ស្ទឹងត្រែង ៖ ខេត្តស្ទឹងត្រែងសម្បូរព្រៃឈើទើបធ្វើឲ្យមានការចាប់អារម្មណ៍ពីអ្នកវិនិយោគដីសម្បទានសេដ្ឋកិច្ច។ ក្រុមអ្នកជំនួញបានសម្លឹងឃើញភូមិសាស្ត្រខេត្តមួយនេះអំណោយផលដីធនធានព្រៃឈើជាប្រភពចំណេញក្រាស់ក្រែលធ្វើការវិនិយោគរួចហើយនោះក៏បានបង្កក់ដីលក់ក្រោមលេសផ្ទេរសិទ្ធិទៅឱ្យអ្នកផ្សេងទៀតវិនិយោគបន្ត។ នៅក្នុងនោះអ្នកគ្រប់គ្រងបន្តគឺជាជនជាតិចិននិងមេការខ្មែរ។
គេសង្កេតឃើញថាមានក្រុមហ៊ុនជាច្រើនបានច្បាប់អនុញ្ញាតពីក្រសួងកសិកម្មរុក្ខាប្រមាញ់និងនេសាទធ្វើការអភិវឌ្ឍតិចតួចបំផុតមិនបានគោរពទៅតាមកិច្ចសន្យាឡើយ។ក្រុមហ៊ុនជាច្រើនបានបោះបង់ការរកស៊ីចោលក្រោយពីកាប់ឈើលក់តាមអំពើចិត្តហើយត្រូវប្រមុខរាជរដ្ឋាភិបាលដកហូតទុកជាដីរដ្ឋវិញ។ក្រុមហ៊ុនខ្លះយកលេសផ្ទេរសិទ្ធលក់ទៅឲ្យអ្នកផ្សេង។ក៏ប៉ុន្តែក្រុមហ៊ុនធំៗខ្លះក៏បានអនុវត្តត្រឹមត្រូវតាមកិច្ចសន្យា។តែក្រុមហ៊ុនខ្លះទៀតគ្រាន់តែជាលេសសម្រាប់រកស៊ីរួចផ្ទេរសិទ្ធិលក់ដើម្បីចំណេញតែប៉ុណ្ណោះ។
តាមប្រភពព័ត៌មានមួយបានទម្លាយឲ្យដឹងថាក្រុមហ៊ុនសៀ ម៉ុនកំពុងទទួលសិទ្ធិប្រមូលដឹកជញ្ជូនកូនឈើចេញពីតំបន់ព្រៃភូមិសាស្ត្រស្រុកសៀមប៉ាងខេត្តស្ទឹងត្រែងទៅលក់នៅខេត្តដទៃទៀត។
អ្នកដឹងរឿងនេះបានបង្ហើបប្រាប់ឲ្យដឹងថាក្រុមអ្នកអារឈើជាច្រើននាក់សម្រុកចូលទៅស៊ីឈ្នួលកាត់ឈើនៅខាងក្រៅផ្ទៃដីក្រុមហ៊ុនរួចយកមកលក់ឲ្យក្រុមហ៊ុនដើម្បីដឹកជញ្ជូនចេញពីក្រុមហ៊ុនចែកចាយទៅលក់បន្តតាមបណ្តាខេត្តគោលដៅ។
ក្រុមហ៊ុន សៀ ម៉ុន គឺជាក្រុមហ៊ុនចិនទើបនឹងផ្ទេរសិទ្ធគ្រប់គ្រងបន្ត។ក្រោយពីបានសិទ្ធិភ្លាមក្រុមហ៊ុនមួយនេះបានរៀបចំកម្លាំងដាក់ត្រង់ស័រន័រជាច្រើនគ្រឿងដើម្បីកាត់រំលំឈើក្រៅរង្វង់ក្រុមហ៊ុន និងប្រមូលដឹកជញ្ជូនតាមគោយន្តចូលក្រុមហ៊ុន អារជ្រៀកទៅជាឈើស្របច្បាប់និងមានការត្រួតពិនិត្យពីជំនាញរដ្ឋបាលព្រៃឈើគ្រប់គ្រងតំបន់នោះ។នេះហាក់បីដូចពាក្យចាស់និយាយថាកន្ទេលធំបន្លំដេក។
ប្រភព័ត៌មានបានបន្តថាក្រុមកម្មករជាច្រើននាក់មកពីភូមិវឌ្ឍនៈខេត្តក្រចេះរួមជាមួយម៉ាស៉ីនត្រង់ស័រន័រលើសពី៤០គ្រឿងត្រូវបានមេការនាំមកអារឈើក្រៅរង្វង់ក្រុមហ៊ុនរួចដឹកចូលក្រុមហ៊ុន។
