ថ្មីៗនេះ រឿងរ៉ាវធ្វើរបងរំលោភទ្រូងផ្លូវរួម សឹងអស់ពាក់កណ្តាល នៅក្នុងស្រុកសូទ្រនិគម ខេត្តសៀមរាប ពុំទាន់ផុតរលត់ពីមតិរិះគន់ផង ឥឡូវនេះ ឈានចូលដល់ករណីមួយទៀត នៅក្នុងស្រុកដដែលនេះ គឺធ្វើរបងបិទផ្លូវមិនឲ្យចេញចូលបាន សូម្បីតែដើរ ដែលគិតមកទល់ពេលនេះមានរយៈពេល ១០ ថ្ងៃ ហើយ។
នេះបើយោងតាមគណនីហ្វេសប៊ុកឈ្មោះ Run Sreyneat បានបង្ហោះរូបភាពជាក់ស្តែង និងសូមអំពាវនាវដល់អាជ្ញាធរ ភូមិ ឃុំ ស្រុក និងខាងសុរិយោដី មេត្តាជួយដោះស្រាយពីបញ្ហាធ្វើរបងបិទផ្លូវនេះ ដោយបងស្រីបានសរសេររៀបរាប់យ៉ាងដូច្នេះថា៖ «នាងខ្ញុំជាប្រជាពលរដ្ឋ ដែលរស់នៅ ក្នុងភូមិ ក្រសាទុំ ឃុំ ដំដែក ស្រុក សូទ្រនិគម ខេត្ត សៀមរាប សូមអំពាវនាវដល់ អាជ្ញាធរ ភូមិ ឃុំ ស្រុក ខាងសុរិយោដី សូមជួយដោះស្រាយពីបញ្ហាធ្វើរបងបិទផ្លូវ មិនឲ្យចេញចូល រយៈពេលមួយអាទិត្យជាងហើយ សូម ជួយធ្វើចំណាត់ការដល់ប្រជាជនផង នាងខ្ញុំសូមបងប្អូនជួយស៊ែផង»។
បើតាមគណនីខាងលើ ករណីធ្វើរបងបិទផ្លូវនេះ គឺដោយសារតែផ្លូវនេះជាកម្មសិទ្ធិរបស់ម្ចាស់ដី ដែលបានទិញផ្តាច់ទាំងផ្លូវចាស់ ប៉ុន្តែ បើទោះជាខាងគ្រួសារនាង សុំសម្រួលជួយចេញលុយ ដើម្បីបើកផ្លូវបានដើរឆ្លងកាត់ទាំងអស់គ្នាយ៉ាងណា ក៏ម្ចាស់ដីនេះមិនអើពើ ហើយធ្វើរបងបិទផ្លូវមិនឲ្យចេញចូលដូចមុនទៀតឡើយ។ ដើម្បីជ្រាបកាន់តែច្បាស់អំពីបញ្ហានេះ ស្រីនាដ បានឲ្យដឹងតាមរយៈការឆ្លើយតបទៅកាន់បងប្អូនអ្នកសួរនាំដូចខាងក្រោម៖
Run Sreyneat ឆ្លើយទៅកាន់ Bunyen Yav ថា៖ «ខាងយើងក៏ធ្លាប់សួរអោយយើងចេញប៉ុន្មាន តែខាងគេមិននិយាយអីសោះ ខាងយើងក៏ស្មោះជួយចេញដែរ តែគេមិនលឺមាត់ ដល់ហើយមកធ្វើបិទយកតែម្តង»។ នាងក៏បានឲ្យដឹងទៀតថា បច្ចុប្បន្ននេះ គឺមានការពិការធ្វើដំណើរខ្លាំងមែនទែន»។
Run Sreyneat ជម្រាបទៅកាន់ Vanneth Um ថា៖ «ជំរាបសួរលោកអ៊ំ ដីក្មួយ មុខ ដីគាត់ ដីគាត់នៅក្រោយដីក្មួយតែ គាត់ទិញផ្លូវបានគ្រួសារខ្ញុំក៍ធ្លាប់សូមសម្រួល ជួយចេញខ្លះដើម្បី បានដើរទាំងអស់គ្នា តែខាងគាត់ ខាងក្មួយ សួរ 1 2ក៏មិនអើរពើរ មិនយូរគាត់ធ្វើរបងបិទផ្លូវដីគាត់ពិតមែន ក៏មិនប្រាប់ខាងក្មួយមុនដែល តែផ្ទះក្មួយ នៅខាងក្រោយ អោយក្មួយដើរតាមផ្លូវណា» ។
Run Sreyneat ជម្រាប់ទៅកាន់ Phu Phu ថា៖ «ដីរបស់ខ្ញុំនិងម្ចាស់ផ្លូវនិងយើងទិញមិនមានផ្លូវដូចគ្នា តែ ខាងម្ចាស់ដែលបិទផ្លូវគាត់ ទិញផ្លូវនិងបាន យើងក៏សម្រួលជួយចេញលុយ ខ្លះដើម្បើបានដើរទាំងអស់គ្នាតែខាងគេយើងទៅសួរនាំ ម្តងជា2ម្តងគេមិនអើរពើរ ដល់គេចង់បិទគឺបិទយកតែម្តងហើយផ្ទះខ្ញុំនៅបន្ទប់ពីផ្លូវដែលត្រូវបានគេបិទចេញក៏មិនបានចូលក៏មិនបាន»។
តាមរយៈការរៀបរាប់របស់ពលរដ្ឋខាងលើនេះ នោះប្រិយមិត្តប្រាកដជាយល់ច្បាស់ គឺបញ្ហាត្រង់ថាម្ចាស់ដីមិនអើពើនឹងការសុំសម្រួលបើកផ្លូវ ខណៈផ្លូវនេះក៏ជាផ្លូវដើរចាស់ផងនោះ។ ហេតុនេះ សូមអាជ្ញាធរភូមិ ឃុំ ស្រុកសូទ្រនិគម ជួយដោះស្រាយចំពោះបញ្ហានេះផង ព្រោះថាសព្វថ្ងៃនេះ ពួកគាត់ពិតជាមានការពិបាកក្នុងការធ្វើដំណើរខ្លាំងណាស់ បន្ទាប់ផ្លូវមួយនេះត្រូវបានបិទ៕ ដោយ៖ លឹម ហុង