ភ្នំពេញ៖ លោកទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន នៅព្រឹកថ្ងៃទី៣០ ខែមករា ឆ្នាំ២០១៨នេះ អញ្ជើញជាអធិបតីភាព ក្នុងពិធីចុះហត្ថលេខាលើកិច្ចសន្យា អនុគម្រោងសាងសង់ប្រព័ន្ធបណ្តាញលូ ក្រុងបាត់ដំបង ដែលមានប្រវែងជាង១៥គីឡូម៉ែត្រ ក្នុងទឹកប្រមាណ៧លានដុល្លារ ជាមួយនឹងក្រុមហ៊ុន Beijing Urban Construction Group Co., Ltd របស់ប្រទេសចិន។
តំណាងក្រុមហ៊ុន Beijing Urban Construction Group បានថ្លែងថា ម្រោងសាងសង់ប្រព័ន្ធបណ្តាញលូ ក្រុងបាត់ដំបងគឺជាគម្រោងសំណង់វិស្វកម្មក្នុងវិស័យរស់នៅរបស់ជីវភាពប្រជាជនកម្ពុជា ក៏មានសារសំខាន់ ដោយឈរស្មារតីទទួលខុសត្រូវចំពោះរាជរដ្ឋាភិបាលនិងប្រជាជនកម្ពុជា ក្រុមហ៊ុននឹងគោរពច្បាប់ បទប្បញ្ញតិ្តពាក់ព័ន្ធនៃប្រទេសកម្ពុជា ដោយអនុវត្តការងារតាមផែនការរួមដោយសបស្របតាមបទដ្ឋានបច្ចេកទេស។
លោកទេសរដ្ឋមន្ដ្រី ស៊ុន ចាន់ថុល បានថ្លែងថា ការកសាងប្រព័ន្ធលូក្នុងក្រុងបាត់ដំបងដើម្បីជួយរំដោះទឹកភ្លៀងក្នុងសង្កាត់រតនៈ ដែលរងការជន់លិចជារៀងរាល់ឆ្នាំ ហើយនេះជាជំហានទី១ដែលដាក់ប្រព័ន្ធលូរំដោះទឹកកុំលិចក្រុងបាត់ដំបង និងម្យ៉ាងទៀតដើម្បីឲ្យប្រជាពលរដ្ឋធ្វើដំណើរបានស្រួល។ លោករដ្ឋមន្ត្រី បានណែនាំទៅដល់ក្រុមហ៊ុន សូមធ្វើការតាមលក្ខណៈបច្ចេកទេស តាមសៀវភៅបន្ទុកឲ្យបានត្រឹមត្រូវ ធ្វើឲ្យមានគុណភាពល្អ និងទាន់ពេលវេលាហើយជាពិសេសទៀតនោះ អ្នកត្រួតគុណភាពត្រូវធ្វើការតាមដាននិងពិនិត្យភាពឲ្យតាមស្តង់ដារ។
លោករដ្ឋមន្ត្រីបានបញ្ជាក់ថា “មានមតិប្រជាពលរដ្ឋមួយបានលើកឡើងថាកម្ពុជាយើងធ្វើផ្លូវហើយ ទើបកាយផ្លូវដាក់លូចុះម៉េចមិនព្រមធ្វើផ្លូវធ្វើលូជាមួយគ្នាទៅ កុំធ្វើផ្លូវហើយមកកាយទៀត ។ សូមបម្រាបបញ្ហាគឺអីចឹងដោយសារតែយើងអត់មានថវិកា ពីព្រោះថាថវិកាផ្លូវមានមួយកញ្ចប់សម្រាប់ធ្វើផ្លូវ ហើយនៅពេលធ្វើផ្លូវទើបមានថវិកាបន្ថែមទៀត មកដាក់លូ ហើយបើមិនធ្វើលូនឹងធ្វើឲ្យខូចផ្លូវ។ មានករណីខ្លះមិនមានថវិកាគ្រប់គ្រាន់ទេ ប៉ុន្តែកន្លែងខ្លះមានថវិកាគ្រប់គ្រាន់ត្រូវធ្វើទាំងផ្លូវនិងលូជាមួយគ្នាតែម្តង ដែលជាការល្អ ប៉ុន្តែបើថវិកាអត់គ្រប់គ្រាន់ យើងធ្វើផ្លូវសិន ហើយរកថវិកាមកធ្វើតាមក្រោយ”។
អនុគម្រោងសាងសង់ប្រព័ន្ធបណ្តាញលូ ក្រុងបាត់ដំបងនេះ គឺជាគម្រោងអភិវឌ្ឍន៍សេដ្ឋកិច្ចក្រុងរបៀងខាងត្បូង ក្រោមឥណទានសម្បទាន ធនគារអភិវឌ្ឍនអាស៊ី ។ លោកបន្តថា ចាប់ពីនេះទៅ គឺបានស្នើសុំទៅម្ចាស់ជំនួយត្រូវធ្វើយ៉ាងម៉េច ផ្តល់ថវិកាទាំងធ្វើផ្លូវនិងធ្វើលូអមសងខាង ដើម្បីកុំស្ទះផ្លូវទឹក ។ កាលពីមុន គេឲ្យថវិកាយ៉ាងប៉ុនណា យើងធ្វើប៉ុណ្ណឹង ដល់ពេលបានផ្លូវ ចាប់ធ្វើលូហើយកាយផ្លូវទៀត និងធ្វើឲ្យខូចផ្លូវទៀត ដែលនេះចេះតែធ្វើឲ្យបងប្អូនតែងនិយាយតិទៀនថាធ្វើអត់ឈប់ ធ្វើផ្លូវហើយ កាយផ្លូវដាក់លូ ប៉ុន្តែធ្វើយ៉ាងម៉េចបើថវិការបស់យើងវាតិច តែយើងបានពិភាក្សាគ្នាជាមួយដៃគូអភិវឌ្ឍនិងក្រសួងសេដ្ឋកិច្ចនិងហិរញ្ញវត្ថុ សូមធ្វើការផ្តល់ថវិកាឲ្យបានគ្រប់ ទាំងធ្វើផ្លូវនិងធ្វើលូព្រមគ្នាតែម្តង។
ការចុះកិច្ចសន្យានៅព្រឹកថ្ងៃទី៣០ខែមករានេះ ដែលនឹងប្រព្រឹត្តិទៅ នៅសាលប្រជុំធំនៃទីស្តីការ ក្រសួងសាធារណការ និងដឹកជញ្ជូន លោកស៊ុន ចាន់ថុល បានលើកឡើងថា ការស្ថាបនាប្រព័ន្ធលូក្រុងបាត់ដំបង មានរយៈពេល១៨ខែ គិតចាប់ពីថ្ងៃចុះសន្យានេះ ។
សូមជម្រាបថា តាមរយៈក្រសួងសេដ្ឋកិច្ចនិងហិរញ្ញវត្ថុ បានកៀរគររកថវិកាជំនួយពីធនាគារអភិវឌ្ឍអាស៊ី (ADB) ប្រមាណជា៤៤លានដុល្លារអាមេរិក ដោយផ្តោតលើគម្រោងតូចៗចំនួន៦ របស់កម្ពុជារួមមាន ៖ ក្រុងប៉ោយប៉ែត ក្រុងបាត់ដំបង និងក្រុងបាវិត៕ ដោយ៖កូឡាប
