ស្ត្រីអ្នកលក់ឆ្នោតម្នាក់ បានត្រូវអ្នកបើកបររថយន្តដឹកទំនិញម្នាក់ លើកជើងធាក់ចំកណ្តាលមុខ បណ្តាលឲ្យដាច់ផ្ងារខ្ទាតសឹង២ម៉ែត្រទៅនឹងដីគួរឲ្យអាសូរ ។ ហេតុការណ៍ដ៏សាហាវនេះ បានកើតឡើងកាលពីវេលាម៉ោង ៣ និង ០០ នាទី រសៀលថ្ងៃទី២៩ ខែមិថុនា ឆ្នាំ២០២០ កន្លងទៅនេះ នៅក្នុងទីក្រុង Surat Thani ប្រទេសថៃ។
ជនដៃដល់មានឈ្មោះ Montri អាយុ ៤០ ឆ្នាំ ត្រូវបានប៉ូលិចាប់ខ្លួន។ ចំណែកស្ត្រីរងគ្រោះអាយុ ៥៩ ឆ្នាំ ត្រូវបានបញ្ជូនទៅសង្គ្រោះនៅមន្ទីរពេទ្យ ក្រោយទទួលរងនូវការប្រើអំពើហិង្សាដ៏សាហាវ ពីសំណាក់បុរសកំណាចខាងលើនេះ។
មូលហេតុដែលនាំឲ្យកើតអំពើហិង្សានេះឡើង គឺខណៈស្ត្រីរងគ្រោះកំពុងដើរលក់ឆ្នោតនៅក្នុងតំបន់ នៅពេលនោះ បុរសដៃដល់ជាអ្នកបើកឡានដឹកទំនិញ បាននិយាយថានាងលក់ឆ្នោតថ្លៃជ្រុលហួស ១០០ បាត ខណៈតម្លៃឆ្នោតធម្មតាត្រឹមតែ ៨០ បាត ប៉ុណ្ណោះ។ ជនបង្កបានប្រាប់ទៅស្ត្រីនោះថា គាត់នឹងជូនដំណឹងនេះទៅប៉ូលិស ដើម្បីទទួលលុយរង្វាន់។ បន្ទាប់មក ស្ត្រីរងគ្រោះបានឆ្លើយតបថា លុយរង្វាន់មិនងាយបានដោយស្រួលនោះទេ។ គ្រាន់លឺបែបនេះ Montri ផ្ទុះកំហឹង បានក្រោកឡើង និងលើកជើងធាក់ស្ត្រីរងគ្រោះចំកណ្តាលមុខ បណ្តាលឲ្យដាច់ផ្ងារទៅនឹងដីតែម្តង។
ស្ត្រីលក់ឆ្នោត បានសម្ងំនៅលើកម្រាលដីមួយសន្ទុះ ព្រោះតែភាពឈឺចុកចាប់ខ្លាំង។ គាត់ត្រូវបានរកឃើញមានរបួសនៅមាត់ និងទ្រូង។
តែទោះយ៉ាងណា គេពិតជាសុំសរសើរនូវចិត្តស្ត្រីរងគ្រោះជាខ្លាំង ដែលពុំចងកំហឹងជនបង្កដាច់អហង្ការ ដោយសុខចិត្តឲ្យជនបង្ករួចផុតពីផ្លូវច្បាប់ ព្រោះតែមិនចង់បង្ករឿងវែងឆ្ងាយ និងណាមួយអាណិតកុំឲ្យខាតតបង់ការរកស៊ីចិញ្ចឹមប្រពន្ធកូន ដោយគ្រាន់តែឲ្យរូបគេសុំទោសខ្លួនប៉ុណ្ណោះ ដើម្បីបញ្ចប់រឿង៕
ប្រែសម្រួល៖ លឹម ហុង (ប្រភព៖ INN News )