ភ្នំពេញ៖បន្ទាប់ពីបញ្ចប់ក្នុងពិធីចុះហត្ថលេខាលើកិច្ចសន្យា អនុគម្រោងសាងសង់ប្រព័ន្ធបណ្តាញលូ ក្រុងបាត់ដំបង កាលពីព្រឹកថ្ងៃទី៣០ខែមករាឆ្នាំ២០១៨នេះ នៅទីស្តីការក្រសួង លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការនិងដឹកជញ្ជូន បានបញ្ជាក់ប្រាប់អ្នកសារព័ត៌មានថា ក្រសួងសាធារណការនិងដឹកជញ្ជូន កំពុងរៀបចំអនុក្រឹត្យទាក់ទងនឹងការការពារចំណីផ្លូវ។
លោកទេសរដ្ឋមន្ត្រី បានថ្លែងថា “ដោយសារមានការលំបាកណាស់ នៅពេលដែលធ្វើផ្លូវម្តងៗ រាជរដ្ឋាភិបាល បានចំណាយថវិកាច្រើនណាស់ ដើម្បីដោះស្រាយផលប៉ះពាល់ ជាពិសេសបងប្អូនប្រជាពលរដ្ឋមួយចំនួន បានមកស្នាក់នៅលើចំណីផ្លូវតែម្តង ប៉ុន្តែនៅពេលដែលចង់ឲ្យពួកគាត់រើចេញ គឺត្រូវសងពួកគាត់ថែមទៀត ខណៈពួកគាត់បានមករស់នៅដោយខុសច្បាប់”។
លោកស៊ុន ចាន់ថុល បានលើកឡើងថា ដូច្នេះយើងត្រូវរៀបចំអនុក្រឹត្យឲ្យបានត្រឹមត្រូវ មានការចូលពីក្រសួងរៀបចំដែននគរូបនីយកម្ម ពីក្រសួងពាក់ព័ន្ធអាជ្ញាធរពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ដើម្បីធ្វើយ៉ាងម៉េច ឲ្យអនុក្រឹត្យបានល្អ ដើម្បីគ្រប់គ្រងចំណីផ្លូវឲ្យបានល្អ ដើម្បីកុំពួកគាត់យកចំណីផ្លូវនេះ ធ្វើជាកន្លែងលក់ដូរ កន្លែងចាក់សំរាម ។ល។ ដែលបង្កឲ្យផ្លូវស្ទះ និងស្ទះលូផងដែរ៕ ដោយ៖កូឡាប