សកម្មភាពដឹកជញ្ជូនឈើចេញពីក្រុមហ៊ុនគិតចាប់តាំងពីថ្ងៃទី៣០ខែមិថុនាឆ្នាំ២០២០មានរថយន្តចំនួន៧ គ្រឿង ហើយផ្ទុកទៅដោយឈើលេខ១ឆ្ពោះទៅភូមិថ្នល់បែក ឃុំត្រពាំងឫស្សី ស្រុកកំពង់ស្វាយ ខេត្តកំពុងធំ។ នៅថ្ងៃទី៤ខែកក្កដាឆ្នាំ២០២០រថយន្តជាច្រើនគ្រឿងដឹកឈើចេញបន្តពីក្រុមហ៊ុនស្រុកសៀមប៉ាងខេត្តស្ទឹងត្រែងឆ្លងកាត់ខេត្តព្រះវិហារហើយមានរថយន្តខ្លះបែកកង់តាមផ្លូវទំនងជាដឹងលើសទម្ងន់ខ្លាំងពេក។ហើយក្រុមការងារអ្នកសារព័ត៌មានថតឃើញឈើអារច្រៀកជាបន្ទះរួចស្រេច។
យោងតាមការចេញផ្សាយរបស់ក្រសួងកសិកម្មរុក្ខាប្រមាញ់និងនេសាទកាលពីថ្ងៃទី 27 ខែឧសភាឆ្នាំ 2019ក្រុមហ៊ុននេះបានចុះកិច្ចព្រមព្រៀងដាំឈើជាមួយក្រសួងកសិកម្ម រុក្ខាប្រមាញ់ និងនេសាទនៅឆ្នាំ២០១៧ ក្នុងភាពជាដៃគូដាំឈើក្នុងស្ថានីយផ្សព្វផ្សាយ និងស្តារព្រៃឈើសៀមប៉ាង លើផ្ទៃដី ២៦.៩៩០ហិកតា។ ក្រុមហ៊ុនសម្រេចបានសមិទ្ធផលសំខាន់ៗដូចជាសាង សង់រចនាសម្ព័ន្ធផ្លូវ អគាររដ្ឋបាល អគារស្នាក់នៅ ប្រព័ន្ធស្រោចស្រព ថ្នាលពិសោធន៍ និងថ្នាលបណ្តុះកូនឈើ។ ក្រុមហ៊ុនបានយកកូនឈើប្រេងខ្យល់ ៦ពូជ ចំនួន ៣០០ពាន់ដើម ពីប្រទេសចិន និងកំពុងធ្វើការបណ្តុះចំនួន ១លានដើមទៀត ដើម្បីដាំសាកល្បង។ លទ្ធផលបានបង្ហាញថាក្នុងចំណោមពូជទាំង ៦ មាន២ពូជ គឺពូជ G9 និង G26 មានការលូតលាស់បានល្អកម្ពស់ជាង ២ម៉ែត្រ តែក្នុងរយ:ពេល ៦ខែប៉ុណ្ណោះ។
ហេតុផលនេះ ក្រុមហ៊ុនបានសម្រេចបញ្ជាទិញពូជទាំង ២ ប្រភេទនេះ ចំនួន ៣លានដើម យកមកដាំលើផ្ទៃដីដែលបានឈួសឆាយរួចសរុបចំនួន ៩០០ហិកតា ក្នុងឆ្នាំ២០១៩។
ឯកឧត្តមរដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានធ្វើការណែនាំដល់ក្រុមហ៊ុនខិតខំអនុវត្តឲបានតាមកិច្ចព្រមព្រៀងជាមួយក្រសួង ជាពិសេសព្យាយាមអនុវត្តឲ្យបានខ្ជាប់ខ្ជូននូវផែនការដាំដុះរបស់ក្រុមហ៊ុន។ ទន្ទឹមនឹងនេះ ត្រូវបន្តផ្តល់កិច្ចសហការឲ្យបានល្អជាមួយរដ្ឋបាលព្រៃឈើ មន្ទីរកសិកម្ម រុក្ខាប្រមាញ់ និងនេសាទខេត្ត ជាពិសេសអាជ្ញាធរដែនដីគ្រប់លំដាប់ថ្នាក់ប្រយោជន៍ដើម្បីបន្តពង្រឹង និងពង្រីកការអភិវឌ្ឍដីនេះឲ្យមានប្រសិទ្ធភាព។ មួយវិញទៀត ក្រុមហ៊ុនគួរពិនិត្យពិចារណាផ្តល់ការងារជូនប្រជាជនក្នុងស្រុកឲ្យបានច្រើនតាមអាចធ្វើទៅបាន ដើម្បីឲ្យពួកគេមានការងារធ្វើ មានចំណូល និងកាត់បន្ថយចំណាកស្រុក៕ ដោយ៖សុខុម
