញមតិរិះគន់ ដោយលើកហេតុផលយ៉ាងចាក់ដោតថា៖ «គ្រាន់តែលោកបងសាច់ដុំធំហើយថតរូបអនុស្សាវរីយ៍ ពិនិត្យដូចជាគ្មានខុសនឹងព្រះធម៌ឬក៏ត្រូវដាច់អាបត្តិអីផង ទាល់តែលោកឆាន់ពោតក្នុងវត្តនឹងទេសនាជេគ្នាទើបវាមិនត្រឹមត្រូវ សូមញាត្តញូមជួយគិតឡើងវិញផងជៀសវាងខុសកាន់តែធ្ងន់ជាងនេះ លោកដែលសឹងហើយឆាន់នឹងលោក សឹងហើយឆាន់ព្រមទាំងព្យាយាមហាត់ប្រាណគឺកាយសម្បទានឹងសុខភាពខុសគ្នា» ៕ ដោយ៖ លឹម ហុង