បុរសម្នាក់ រួមនិងក្រុមគ្រួសារសាច់ញាតិ កំពុងមានការព្រួយបារម្ភជាខ្លាំង ព្រោះតែប្អូនស្រីជាទីស្រឡាញ់ និងមានតែមួយគត់ក្នុងគ្រួសារ បានបាត់ដំណឹងជិត១ថ្ងៃហើយ បន្ទាប់ពីនាងបានហៅកង់បីឥណ្ឌា (PassApp) ទៅផ្សារ ដើម្បីទិញអីវ៉ាន់ ចាកចេញពីខ្លោងទ្វារវត្តព្រៃស្ពឺ (ផ្លូវជាតិលេខ៣) សង្កាត់ចោមចៅ កាលពីវេលាម៉ោងប្រមាណ ១២ ថ្ងៃត្រង់ម្សិលមិញ (០៧ ខែកក្កដា)។
បើតាមគណនីហ្វេសប៊ុកឈ្មោះ Kaňğ Ťô នៅមុននេះបន្តិច ថ្ងៃទី៨ ខែកក្កដា ឆ្នាំ២០២០ នេះ បានដាច់ចិត្ដបង្ហោះស្វែងរកប្អូនស្រី ដោយបានរៀបរាប់ឲ្យដឹងថា៖ «ខ្ញុំបាទឈ្មោះ ឡេងចាន់ថន បាត់ប្អូនស្រី ឈ្មោះ ឡេង ចន្ធូ អាយុ ១៩ឆ្នាំ តាំងពីម៉ោង១២ ថ្ងៃត្រង់ ទី០៧ ខែកក្កដា ឆ្នាំ២០២០ មកដល់ពេលនេះ មិនទាន់បានដំណឹងទេ ទូរស័ព្ទទាក់ទងអត់ចូលតាំងពី១ម៉ោងដំបូង។
ទីតាំងនៅម្ដុំខ្លោងទ្វាវត្តព្រៃស្ពឺ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មូលហេតុគាត់ត្រូវទៅផ្សារទិញអីវ៉ាន់ហើយហៅ កង់បី ឬ PassApp នៅម្ដុំនឹងជិះហើយបាត់ដំណឹងមកដល់ពេលនេះ បើអត់មានរឿងអីកើតឡើងទេ សុំប្អូនត្រឡប់មកវិញមក មិចទៅចោលអ្នកផ្ទះ បងប្អូនប្រាំនាក់ បងមានស្រីតែហែងមួយទេ បងអាណិតម៉ែណាស់គាត់ពិបាកចិត្តខ្លាំងណាស់ សូមកុំមានរឿងអីកើតឡើងចំពោះប្អូនស្រីខ្ញុំ» ៕ ដោយ៖ លឹម ហុង